EFESIOS 3 - Dios Rimashcata Quillcashcami

Mana israelcunaman huillachun Pabloman mingashcamanta

¹ Chaimantami ñucaca Jesucristopacta ruhuacushcamanta, cancuna mana israelcunapac allipac caipi prezu cani.

² Diosca paipac cuyaimanta cancunapac allipac alli huillaita huillachun ñucaman mingashcataca, ñami yachanami canguichic.

³ Diosca pi mana yachashcatami ñucamanca yachachirca. Chaitaca ñami ashallatapish huillashpa quillcarcani.

⁴ Chai quillcata rezashpami, Jesucristomanta pi mana ricsishcata ñuca yachashcataca yachac chayanguichic.

⁵ Ñaupamanca chai mana yachashcataca pimanpish mana ricuchishcami carca. Ashtahuanpish cunanca paipac Espiritumantami Diosca Jesús acllashca huillaccunaman, Pai acllashca huillaccunamanpish ricuchishca.

⁶ Chai pi mana yachashcaca caimi: Quishpirinamanta alli huillaita uyashpa crishcamantami mana israelcunapish, israelcunahuan pacta japina cashcata japingacuna. Paicunapish shuc cuerpo shina cashcamantami, Jesucristomanta Dios cusha nishcataca chasquingacuna.

⁷ Ñuca mana ima cacpipish Dios cuyashcallamantami, cai alli huillaita huillachun ñucataca churarca. Diosca chashna ruhuashpami, pi mana ruhuaipacta ruhuac cashcata ricuchirca.

⁸ Ñucami tucui Diospaclla caccunamantaca ashtahuan yangalla cani. Shina cacpipish Dios cuyashpami, cai alli huillaita mana israelcunaman huillashpa sumac ruhuanata ñucamanca mingarca. Cai huillanaca Cristo tucuimanta yalli allicunata cuc cashcata huillanami.

⁹ Tucuita ruhuac Diosca pai imata ruhuasha nicushcataca, ñaupamanta pachami pacashpa charicushca. Chaita huillachunmi ñucamanca mingarca.

¹⁰ Cunanca jahua pachapi mandaccunapish, poderta chariccunapish tandanacushca criccuna ima shina cashcata ricushpa, Dios imatapish yachac cashcata yachachunmi, chashnaca ruhuarca.

¹¹ Chashnami Diosca ñaupamanta pacha pai imata ruhuasha nicushcata pactachirca. Chashna tucuchunmi, Apunchic Jesucristota cacharca.

¹² Chashna cacpimi: “Cristota crishpa paihuan shuclla tucushcamantaca, Diosca chasquingallami” nishpa, mana manchashpa paipacman cuchuyanata pudinchic.

¹³ Shina cashcamanta ñuca cancunamanta llaquita apacucpipish ama llaquirishpa, ashtahuanpish ñaupaman catichunmi mañani. Cancunapac allipacmi cashna llaquicunata apacuni.

Jesucristopac cuyaimanta

¹⁴ Chaimantami ñucanchic Apunchic Jesucristopac Diospac ñaupapica mañangapac cungurini.

¹⁵ Paimantami jahua pachapi caccunapish, cai pachapi caccunapish tucui mashna causaita charincuna.

¹⁶ Paipac sumaimana charishcacunata cancunaman cushpa, paipac Espirituhuan yuyaita allichishpa, sinchi criccunata ruhuachunmi, Diosta mañacuni.

¹⁷ Crishcallamanta cancunapac shungupi Cristo causachun, shinallatac cancunaca cuyaipi sinchita sapiyashca shina cachunmi mañacuni.

¹⁸ Chai shina cashpami, Diospaclla cac tucui criccunahuan tandanacushpaca, Cristoca tucuimanta yalli cuyac cashcata yachac chayanguichic. Chai cuyaica jahuamanpish, uramanpish, chainicmanpish, cashnamanpish, maicamanpish chayac cashcataca yachac chayanguichic.

¹⁹ Cristopac cuyaica tucui yachaicunamantapish ashtahuan yallimi. Chai cuyaitami cancunataca ricsichun munani. Chai cuyaita ricsishpami, Dios cancunapac shungupi causacushcatatac yachac chayanguichic.

²⁰ Diosca ñucanchicpi imatapish ruhuaclla cashcata ricuchic shinallatacmi, ñucanchic yuyashcatapish, mañashcatapish yalli imatapish ruhuaclla can.

²¹ ¡Tandanacushca criccuna, Jesucristohuan shuclla tucushcamantaca, huiñai huiñaita Diostaca “sumacmari cangui” nicushunchic! Chashna cachun.