ECLESIASTÉS 7 - Dios Rimashcata Quillcashcami

Alli yachaimantapish, yuyai illaimantapish

¹ Mishquilla ashnacuc jambita yallica, tucuipac alli nishca canami alli. Huañuna punzhami, huacharina punzhata yalli ashtahuan alli.

² Jatun micuiman rinapac randica, duelopac huasiman rinami ashtahuan alli. Huañuimi tucui runacunata tucuchin. Causaccunaca chaitami yuyarina can.

³ Llaquilla ñahuimi shungupacca alli. Asinapac randica, huacanami ashtahuan alli.

⁴ Alli yachac runaca duelo huasitami yuyacun. Mana entendic runaca, cushicuna huasitami yuyacun.

⁵ Mana entendic runacuna cantashcata uyanapac randica, alli yachac runa cunashcata uyanami ashtahuan alli.

⁶ Mana entendic runa asishcaca, ninapi mangata shayachishpa, casha yantata saticpi tucyacuc shinami. Chaipish yangallami.

⁷ Llaquichishpa charicpica, yachac runapish yuyai illacmi tucun. Pacalla pagashcaca shungutami pandachin.

⁸ Callarinapac randica, ruhuanata tucuchinami ashtahuan alli. Jatun tucuna yuyaita charinapac randica, mana piñaric yuyaita charinami ashtahuan alli.

⁹ Piñarina atichunca ama saquinguichu. Mana entendic runapac yuyaipimi piñarina yuyaica tiyan.

¹⁰ Canca ama: «¿Imamantatac punta huatacunaca cai punzhata yalli alli carca?» ninguichu. Chaitaca mana alli yachacmi tapun.

¹¹ Alli yachac, shinallatac herenciata charic runaca allimi. Paica intita ricushpa causaccunapacca mai allimi.

¹² Alli yachaipish, cullquipish escudo shinami jarcan. Shina cacpipish alli yachaimi yachaccunamanca causaita cun.

¹³ Dios ruhuashcata ricushpa yuyari. Pai huishtuta ruhuashcataca, ¿pitac derechai pudinga?

¹⁴ Alli punzha cacpica, chai punzhamanta cushicui. Cutin mana alli punzha cacpica, Dios chai ishcai punzhacunatatac ruhuashcata yuyari. Chaica runa paipac quipa ima tucunata ama yachachunmi, chashnaca churarca.

¹⁵ Tucui caicunatami ñuca yanga causai punzhacunapi ricushcani. Cashcata ruhuac runaca, cashcata ruhuac cashpapish huañunllami. Mana allita ruhuac runaca, mana allita ruhuac cashpapish unaitami causan.

¹⁶ Ama yallita cashcata ruhuacpish, ama yallita yachacpish canguichu. ¿Ima shinatac canllatac tucurigringui?

¹⁷ Ama yalli millaipish, ama yalli yuyai illacpish canguichu. ¿Ima nishpatac huañui manarac chayacpi huañungui?

¹⁸ Caita chariranaca allimi. Caishuctapish cambac maquimantaca, ama cacharinguichu. Diosta manchac runaca tucuipimi alli llucshinga.

¹⁹ Alli yachac runataca pai yachacushcami, shuc pueblopi causac chunga mandaccunatapish yalli sinchiyachinga.

²⁰ Cai pachapica cashcata ruhuac, allita ruhuac, jucha illac runaca shucllapish mana tiyanchu.

²¹ Tucui imatapish ama shungupi chasquinguichu. Pacta canta servic runa, canta mana alli nishpa rimashcata uyanguiman.

²² Canpish tauca cutinmi shuccunata mana alli nishpa rimarcangui. Chaitaca canllatac yachanguimi.

²³ Tucui chaicunatami alli yuyaihuan allita ricurcani. Ñucaca: «Alli yachacmi tucusha» nircanimi. Shina cacpipish, alli yachaica ñucamanta caruyarcami.

²⁴ Chashna yachana carupi cacpi, yallita ucupi cacpica, ¿pitac tari pudingayari?

²⁵ Chaimantami cutinllatac alli yachangapac, ima shina cacta ricungapac, allita yachac cangapac, yuyaita charingapacpish cutin ricurcani. Shinami yuyaita mana charishpa, mana allita ruhuashpa loco shina pandarishpa causacushcata yacharcani.

²⁶ Tuclla shina, linchi shina shunguta charic, huatana huascata shina maquita charic huarmica huañuitapish yalli jayac cactami ricurcani. Diosta cushichic runallami chai huarmimantaca quishpiringa. Ashtahuanpish juchayuc runaca, chai huarmihuanmi prezushca shina saquiringa.

²⁷ Riquichic, huillac runa ñucaca, yuyaita japingapac shucta callarishpa alli ricushpaca caitami ricurcani.

²⁸ Ñuca almahuan mashcashpapish, huaranga caricunamantaca shucllatami allitaca tarini. Ashtahuanpish cai tucui huarmicunamantaca, shuc huarmillatapish allitaca mana tarinichu.

²⁹ Riqui, ñucaca caillatami tarircani. Diosca runataca allitami ruhuashca. Ashtahuanpish paillatacmi mana allita yuyarishca ninmi.