EFESIOS 4 - Dios Rimashcata Quillcashcami

Diospac Espiritumanta shuc shinalla canamanta

¹ Ñuca Apunchic Jesuspacta ruhuacushcamanta prezu tiyacushpami cancunataca: Dios ima shina causachun cayashca shina causaichic.

² Ama pihuanpish jatun tucushpa, ama piñarishpa, cuyac shunguhuan caishuc chaishuc-huan apanacushpa cuyanacuichic.

³ Diospac Espíritu alli apanacushpa shuc shinalla causachun yuyaita cushcamantaca, chashna causana yuyailla caichic.

⁴ Diospac Espirituca shucllami. Tandanacushca criccunapish shuc cuerpo shinami can. Diospish cancunata shuclla japina cashcata cushicushpa shuyachunmi cayarca.

⁵ Chashnallatac Apunchic Jesuspish shucllami. Crinapish shucllami, bautizarinapish shucllami.

⁶ Shinallatac tucui mashnapac taitaca shuclla Diosmi. Paica tucuita Mandac cashpami, pai munashcata tucuipi ruhuachicun, shinallatac tucuipi causacun.

⁷ Shina cashpapish ñucanchicca Diosmanta ruhuac canata Cristo cusha nishpa cushcamantami chasquishcanchic.

⁸ Chaimantami Dios quillcachishcapica: «Pai jahuaman rishpaca, prezu caccunata pushashpami rirca. Gentecunamanca Diosmanta ruhuac canatami curca» ninmi.

⁹ «Jahuaman rirca» nishpaca, ¿imatatac nisha nin? Shina nishpaca, cai allpa pachamanrac urai shamushcatami nisha nin.

¹⁰ Shina shamushca cashpami, paillatac tucui maipipish cangapacca jahua cielomanta ashtahuan jahuaman rirca.

¹¹ Chai shinami paillatac shuccunataca pai acllashca huillaccuna cachun, shuccunataca Dios ima nishcata huillaccuna cachun, shuccunataca quishpirinamanta alli huillaita huillaccuna cachun, shuccunataca criccunata pushaccuna cachun, cutin shuccunataca yachachiccuna cachun acllashpa, Diosmanta ruhuac canata curca.

¹² Chashna ruhuashpaca, Dios acllashcacuna paipacta ruhuachun, Cristopac cuerpo shina tandanacushca criccunata ashtahuan sinchiyachichun,

¹³ tucui paita criccuna shuc shinalla tucushpa, Diospac Churita ricsishpa, Cristo shinallatac mana pandaric, alli yuyaiyuc tucungacaman yachachichunmi acllarca.

¹⁴ Shina cashpami ñucanchicca huahuacuna imatapish jahualla cric shina, chai pandachishpa puric, yachac tucushca gentecuna yachachishcata catishpa, huaira apashca shinaca ña mana cashun.

¹⁵ Chaipac randica imapish cashcata huillashpa, caishuc chaishuc-huan cuyanacushpami, Cristohuan shuc shinalla causana yuyailla cana canchic. Cristoca tandanacushca criccunapac uma shinami.

¹⁶ Tucui criccuna Cristopac cuerpo shina cashpaca, tauca cashpapish chaqui maqui llutarishca shinami shuc shinalla canchic. Chashna tauca cashpapish cuyanacushpa, caishuc chaishuc allita ruhuacpica, tandanacuica sinchiyashpami catinga.

Cristo mushuc causaita cuc cashcamanta

¹⁷ Apunchic Jesusmantami cancunamanca caicunata mingani. Chai yanga, quiquin munaillata ruhuashpa Diosta mana ricsiccuna shinaca, ña ama causaichicchu.

¹⁸ Paicunaca amsa yuyaillata charishpami, mana alli yuyaita japincuna. Diosmanta shamuc mushuc causaitaca, yuyai illac rumi shungu cashcamantami mana chasquincuna.

¹⁹ Paicunaca mana pingaccuna cashpami, ima mana allita ruhuashpapish, mana jarcarishpa ruhuancunalla.

²⁰ Shina cacpipish cancuna Cristota chasquishpaca, mana chai shina causangapacchu chasquircanguichic.

²¹ Cancunaca Jesusmanta cashcata nic huillashcata uyashpami, pai munashca shina causanata yachacurcanguichic. Chaitaca allitami yachani.

²² Chaimantami cancunaca ñaupa ima shina causacushcataca saquina canguichic. Chai yuyaicunaca cancunata pandachishpa, mana allillata ruhuachishpami, ismuchic shina tucuchicurca.

²³ Cancunaca Diospac Espíritu yuyaita cushca shinami, ñaupa mana alli yuyaicunataca saquina canguichic.

²⁴ Cancuna mushuc churanata churaric shina, Dios mushucyachishca causaichic. Shina causashpami, cashcata nic huillashca shina Diospaclla tucushpa, allillata ruhuashpa, shuccunamanpish ricuchinguichic.

²⁵ Tucui criccuna shuc shinalla cashcamantaca ña ama ashtahuan llullashpa, caishuc chaishuc-huan imapish cashcallatac nichic.

²⁶ Imamanta piñarishpapish, ama juchallichicchu. Piñarishpapish, ama tucui punzha piñashcalla caichicchu.

²⁷ Diablo ashtahuan pandachishpa catichunca ama saquichicchu.

²⁸ Shuhuac cashpapish shuhuanata saquishpa, trabajanata yuyaichic. Shina quiquin maquihuan trabajashpami, huacchacunaman imata cungapacpish charinguichic.

²⁹ Imapish mana alli rimaicunata ama rimashpa, ashtahuanpish yuyaita cuc rimaicunallatac rimaichic. Chashna rimacta uyashpami, shuccunapish yuyaita japingacuna.

³⁰ Diosca juchapi huatashca shinamanta cacharichishpa pushana punzhacamanmi, Diospaclla cashcata ricuchishpa causachun, ñucanchictaca paipac Espirituhuan señalashpa chicanyachirca. Chaimanta millaita rimashpa ama Diospac Espirituta nanachichicchu.

³¹ Shungu ucullapi piñashca canata, imapish llaquichinata, pitapish piñanata, camishpa rimanata, rimashpa caparinata, shinallatac tucui mana allicunataca saquichic.

³² Caishuc chaishuc-huan cuyac shunguhuan apanacushpa alli causaichic. Jesucristomanta cancunapac juchacunata Dios perdonashca shina, caishuc chaishuc perdonanacuichic.