ECLESIASTÉS 6 - Dios Rimashcata Quillcashcami

¹ Shuc mana allitami cai pachapica ricuni. Chai llaquica tucui gentecunapimi tiyan.

² Diosca runamanca charinacunatapish, ima allicunatapish cushpami tucuipac alli nishcata ruhuan. Imapish mana illanchu, shungu munashcatami charin. Shina cacpipish, Diosca chai tucui charishcacunahuan cushicuchunca mana saquinchu. Chai runa cushicunapac randica, mana ricsishcacunami cushicun. Chaipish yangami, shinallatac jatun llaquimi.

³ Shuc runa patsac churicunata charishca cashpapish, tauca huatacunata, achca punzhacunata causashca cashpapish, pai charishcahuanca mana cushicushcachu. Shinallatac pai huañucpipish, enterrangapac sepulturaca mana tiyashcachu. Chaimantami ñucaca, shullushca huahuami chai runata yalli alli nini.

⁴ Chai shullushca huahuaca cai pachaman yanga shamushpami, pura tutaman rin. Paipac shutitaca pura tutami chingachin.

⁵ Chai huahuaca intitapish mana ricushcachu, mana ricsishcachu. ¡Shina cashpapish chai huahuami chai runata yalli samarin!

⁶ Chai runa ishcai huaranga huatata causashca cashpapish, pai ima charishcacunahuan mana cushicushca cashpaca, ima allita cangayari. ¿Manachu tucui mashna chaillamantac rincuna?

⁷ Runa llaquita apashpa tucui imata ruhuashcaca micungapacllami. Shina cashpapish mana huicsa pactata micunchu.

⁸ ¿Alli yachac runaca mana entendic runata yallichu? Cai pacha causaccunapurapi alli allita causac huaccha runaca, ¿imapactac valin?

Runacunaman ima alli cashcamanta

⁹ Chingarinallata yuyanapac randica, ricunami ashtahuan alli. Chaipish huairata caticuc shina yangallami.

¹⁰ Cunan imapish tiyacca ñami shutiyuc carca. Runa ima shina cactapish yachanimi. Runaca paita yalli fuerzata charic-huanca mana chimbapurai pudinchu.

¹¹ Yallita rimarishpaca, imapish yanga rimaicunatami ashtahuan riman. Chaica runamanca imapac mana valinchu.

¹² Runapac causai punzhacunaca llandu pasacuc shina yangallami. Chai punzhacuna alli canataca, ¿pitac yachan? Runa huañushca quipa inti achicyachicuc cai pachapi ima tucuna cashcataca, ¿pitac huillai pudingayari?