ECLESIASTÉS 10 - Dios Rimashcata Quillcashcami

Alli yachaica tucuipac alli cashcamanta

¹ Huañushca chuspicunaca ashnanmi mishquilla ashnacuc jambitapish ashnachinmi. Chashnami yuyaisapa, alli nishca runa ashata pandarishpaca, yallita mana alli ricurin.

² Yuyaisapa runapac shunguca allillatami mashcan. Mana entendic runapac shunguca mana allillatami mashcan.

³ Mana entendic runa ñanta ricushpapish mana entendic cashcatami paillatac ricuchin. Chashnami mana entendic cashcataca tucuiman nin.

⁴ Mandac yallita canta piñacpipish, can imata ruhuacushcataca ama saquinguichu. Alli shungu runaca yallita piñarishcatapish parachinmi.

⁵ Cai pachapica shuc pandai tiyactami ricurcani. Chaica mandacllatac pandata ruhuashpa callaricuc shinami ricurin.

⁶ Mana entendic runacunami ashtahuan alli tiyarinapi tiyacun. Ashtahuanpish chariccunaca yangalla tiyanapimi tiyacun.

⁷ Serviccunaca caballopimi ricurca. Ashtahuanpish mandaccunaca chaquillahuan puricuctami ricurcani.

⁸ Jutcuta ruhuacca chai jutcullapitacmi urmanga. Pircata urmachictaca culebrami caninga.

⁹ Rumita paquicca rumihuanmi chugriringa. Yantata chictacca yantahuanmi nanaringa.

¹⁰ Hacha filo illacpi, mana mulashpaca ashtahuanmi fuerzata ruhuan. Ashtahuanpish alli yachaica alli ruhuanatami yachachin.

¹¹ Manarac upayachishca culebra canicpica, upayachicca mana imapac valinchu.

¹² Yuyaisapa runa rimashcaca sumacmi. Ashtahuanpish mana entendic runa rimashcaca paillatatacmi llaquichin.

¹³ Pai rimari callarishpaca mana entendipactami rimarin. Tucuchinamanca yalli mana allicunata rimashpami tucuchin.

¹⁴ Quipaman ima tucunata pipish mana yachanchu. Shina cacpipish mana entendic runaca yallita rimacunllami. Paipac quipa ima tucunataca ¿pitac huillangayari?

¹⁵ Mana entendic runaca yallita shaicushpami trabajan. Puebloman rina ñantapish mana yachanchu.

¹⁶ Huambrarac jatun mandac mandacuc llactalla, ¡aij imachari tucungui! Chaipi mandaccuna tutamanta pacha, jatun micui ruhuashpa, fiestata ruhuaccunalla, ¡aij imachari tucunga!

¹⁷ Alli nishcacunapac churi jatun mandac mandacuc llactalla, ¡yallita cushicuiyari! Chai mandaccunaca machanapac randica, ashtahuan sinchi cangapacmi micuna horaspi micuncuna.

¹⁸ Quilla runa cacpimi, huasi tejacunaca urman. Maqui cruzashca cacpimi, huasipipish shutun.

¹⁹ Cushicungapacmi jatun micuitaca ruhuana. Vinopish cushilla cangapacmi can. Cullquica tucuita ruhuashpa cushicungapacmi can.

²⁰ Jatun mandactaca yuyaillapipish ama maldiciaichu. Charic runatapish pacalla sueñuna ucupi ama maldiciaichu. Huirata ric alasyuc animalcunami chai rimashcata apashpa huillagringacuna.