ECLESIASTÉS 11 - Dios Rimashcata Quillcashcami

¹ Cambac tandata yacupi cachai. Achca punzhacuna quipami cutin japingui.

² Llactaman ima llaqui shamunataca mana yachanguichu. Canchismanpish, mana cashpaca pusacmanpish carailla.

³ Puyupi yacu junda cashpaca allpamanmi talliringa. Yuraca ura ladoman tigrashpa, mana cashpaca jahua ladoman urmashpapish chaillapitacmi saquirin.

⁴ Huairata ricuc runaca mana tarpungachu. Puyuta ricurac runaca mana cosechangachu.

⁵ Huarmipac huicsapi tiyacuc huahuapac tulluman huaira yaicuctapish, maita yaicuctapish mana yachanguichu. Chashnallatacmi tucuita ruhuac Dios tucui caicunata ima shina ruhuashcataca mana yachangui.

⁶ Tutamanta muyuta tarpushpaca, chishipish tarpunguilla, ama samaringuichu. Punta tarpushca, mana cashpaca quipa tarpushca, mana cashpaca ishcaita alli canataca mana yachanguichu.

⁷ Achic punzhaca sumacmi, achiclla intita ñahuihuan ricunaca allimi.

⁸ Maijan unai huatata cushicushpa causashpaca, pura tutapi ashtahuan unai huatacunata causana cashcatami yuyarina can. Quipaman ima tucugricucca yangallami canga.

Quipa huiñaicunata cunashcamanta

⁹ Quipa huiñaicuna, huambrarac cashpa cushicuichic. Huambrarac cashpa cambac shungu cushicuchun saquingui. Cambac shungu munashcata, cambac ñahui ricushcata ruhuailla. Shina cacpipish, tucui chaicunata Dios taripana cashcataca yachanami cangui.

¹⁰ Cambac shungumantaca piñarina yuyaita, cambac cuerpomantaca ima mana allita ruhuana yuyaita anchuchi. Huambrarac cashpa cushicunaca yangallami.