ECLESIASTÉS 4 - Dios Rimashcata Quillcashcami

¹ Tigrarishpa ricushpaca cai pachapi tucuita ruhuashpa, yallita llaquichicuctami ricurcani. Llaquihuan huacacucpipish pi mana cushichircachu. Poderta chariccunapish llaquichiccuna parte carca. Cushichiccunaca shucllapish mana tiyarcachu.

² Chaita ricushpami huañuccunaca causaccunata yalli alli cashcata yuyarcani.

³ Shina cacpipish, inti achicyachicuc cai pachapica manarac huacharishca cashpa, chai llaquicunata manarac ricuc gentecunami ashtahuan alli yuyarcani.

⁴ Shinallatac achcata trabajashpa tucui imatapish alli ruhuacpica, shuccunaca envidiashpa piñac cashcatapish ricurcanimi. Shinaca alli canapish, huairata caticushca shina yangallami.

⁵ Yuyai illac runaca, maquita cruzashpami tiyarin. Chaita ruhuashpaca paillatacmi llaquita apacun.

⁶ Llaquita trabajashpa, ishcai maquipi imata charinapac randica, ashallata trabajashpa, shuc maquillapi imata charinami ashtahuan alli.

⁷ Cutin tigrarishpa cai pachapi inti achicyachicta ricushpaca imapish yanga cashcatami ricurcani.

⁸ Maijan sapalla runaca ricsishcacunatapish, huahuacunatapish, huauquillatapish mana charinchu. Pai charishcata piman saquina mana tiyacpipish, manatac samarinchu. Mashnata charishpapish mana cushicunchu. Shinallatac: «¿Piman saquingapactac chashna mana samarishpa trabajacuni, imamantatac ñuca almataca yallita shaicuchini?» nishpapish mana tapurinchu. Chaipish yangallami. Shinallatac llashacta aparishca shina llaquimi.

⁹ Shuclla causanapac randica, ishcai tucushpa causanami ashtahuan alli. Ishcai cashpami trabajashpapish allita japincuna.

¹⁰ Shuc urmacpica, caishucmi jatarichin. Ashtahuanpish ¡aij shuclla causac runalla, paitaca pitac jatarichingayari!

¹¹ Camapi sueñushpapish ishcai cashpami cunurincuna. Ashtahuanpish shuclla cashpaca ¿pihuantac cunuringayari?

¹² Maijan macashpaca shucllataca mishai pudinmi, ishcai cashpaca mishacta mana saquinchu. Quimsamanta tursishca huascaca mana utca pitirinchu.

¹³ Yuyai illac, yuyac, imatapish mana entendic mandacpac randica, huaccha huambra cashpapish, yachac huambrami ashtahuan alli.

¹⁴ Pai carcelmanta llucshishca cashpapish, mana cashpaca huaccha cashpapish, jatun mandacmi tucurca.

¹⁵ Jatun mandacpac randi mandangapac yaicuc huambrataca llactapi causac tucui gentecuna jatun mandac cachun chasquictami ricurcani.

¹⁶ Paita chasquiccuna yallita achca cacpipish, paicunapac huahuacunaca ña mana munangacunachu. Jatun mandac canapish huairata caticushca shina yangallami.