EFESIOS 1 - Dios Rimashcata Quillcashcami

Efeso pueblopi causac criccunaman Pablo quillcashcamanta

¹ Ñucaca Dios munashcamanta Jesús acllashca apóstol Pablomi cani. Efeso pueblopi Cristo Jesusta crishpa Diospaclla caccunamanmi,

² ñucanchic Diospish, Apunchic Jesucristopish cancunataca mai cuyashpa, sumac causaita cushca cachun nini.

Jesucristollamanta Dios cusha nishcata chasquina cashcamanta

³ Cristohuan shuclla tucushcamantami, ñucanchicmanca paipac Espirituta cushpa, jahua pachapi tiyac tucuilaya allicunata Diosca curca. ¡Chaimantami ñucanchic Apunchic Jesucristopac Diostaca alli nicunalla canchic!

⁴ Diosca paipac cuyaimantami manarac cai pachata ruhuashpa, ñucanchictaca jucha illac paipac ñaupapi paipaclla cachun acllashca.

⁵ Jesucristohuan shuc shinalla tucushcamantami ñucanchictaca paipac huahuata shina ruhuashpa, ñaupaman pai ima shina munacushcata pactachirca.

⁶ Chashnaca Dios mai cuyashpa, paipac cuyashca Churimanta allicunata cushcamantami, ¡paitaca alli nicunalla canchic!

⁷ Pai cuyashcamantami, paipac Churipac yahuarhuan ñucanchictaca huatashca shinamanta cacharichishpa, juchacunata perdonarca.

⁸ Diosca tucuita yachac, alli yuyaiyuc cashpami, paipac cuyaitapish ñucanchicman ricuchishpa,

⁹ pai munashcamanta ñaupaman cusha nishca pacashcataca, Cristomanta ñucanchic japichun ricuchirca.

¹⁰ Diosca cai cusha nishcataca pactana punzha chayacpimi pactachirca. Jahua pachapi, cai pachapi tiyac imacunatapish Cristo mandachunmi, tandachishpa chashnaca ruhuarca.

¹¹ Cristohuan shuclla cashcamanta pai cusha nishcata ñucanchic japichunmi, Diosca pai munashca shina ñaupaman ña acllashca. Tucui imatapish pai munashca shinami ruhuan.

¹² Chashna ruhuashpaca, ñucanchicrac punta Apunchic Jesús yuyailla cashpa, Diosta “allimari cangui” nichunmi chashnaca ruhuarca.

¹³ Shinallatac cancunaca cashcata nic huillashcata, quishpirinamanta alli huillaita uyashpaca, Cristota cricpimi, pai cusha nishca Espirituta cushpa, paipacllata ruhuashca sellota churarca.

¹⁴ Cai shina ruhuashpami ñucanchictaca huatashca shina cashcamanta cacharichishpa, paipacllata ruhuashpa, pai cusha nishcata chasquiccuna cashcata ricuchin. ¡Chashna ruhuashcamantaca Diosta “allimari cangui” nishunchic!

Pablo criccunamanta Diosta mañashcamanta

¹⁵ Chaimanta cancuna Apunchic Jesusta crishpa, Diospaclla cac tucui criccunahuan cuyanacuita charishcata uyashpami,

¹⁶ Diosman ñuca mañashpaca, mana cungarishpa cancunamanta Diosta pagui nicunilla.

¹⁷ Diospac Espíritu yachaita cushpa alli ricuchicpi cancuna Diosta alli ricsichunmi, ñucanchic Apunchic Jesucristopac sumaimana Diosta mañacuni.

¹⁸ Cancuna pai cayacpi imata shuyana cashcata yachachun, shinallatac paipaclla caccunaman Dios cusha nishcaca sumac cashcata yachachunmi, alli yuyaita cuchun nishpa mañani.

¹⁹ Ñucanchic paita criccuna cacpimi imatapish allita ruhuachun paipac poderta ñucanchicman cucun. Cai poderllahuantacmi, Diosca pipish mana ruhuaipaclla cashcata ruhuashpa,

²⁰ Cristota causachishpa, jahua pachapi paipac alli maquiman tiyachishpa ricuchirca.

²¹ Chashna tiyachishpami poderta chariccunatapish, mandaccunatapish, tucuita atishpa mandaccunatapish, shinallatac cunan tucui ima tiyashcacunatapish, shamuc punzhapi ima tiyana cashcatapish tucuita Mandac cashcata ricuchirca.

²² Chashna tucui ima tiyashcacunata mandachun Cristoman cushpaca tandanacushca criccunatapish uma shina mandachunmi, Cristollamantac Diosca curca.

²³ Tandanacushca criccunaca Cristopac cuerpomi can. Tandanacushca criccunaca tucui ima illashcatami Cristomanta chasquin. Shinallatac Cristollatacmi maipipish ima illashcacunataca cun.