ECLESIASTÉS 3 - Dios Rimashcata Quillcashcami

Tucui ruhuaipac punzha tiyashcamanta

¹ Cai pachapica tucui ruhuaipacmi punzha tiyan. Tucui ruhuaicunami quiquin horasta charin.

² Huacharingapacpish, huañungapacpish punzha tiyanmi. Tarpungapacpish, chai tarpushcata pilangapacpish punzha tiyanmi.

³ Huañuchingapacpish, jambingapacpish punzha tiyanmi. Tuñingapacpish, pircangapacpish punzha tiyanmi.

⁴ Huacangapacpish, asingapacpish punzha tiyanmi. Duelo cangapacpish, bailangapacpish punzha tiyanmi.

⁵ Rumicunata shic-huangapacpish, montonangapacpish punzha tiyanmi. Ucllangapacpish, mana ucllangapacpish punzha tiyanmi.

⁶ Mashcangapacpish, chingachingapacpish punzha tiyanmi. Huacaichingapacpish, shitangapacpish punzha tiyanmi.

⁷ Lliquingapacpish, sirangapacpish punzha tiyanmi. Upallangapacpish, rimaringapacpish punzha tiyanmi.

⁸ Cuyangapacpish, piñangapacpish punzha tiyanmi. Macanacungapacpish, alli tucungapacpish punzha tiyanmi.

⁹ Yallita shaicushpa trabajashcamantaca ¿imatatac japin?

¹⁰ Diosca huañuclla runacunaman ima ruhuanacunata cushpaca, chaicunata ruhuashpa causachun cushcatami ricuni.

¹¹ Diosca tucui imatapish ruhuana punzhallapitacmi sumacta ruhuashca. Shinallatac cai pachapi causaccunapac shungupica huiñaita causachunmi churarca. Shina cacpipish, gentecunaca callarimanta tucuricaman Dios imata ruhuashcataca mana entendinchu.

¹² Ñucaca runa causashcacamanca cushicushpa, sumacta causana ashtahuan alli cashcatami ricuni.

¹³ Shinallatac tucui runacuna imata ruhuashcamantaca micushpa, ubiashpa, cushicushpa causachun Dios cushcatami yachani.

¹⁴ Tucuita Dios ruhuashcaca huiñaipac cashcatami yachani. Pai ruhuashcacunataca imata mana yapachina, imata mana anchuchinachu. Diosca, gentecuna paipac ñaupapi manchachunmi ruhuashca.

¹⁵ Tucui imapish ñaupaman tiyashcallatacmi tiyan. Quipaman ima tiyana cashcapish ña tiyashcallatacmi. Diosca utcaman tiyashcatami cutichimucun.

Allita ruhuanapac randica mana allita ruhuashcacuna tiyashcamanta

¹⁶ Shinallatac inti achicyachicuc cai pachapi, allita ruhuanapac randica, millaita ruhuac cashcatami ricuni. Cashcata ruhuanapac randica, mana allita ruhuac cashcatami ricuni.

¹⁷ Chaimantami ñuca shungupica: «Tucui imata ruhuashcata ricungapacpish punzhaca tiyanmi. Cashcata ruhuactapish, paita mana manchactapish Diosmi taripanga» nircani.

¹⁸ Chaimantami runacunamanta ñuca shungupica: «Paicunallatac animalcuna shina cashcata yuyarichunmi Diosca chashna ruhuashpa ricucun» nishpa yuyarcani.

¹⁹ Chaica gentecunapish, animalcunapish chai shinallatacmi tucurincuna. Gentecunapish, animalcunapish huañunmi. Causaita cuc samaitapish tucuimi charin. Ima shina causashcapish yangallami. Chashna cashcamanta gentecunaca mana animalcunamanta yallichu.

²⁰ Tucuimi chai pushtullamantac rincuna. Animalcunapish, gentecunapish allpamantami ruhuashca. Chaimantami allpallatac tucuncuna.

²¹ ¿Pitac gentecunapac alma jahua pachaman ric cashcata, animalcunapac samaica allpa ucuman ric cashcata yachanyari?

²² Cai pachapi causaccuna huañushca quipa ima tucuna cashcataca pi mana huillai pudinchu. Chashna cashcamantaca quiquin trabajomanta alli cushicushpa causanami alli. Ñucanchicpac caipica chailla tiyashcatami ricuni.