ECLESIASTÉS 8 - Dios Rimashcata Quillcashcami

¹ ¿Pitac yuyaisapa shina runaca tiyan? ¿Pitac tucuita entendishpa huillacca tiyan? Alli yachaica runapac ñahuitami achicyachin. Piñashca cactapish alliyachinmi.

² Dios-huan ari nishcamanta jatun mandac mandashcata cazungui nishpami alli yuyaita cuni.

³ Jatun mandacpac ñaupamantaca ama utca rinata yuyanguichu. Ima mana allitaca ama chaillatatac ruhuashpa catinguichu. Paica tucui ima munashcatami ruhuanga.

⁴ Jatun mandac mandashcaca poderta charinmi. ¿Pitac: «Imatatac ruhuacungui» nishpa tapungayari?

⁵ Mandashcata cazuc runaca mana ima tucungachu. Yuyaisapa runapac shunguca Dios ima horas, ima shina ruhuanata yachanmi.

⁶ Tucui ima munashcata ruhuangapacmi shuc punzhapish, ima shina ruhuanapish tiyan. Shina cacpipish runa mana allita ruhuashcaca paillatatacmi llaquichin.

⁷ Paica ima tucunataca mana yachanchu. ¿Pitac pai ima tucunataca huillangayari?

⁸ Runaman causaita cuc samai ama llucshichunca pi mana jarcai pudinchu. Shinallatac huañuna punzhata jarcacpish mana tiyanchu. Huañuimantaca ima macanacunahuanpish mana quishpiri pudinchu. Diosta mana manchac runatapish, pai ruhuashca juchaca mana quishpichingachu.

⁹ Inti achicyachicuc cai pachapica tucui caicunata ruhuashcacunatami tucui shunguhuan ricurcani. Maijan cutinca runaca paipac llaquipacllatacmi caishuc runata llaquichinga.

Runapac causaica yangalla cashcamanta

¹⁰ Shinallatac Diospaclla huasipi llucshishpa, yaicushpa puric mana allita ruhuaccuna huañucpi, alli nishpa enterrarictami ricurcani. Paicuna mana allita ruhuashpa causacushca pueblopimi chashna ruhuacurca. Chaipish yangallami.

¹¹ Huañuclla runacunaca paicuna mana allita ruhuashcamanta mana utca llaquichicpica, ashtahuan mana allita ruhuanatami yuyarincuna.

¹² Juchayuc runa patsac cutin millaita ruhuacpipish unaita causacpipish, ñucaca Diosta manchashpa, paipac ñaupapi allita causac runa alli llucshic cashcatami yachani.

¹³ Ashtahuanpish Diosta mana manchac runapacca imapish mana alli llucshinata, paipac causana punzhacuna ashallayashpa, llandu shina tucuna cashcatami yachani. Diospac ñaupapi mana manchashcamantami chashnaca tucunga.

¹⁴ Cai pachapica shuctac yanga ruhuaicunapish tiyanmi. Cashcata ruhuaccunaca Diosta mana manchaccuna shinallatacmi llaqui tucuncuna. Diosta mana manchaccunaca cashcata ruhuaccuna shinami alli causancuna. Chaicunapish yangami ninimi.

¹⁵ Chaimantami ñucaca, imamanta cushicuna cashcata alli nini. Inti achicyachicuc cai pachapica runaca micushpa, ubiashpa, cushicunami can. Caicunamanta yalli cushicuica mana tiyanchu. Cai pachapi Dios causaita cushcacamanca, pai trabajashcamantami chaitaca ruhuai pudin.

¹⁶ Ñucaca tucui shunguhuanmi allita yachacushpa, cai pachapi causaccuna imata ruhuacucta ricushpa yachacurcani. Maijancunaca tutapish, punzhapish mana samarincunachu.

¹⁷ Dios tucuita ruhuashcatami ricurcani. Inti achicyachicuc cai pachapi imata ruhuashcataca runaca mana yachai pudinchu. Runaca cai ruhuashcata alli yachacusha nicushpapish manatac entendi pudingachu. Yuyaisapa runa alli yachanimi nicushpapish, paipac yachashcahuanca mana entendi pudingachu.