ECLESIASTÉS 1 - Dios Rimashcata Quillcashcami

Tucui imapish yangalla cashcamanta

¹ Jerusalén pueblota mandac Davidpac churi huillacca:

² «Tucui imapish yangallami. Ima cashpapish tucuimi yangallata» nirca.

³ Inti achicyachicuc cai pachapi causaccunaca mana samarishpa, imatapish sinchita trabajashpaca ¿ima allitatac japincuna?

⁴ Huahua huahuacunaca huañunmi. Shuctac huahua huahuacunaca huacharinmi. Ashtahuanpish allpaca chashnallatacmi can.

⁵ Intica llucshinmi, cutin tigranmi. Pai maipi cashcaman cutinmi. Chaimanta cutin llucshinmi.

⁶ Huairaca ura ladoman pucushpami, jahua ladoman muyun. Cutinpish cutinpish, chaillatatac muyushpami, pai maipi cashcallamantac tigran.

⁷ Tucui yacucunami mama cuchaman rin. Ashtahuanpish mama cuchaca mana jundanchu. Chai yacucunaca llucshimushcallatatac cutishpami chaillamanta cutin callpan.

⁸ Ima ruhuaipish shaicuchinmi. Tucui chaicunamantaca pipish mana allita huillanchu. Ñahuica ricunata, Ringrica uyanata mana shaicunchu.

⁹ Ñaupaman imami tiyarca, chaillatacmi quipamanpish tiyanga. Ñaupaman ima ruhuarishcaca, chaillatacmi quipamanpish ruhuaringa. Cai pachapica ima mushucca mana tiyanchu.

¹⁰ Imapish: «Riqui, caica mushucmi» ninaca mana tiyanchu. Tucui imapish ñucanchic manarac tiyacpimi, utcaman ña tiyashca.

¹¹ Ñaupaman ima tiyashcataca cungarishcami can. Quipaman ima tiyacpipish, cungarishcami canga. Quipaman ima tiyacpipish cungaringacunami.

Huillacpac yuyaicunamanta

¹² Ñucaca huillacmi cani. Jerusalén pueblopimi Israel llactata mandarcani.

¹³ Ñucaca cai pachapi imata ruhuashcata allita entendingapacca tucui yuyaihuan callarishpami ricurcani. Dios cai pachapi causaccunaman cushca ruhuanacunaca yallita sinchimi.

¹⁴ Cai pachapi causaccuna imata ruhuashcataca tucuimi ricurcani. Riqui chaicunaca yangallami. Chaicunaca huairata caticuc shinallami.

¹⁵ Huishtuyashcataca mana derechai pudipacmi. Imapish illashcataca mana pactachi pudipacchu.

¹⁶ Chaimantami ñuca shungupica: «Jerusalenpi ñaupa causac tucui mandaccunata yalli yachac, shinallatac tucuipac jatunyachishcami cani. Ñucaca achcata yachac alli yuyaiyucmi cani» nircani.

¹⁷ Tucui shunguhuanmi allita yachanatapish, allita entendinatapish, yuyai illac canatapish, imapish yangata ruhuac canatapish utca yachacurcani. Tucui chai yachashcacunaca, yuyaita yanga shaicuc shinalla cashcatami ricurcani.

¹⁸ Chaica, yallita yachac cacpica, uma nanaimi shamun. Maijanpish ashtahuan yachacushpaca, llaquitami mirachin.