ECLESIASTÉS 2 - Dios Rimashcata Quillcashcami

Cushicunaca yangalla cashcamanta

¹ Ñuca shungupica: «Cunanca allita causangapacca cushicushpa ricusha» nircani. Ashtahuanpish caicunapish yangallami carca.

² Chaimantami asictaca: «¡Locomi cangui!» nircani. Shinallatac cushicuctaca: «¿Caica imapactac servinyari?» nircani.

³ Ñuca yuyaipi allita entendishpapish ñuca cuerpotaca vinota ubiashpami cushichisha nircani. Chashnami huañuclla runa causacuc tucui punzhacunapi paiman ima alli cashcata, imata ruhuana cashcata yachanata munarcani.

⁴ Ñucaca jatun ruhuaicunatami ruhuachircani. Huasicunatapish shayachircani. Uvas chagracunatapish tarpurcani.

⁵ Huertacunatapish, jardincunatapish ruhuarcani. Granota pucuc yuracunatapish tarpurcani.

⁶ Huiñac yuracunata parcungapacpish yacu huacaichina tanquecunatami ruhuarcani.

⁷ Servic caricunatapish, huarmicunatapish randircani. Ñuca huasipi huacharishca serviccunatapish charircani. Shinallatac Jerusalenpi punta causaccunata yallimi vacacunatapish, ovejacunatapish charircani.

⁸ Curitapish, cullquitapish, jatun mandac charinacunatapish achcatami tandachircani. Cantac caricunatapish, huarmicunatapish, tocanacunatapish tucuitami charircani. Chashnami ñucaca gentecuna cushicuna cashca shina, yallita cushicushpa, huarmicunata catipi charircani.

⁹ Ñucaca Jerusalenpi punta causaccunataca yalli charicmi carcani. Tucuipac alli alli nishcami carcani. Yachaipish ñucamantaca mana anchurircachu.

¹⁰ Ñuca shunguca tucuita ruhuashcahuanmi cushicurca. Chaimantami ñuca ñahui imata munashcata ruhuarcani. Ima shina cushicunata munashpaca chashnatacmi cushicurcani. Chaicunataca ñuca shunguhuan ruhuashpatacmi yallita cushicurcani.

¹¹ Chashna cushicushca quipami achca shaicuihuan ñuca maqui imallata ruhuashcacuna imapac cashcata alli yuyarircani. Chashna yuyarishpami tucui chaicunaca yangalla cashcata, shinallatac huairata caticushca shina cashcata yacharcani. Chashna cashcamantaca inti achicyachicuc cai pachapica imapish yangallami.

Gentecuna ruhuashcaca yangalla cashcamanta

¹² Chai quipaca alli yachaitapish, loco shina canatapish, yuyai illac canatapish cutinmi yuyarircani. Quipa jatun mandacca ña ruhuashcamanta ashtahuan mushuctaca ¿imatatac ruhuai pudingayari? nishpami yuyarcani.

¹³ Chashna alli yuyarishpami achicca tutata achicyachic shinallatac, yuyai illactaca alli yachai atic cashcata yacharcani.

¹⁴ Alli yachac runaca allita ricushpami purin. Ashtahuanpish mana entendic runaca purapi shinami purin. Shina cacpipish tucuripica tucuimi chashnallatac tucuna cashcatami entendircani.

¹⁵ Chaimantami ñuca shungupica: «Mana entendic runa ima shinami tucugrin, shinallatacmi ñucapish tucusha. Shina cashpaca, ¿imapactac ashtahuan yachacurcani?» nircani. Chaita yuyarishpami ñuca shungupica: «Caicunapish yangallami» nircani.

¹⁶ Yachac runapish, mana entendic runapish huañungallatacmi. Yachac runatapish, mana entendic runatapish asha huatacuna quipaca pi mana yuyaringachu.

¹⁷ Inti achicyachicuc cai pachapi tucui imalla ruhuashcaca umata nanachinmi. Chaimantami ñuca causaitapish mana ricunayachini. Tucui chaicunata alli yuyaricpica, huairata caticuc shinami yangalla.

¹⁸ Shinallatac inti achicyachicuc cai pachapi tucui imatapish ruhuashcataca piñarcanimi. Chaicunataca ñucapac quipa mandaccunami japina carca cani.

¹⁹ Chai mandac alli yachac cactapish, mana cashpaca yuyai illac cactapish, ¿pitac yachan? Shina cashpapish alli yachaihuan inti achicyachicuc cai pachapi imatapish yallita ñuca ruhuashcataca japingami. Chaicunapish yangallami.

²⁰ Inti achicyachicuc cai pachapi imata yallita ruhuashcapish, yanga cashcata yuyarishpami, ñuca shungu upayarca.

²¹ Chaica shuc alli yuyaihuan allita ricushpa, alli yachaihuan ruhuashcataca manapish imata trabajac runami japin. Chaica yangallami, shinallatac jatun mana allimi.

²² Chai runa inti achicyachicuc cai pachapi uma nanaihuan paipac shungupi shaicucta imatapish ruhuashcamantaca, ¿imatatac japin?

²³ Tucui paipac causai punzhami llaquillata, mana allillata apan. Imata ruhuashcapish paillatatacmi llaquichin. Paipac yuyaica tutapish mana samarinchu. Chaipish yangallami.

²⁴ Runamanca micuna, ubiana shinallatac paipac trabajomanta paipac shungu munashcata ruhuashpa cushicunami ashtahuan alli. Chashna cushicunatapish, Diosllatac cuc cashcatami ricurcani.

²⁵ Mana paihuan cashpaca, ¿pitac yallita micunyari? ¿Pitac cushicunyari?

²⁶ Diosca, paipac ñaupapi alli causac runallamanmi alli yuyaita, alli yachaita, cushicuita cun. Ashtahuanpish juchayuc runamanca charishca jahuapish, ashtahuan tandachichunmi cun. Chai huacaichishcacunataca Diospac ñaupapi alli causac runaman cungapacmi chashnaca cun. Chaicunapish huairata caticuc shina yangallami.