ECLESIASTÉS 12 - Dios Rimashcata Quillcashcami

¹ Huambrarac cai punzhacunaca canta ruhuac Diosta yuyaringui. Manarac llaqui punzhacuna chayamucpi yuyaringui. Chai huatacuna chayacpica: «Cai causaipica mana cushicui tiyanchu» ninguimi.

² Chaimanta intipish, quillapish, lucerocunapish amarac amsayacpi, tamyashca quipa puyu mana achicyaricpi Diosta yuyaringui.

³ Huasita cuidaccunapish chucchungami. Sinchi runacunapish cumiringami. Quirucunapish paquirishpa ashallayashpa mana cashtungachu. Ventanacunamanta ricuccunapish amsatami ricunga.

⁴ Ñanman llucshina pungucunapish huichcaringami. Cutana rumipish upallayashpami catinga. Zhutacuna cantashcata uyacpica, allilla cantashcami uyaringa.

⁵ Huichaiman rinapish manchanami ricuringa. Ñanpica manchaillami tiyanga. Almendro yurapish sisangami. Langosta curucunapish jundangami. Micuna munaipish mana tiyangachu. Huiñaita causana huasiman ricucpica, duelota ruhuac runacunaca huacashpami plazata muyungacuna.

⁶ Cullqui cadena manarac pitiricpi, curi plato manarac paquiricpi, yacu jundu cuchupi puñu manarac paquiricpi, yacu jundumanta yacu aisana manarac pitirishpa ucuman urmacpi, canta ruhuac Diosta yuyaringui.

⁷ Cashna tucucpica allpamanta ruhuashca cuerpoca allpallamantacmi cutinga. Cutin almaca paita ruhuac Diospacmanmi cutinga.

⁸ Huillac runaca: «Imapish yangallami cashca. Tucui imapish yangallatami» nirca.

Runacuna imata ruhuana cashcamanta

⁹ Huillac runaca ashtahuan yachacushpaca ashtahuanmi gentecunata yachachirca. Shinallatac allita uyashpa ima shina cashcata ricushpami tauca yuyachic rimaicunata quillcarca.

¹⁰ Huillac runaca sumac rimaicunata tarishpa, mana llullac rimaicunata allita quillcanatami munarca.

¹¹ Jatun yachaccuna allichishca rimaicunaca puntasapa fierro shinami. Yuyaicunata tandachishpa quillcashca rimaicunaca allita clavashca clavocuna shinami. Chai shimicunataca shuc michicmi curca.

¹² Ñuca huahualla, cai yuyaicunatami canmanca cuni. Librocunata ruhuanaca mana tucuringachu. Shinallatac yallita yachacushpa caticpica, cuerpoca shaicunmi.

¹³ Cai tucui yachachishca uyashca quipaca, ña tucuchingapacca tucurina rimaicunatami nini. Diosta manchangui. Pai mandashcacunata pactachingui. Tucui caicunatami runacunaca ruhuana can.

¹⁴ Chaica Diosmi ñucanchic tucui ima ruhuashcataca ricunga. Imata pacalla ruhuashcatapish alli cachun mana alli cachunpish ricuchingami.