ECLESIASTÉS 5 - Dios Rimashcata Quillcashcami

Manarac alli yuyarishpa Diosman cusha nishcamanta

¹ Diospac huasiman rishpaca, alli cangapac ringui. Imata mana yachac, mana entendic runacuna shina, animalta Diosman cushpa huañuchinapac randica, chaipi yachachishcata uyangapacmi ashtahuan cuchuyana cangui.

² Diospac ñaupapica manarac alli yuyarishpa ama rimaichu. Manarac alli yuyarishpaca ama imatapish ruhuashami nichu. Diosca jahua pachapimi, canca allpapimi cangui. Shina cashcamanta can imata ruhuaipacllata ari ningui.

³ Yallita yuyaricucpica, sueñuimi shamun. Shinallatac yallita rimarishpaca, mana entendic runa shinami riman.

⁴ Diosca yuyai illac runahuanca mana cushicunchu. Chaimanta paiman imata ruhuasha nishcataca ama unaiyashpa utca pactachingui. Imata ruhuasha nishcataca pactachinami cangui.

⁵ Imatapish ruhuashami nishca jahua mana pactachinapac randica, upalla canami ashtahuan alli.

⁶ Cambac shimillatac juchata ruhuachichunca ama saquinguichu. Diosmanta huillacpac ñaupapipish mana yachaimantami chashna ruhuashcani ama ninguichu. ¿Cambac rimashcahuan Diosta piñachicpi, pai piñarishpa can ruhuashcata tucui tucuchichunchu munangui?

⁷ Chaica, muscuc shina imatapish yuyacucpica, yanga yuyaicunapish, yanga rimaicunapish llucshinmi. Ashtahuanpish canca Diosta manchai.

Allita ruhuashpa causanata paquishcamanta

⁸ Maijan llactapi huacchacunata llaquichicucta, paicunaman cuna cashcata mana cushpa, mana allita ruhuacucta ricushpaca, ama mancharinguichu. Shuc mandactaca paita yalli mandacmi ricucun. Shinallatac chai mandacta ashtahuan yalli jatun mandacpish tiyanmi.

⁹ Ashtahuanpish allpapi pucushcaca tucuipac allipacllatami. Jatun mandacpish chagracunapimi yuyaita churashpa causan.

¹⁰ Cullquita munac runaca mashnata charishpapish mana cushicunchu. Ima charishcacunata munacca, chai charishcamanta ima allita mana japinchu. Chaipish yangallami.

¹¹ Ima allicuna achcayacpica, chaita tucuchiccunapish achcayanmi. Chaicunaca chayuc runamanca ¿ima allipactac canga? Ñahui ricushcallahuanmi saquiringa.

¹² Trabajac runaca ashallata micushpapish, achcata micushpapish allimi sueñun. Ashtahuanpish chayuc runataca chai charishcacunami mana sueñucta saquin.

¹³ Inti achicyachicuc cai pachapica yalli llaquitami ricurcani. Runa huacaichishca charishcacunaca, paipac llaquipacllatacmi.

¹⁴ Chai charishcacunataca yangalla tucuchishpami, paicunapac huahuacunamanca imata mana cushpa, chushac maquillata saquincuna.

¹⁵ Ima shinami mamapac huicsamanta lluchulla huacharin, chashnallatacmi tigran. Cai pachaman ima shina shamushca shinallatacmi cutin. Pai trabajashpa imata charishcamantaca imata mana apanchu.

¹⁶ Caipish jatun mana allimi. Chaica cai pachaman ima shina shamushca shinallatac tigran. ¿Chashna yanga huaira aparichun trabajanaca imapactac alli?

¹⁷ Chaipac jahuapish paipac tucui causai punzhacunapimi llaquihuan, nanaihuan yallita imatapish ruhuashpa, pura tutapi shina micun.

¹⁸ Inti achicyachicuc cai pachapi llaquita trabajashcamantaca micushpa, ubiashpa, cushicushpa causana alli cactami ricurcani. Dios cushca tucui causai punzhacunapica chashna causana alli cactami ricurcani. Chaimi runa japinaca can.

¹⁹ Shinallatac Dios runaman ima charinacunata, ima allicunata cushpaca, chaillamantatac micushpa causachun, paipac cashcata japishpa cushicuchunmi munan. Trabajashcamanta Dios cushcaca chaimi can.

²⁰ Diosllatac paipac shungupi yallita cushichicpimi, paipac causai punzhacunataca mana yuyarin.