ECLESIASTÉS 9 - Dios Rimashcata Quillcashcami

¹ Tucui caicuna ima shina cashcata yachangapacca shunguhuanmi yuyaricurcani. Cashcata ruhuaccunapish, alli yachaccunapish, paicuna imata ruhuashcacunapish Diospac maquipimi. Runaca tucui paipac ñaupapi cacpipish, cuyaimanta cashcatapish, piñaimanta cashcatapish mana yachanchu.

² Tucuimi chashnallatac tucun. Cashcata ruhuacpish, Diosta mana manchacpish, allipish, millaipish, chuya runapish, mapa runapish Diosman animalta cushpa huañuchicpish, mana animalta cushpa rupachicpish, ari nicpish, ari ninata manchacpish chashnallatacmi tucun.

³ Inti achicyachicuc cai pachapi tucui ruhuanamantaca caicunami mana alli ricurin. Tucuimi chashnallatac tucun. Huañuclla runapac shunguca tucui causaipimi mana allita ruhuana yuyaillahuan, juizhu illac causacun. Chai quipaca huañushcacunahuanmi tandanacugrin.

⁴ Tucui causaccunamanca ima shuyanaca tiyanracmi. Huañushca leonpac randica, causac allcumi ashtahuan alli.

⁵ Causaccunaca huañuna cashcataca yachanmi. Ashtahuanpish huañushcacunaca imata mana yachanchu. Imata japinatapish mana charinchu. Paicunataca pipish mana yuyarinchu.

⁶ Paicunapac cuyaipish piñaipish, envidianapish ñami tucurirca. Inti achicyachicuc cai pachapi tucui imata ruhuanatapish ña mana charingacunachu.

⁷ Can imata ruhuashcacunamantaca Diosca cushicushcami. Cunanca cushicushpa cambac micunata micugrilla, cushi shunguhuan vinotapish ubiagrilla.

⁸ Punzhanta yuranlla churanata churaringui. Cambac umapipish mishquilla ashnacucca ama illachun.

⁹ Inti achicyachicuc cai pachapi causachun Dios cushca tucui cambac yanga causaipi, cambac cuyashca huarmihuan cushicui. Cai pachapi trabajashcamantaca chashnami cushicuna cangui.

¹⁰ Cambac maquiman tucui shamushcata tucui fuerzahuan ruhuailla. Can rina Seolpica imata ruhuanapish, imata yuyarinapish, imata yachacunapish, alli yachaipish mana tiyanchu.

¹¹ Inti achicyachicuc cai pachapica caitapish ricurcanimi: Jatun callpaipica mana sinchi callpaccunachu mishan. Macanacuipipish mana sinchicunachu mishan. Micunatapish mana yachaccunallachu micun. Mana yuyaisapacunallachu chayucyan. Mana allita rimaccunallachu alli nishca can. Ashtahuanpish tucuimanmi alli punzhapish, mana alli punzhapish shamun.

¹² Ashtahuanpish runaca ima horas ima tucunata mana yachanchu. Ima shinami challuacuna mallapi japi tucun, alasyuc animalcuna linchipi japi tucun. Chashnallatacmi runacunapish mana alli punzhapi japi tucun.

¹³ Shinallatac inti achicyachicuc cai pachapica ñucaca cai jatun yachaitami ricurcani:

¹⁴ Ashalla gentecuna causana shuc uchilla pueblomi tiyarca. Chai pueblopi causaccunahuan macanacungapacmi alli sinchi shuc jatun mandac shamurca. Chai pueblota muyushpami jatun torrecunata shayachirca.

¹⁵ Chai pueblopica alli yachac huaccha runami causarca. Chai runaca alli yachac cashpami chai pueblotaca quishpichirca. Shina cacpipish chai huaccha runataca pipish mana yuyarircachu.

¹⁶ Chaimantami ñucaca: «Yallita sinchi canapac randica, alli yachac canami ashtahuan alli. Huaccha runataca alli yachac cacpipish, yangapi churashpami, pai alli yuyaita cushcataca mana uyanayachirca» nircani.

¹⁷ Mana entendic jatun mandac rimashcata uyanapac randica, yachac runa rimashcata upalla yuyanami ashtahuan alli.

¹⁸ Alli yachaica ima macanacunata yalli ashtahuan allimi. Ashtahuanpish shuc pandaillami achca allicunataca tucuchin.