EFESIOS 5 - Dios Rimashcata Quillcashcami

Diospac huahuacuna shina causanamanta

¹ Cancunaca ña Diospac cuyashca huahuacuna cashcamantaca, pai shina canata yuyaichic.

² Jesucristo ñucanchicta cuyac shinallatac, cancunapish cuyanacushpa causaichic. Paica Diosman cushpa rupachishca mishquiman ashnacuc shina cangapacmi pai quiquinllatac japi tucushpa, ñucanchicmanta huañurca.

³ Cancuna Diospaclla cashcamantaca huainayaccuna, tucuilaya millaita ruhuaccuna, mana cashpaca ashtahuan charina yuyaillami causancuna nishcapish, cancunapurapica pacta uyarishcallapish canman.

⁴ Pinganayaipac, millai shimicunatapish, asichic mapa parlocunatapish ama rimarichicchu. Chaicunata rimarinapac randica, Diosta mañashpa pagui ninami alli.

⁵ Maijanpish huainayashpa, ima mapatapish ruhuashpa, shinallatac ruhuashcalla diosta alli nic shinallatac imatapish ashtahuan charina yuyailla causaccunaca, Jesucristopish, Diospish mandacucpica imata mana charingacunachu. Chaitaca yachanami canguichic.

⁶ Yanga parlocunahuanca pipish cancunata ama pandachichun. Chashna mana allita ruhuashcamantami Dios piñarishpa, tucui paita mana cazuccunataca llaquichinga.

⁷ Chashna caccunahuanca ama tandaringuichicchu.

⁸ Ñaupaca amsapimi causarcanguichic. Cunanca Apunchic Jesus-huan shuclla tucushcamanta achic luzpimi causacunguichic. Shina cashcamanta achic luzpi causacuc shina causaichic.

⁹ Achic luzca alli shungu canata, imapish cashcata ruhuanata, shinallatac mana llullac cana yuyaitami cun.

¹⁰ Cancunaca Apunchic Jesús munashca shina causanatami yuyana canguichic.

¹¹ Amsapi causac, mana allita ruhuaccuna shina yangallaca ama causaichicchu. Chaipac randica chashna ruhuaccunataca “mana allichu” nishpa rimashpami, achicman llucchina canguichic.

¹² Paicuna pacalla imatapish ruhuashcata rimanataca pinganayanmi.

¹³ Imapish pacashcata achicman llucchicpica, tucuimi yacharinga, ima shina cashca shinami ricuringa.

¹⁴ Chashna achic luzman llucchicpica, imapish luzpimi canga. Chaimantami: «Sueñushcamanta ricchari, huañushcacunapuramanta jatari. Cristomi cantaca achicyachinga» nincuna.

¹⁵ Chaimanta caishuc chaishuc-huan ima shina apanacunata yuyarichic. Ama yuyai illac shina causaichicchu, ashtahuanpish alli yuyaihuan causaichic.

¹⁶ Mana alli causai punzhacunapi causacushcamantaca, allita ruhuana tiyacpica allita ruhuaichiclla.

¹⁷ Imata mana yachaccuna shina ama caichicchu, ashtahuanpish Apunchic Jesucristo ima munashcata yachana yuyailla caichic.

¹⁸ Ama machaichicchu. Machaccunaca imapipish mana jarcarincunachu. Chaipac randica, Diospac Espíritu junda caichic.

¹⁹ Salmocunatapish, Diospac Espíritu yuyachishca sumac cantocunatapish caishuc chaishuc parlanacuichic. Apunchic Jesucristota tucui shunguhuan “allimari cangui” nishpa cantaichic.

²⁰ Ñucanchic Apunchic Jesuspac shutipi punzhanta imamantapish Diostaca pagui nicuichiclla.

Cusandi huarmindi sumacta causanamanta

²¹ Diosta manchashcamanta caishuc chaishuc cazunacuichic.

²² Huarmicuna, Apunchic Jesusta cazuc shina cancunapac cusacunata cazuichic.

²³ Cristoca tandanacushca criccunata uma shina Mandacmi. Cusapish huarmitaca uma shina mandacmi. Jesucristoca tandanacushca criccunata Quishpichicmi. Tandanacushca criccunaca Jesucristopac cuerpomi can.

²⁴ Tandanacushca criccunaca Jesucristota cazucmi. Shinallatac huarmicunapish, tucui imapipish cancunapac cusacunata cazuichic.

²⁵ Cusacunapish, Jesucristo tandanacushca criccunata cuyac shina, cancunapac huarmicunata cuyaichic. Jesucristoca tandanacushca criccunata cuyashpami huañurca.

²⁶ Diospaclla tucushpa causachunmi Cristoca tandanacushca criccunataca yacuhuanpish, pai rimashca shimihuanpish chuyayachirca.

²⁷ Tandanacushca criccunaca paipac ñaupapi chuyanlla, ima mana alli ruhuashcacunapish illac, llambuclla sumaimana ricurichunmi, chashnaca ruhuarca.

²⁸ Cusacunaca, ima shinami quiquinllatac cuyaringuichic, chai shinallatac cancunapac huarmicunatapish cuyaichic. Maijanpish quiquin huarmita cuyacca quiquinllatacmi cuyarin.

²⁹ Quiquin cuerpotaca jaicapi pi mana piñanchu, ashtahuanpish micunata alli carashpami ricuran. Shinallatacmi Cristoca tandanacushca criccunataca huacaichin.

³⁰ Ñucanchicca Jesucristopac cuerpo, partecunami canchic.

³¹ Dios quillcachishcapica: “Chaimantami carica paipac taita mamata saquishpa, paipac huarmihuan tandanacushpa shuc aichalla tucunga” ninmi.

³² Caica pacashca jatun huillaimi. Shina cacpipish, ñucaca Jesucristohuan, tandanacushca criccunahuan ima shina cana cashcatami entendishpa huillani.

³³ Shina cacpica quiquinllatac cuyaric shina, cancunapac huarmicunata cuyaichic. Shinallatac huarmicunapish, cancunapac cusacunata alli nishpa cazuichic.