DEUTERONOMIO 9 - Dios Rimashcata Quillcashcami

Mandac Dios Canaán llactacunata tucuchinamanta

¹ ¡Israelcuna uyaichic! Cunanmi Jordán yacuta pasashpa, cancunata yalli achca, sinchi gentecunamanta allpata quichushpa, llucchishpa cachagringuichic. Muyundita alto pircashca llactacunatapish quichunguichicmi.

² Chai llactacunapica Anacpac churi manchaipac jatun gentecunami causan. Paicunamanta maijancuna: “Anacpac churicunahuanca, ¿pitac macanacungapac shayari pudingayari?” nishcataca cancunallatacmi uyashcanguichic.

³ Cunanmi Mandac Dios cancunapac ñaupata tucuita rupachic nina shina ringa. Chai llactapi causaccunata cumurichingami. Paicunataca Mandac Dios nishca shinami, utca tucuchinguichic.

⁴ Mandac Dios cancunapac ñaupamanta catishpa cachacpica, pacta cancunaca: “Ñucanchic allita ruhuashcamantami Mandac Diosca cai llactata cungapac pushamushca” yuyanguichicman. Ashtahuanpish chai llactapi causaccuna mana allita ruhuashcamantami Mandac Diosca llucchishpa cacharca.

⁵ Mana cancuna cashcata ruhuac, shungupi allita yuyac cashcamantachu cai llactata japigringuichic, ashtahuanpish chai llactapi causaccuna mana allita ruhuashcamantami llucchishpa cacharca. Mandac Dios cancunapac ñaupa taita Abrahamman, Isaacman, Jacoboman cungapac ari nishcata pactachingapacmi chashnaca ruhuagrin.

⁶ Mandac Diosca, mana cancuna alli cashcamantachu, cai sumac llactataca cun. Ashtahuanpish cancunaca sinchi shungumi canguichic. Chaitaca yachanami canguichic.

Curi becita ruhuashcamanta

⁷ Shitashca pambapi cashpa, Mandac Diosta piñachishcataca yuyarichicyari. Ama cungaringuichicchu. Egipto llactamanta llucshishcamanta caiman chayamungacamanmi Mandac Diostaca llaquichircanguichic.

⁸ Horeb urcupica Mandac Diosta yallitami piñachircanguichic. Chaimantami Mandac Diosca cancunahuan piñarishpa llaquichirca.

⁹ Mandac Dios cancunahuan ari nishca tabla rumita urcumanta apamungapac rishpaca, chuscu chunga punzha, chuscu chunga tutatami mana micushca, yacuta mana ubiashca carcani.

¹⁰ Chaipimi Mandac Diosca paipac dedohuan quillcashca ishcai tabla rumita curca. Chaipica Mandac Dios urcupi, nina rupacuc chaupimanta rimashcata quillcashcami carca. Chai punzhapica cancunapish tandanacushpami chaipi carcanguichic.

¹¹ Chuscu chunga punzha, chuscu chunga tuta tucucpica, Mandac Diosca cancunahuan ari nishcata quillcashca ishcai tabla rumita curcami.

¹² Chaita cushpami Mandac Diosca: “Jatari, caimanta utca urai ri. Egiptomanta can llucchimushca tucui gentecunami mana allita ruhuacun. Ñuca mandashcacunata saquishpami curita yacuyachishpa shuc diosta ruhuancun” nirca.

¹³ Mandac Diosca ñucataca: “Cai gentecunataca sinchi shungu cashcatami ricuni.

¹⁴ Paicunata tucuchishpa, cai pachamanta paicunapac shutita chingachingapac saquilla. Ashtahuanpish canmantaca paicunamanta yalli achca gentecunatami ruhuasha” nirca.

¹⁵ Chai rupacuc urcumantaca cancunahuan ari nishca quillcashca ishcai rumita maquipi apashpami cutircani.

¹⁶ Chashna cutimushpaca, Mandac Diosta piñachishpa juchallishcatami ricurcani. Mandac Dios mandashcacunata utca saquishpami, curita nuyuchishpa, beci diosta ruhuashca carcanguichic.

¹⁷ Chaimantami ñuca apamushca rumicunataca pambapi shitashpa, cancunapac ñaupapi polvorcani.

¹⁸ Chai quipaca cancuna Mandac Diosta piñachingacaman paipac ñaupapi mana allita ruhuashpa, juchallishcanmantami utcapi shina, chuscu chunga punzhata, chuscu chunga tutata mana micushpa, mana yacuta ubiashpa, Mandac Diospac ñaupapi cumurircani.

¹⁹ Mandac Dios cancunahuan yallita piñarishpa, cancunata tucuchigricucpimi, ñucaca yallita manchaihuan carcani. Shina cacpipish, Mandac Diosca cutinllatacmi ñuca mañashcata uyarca.

²⁰ Shinallatac Aaronhuanpish Mandac Diosca yallita piñarishpami, paitapish tucuchigrirca. Paimantapish chai punzhapica mañarcanimi.

²¹ Ashtahuanpish cancunata pandachic beci diosta ninapi rupachishpa, ñututa ruhuashpami urcumanta shamuc yacu huaicupi shitarcani.

²² Tabera, Masá, shinallatac Quibrot-hataaval llactacunapipish yallitami Mandac Diostaca piñachircanguichic.

²³ Mandac Dios Cades-barneamanta cancunata cachashpaca: “Huichaiman rishpa, ñuca cushca llactata japigrichic” nicpipish, pai mandashcata mana cazurcanguichicchu. Chashnami cancunaca paita mana crishpa, pai nishcata mana uyarcanguichic.

²⁴ Ñuca ricsishca punzhamanta pachami Mandac Diosta piñachircanguichic.

²⁵ Mandac Dios cancunata tucuchisha nicpimi, chuscu chunga punzha, chuscu chunga tutata Mandac Diospac ñaupapi cumurircani.

²⁶ Chashna cumurishpa paita mañashpaca: “Mandac Dioslla, ama cambac gentecunataca tucuchichu. Can jatun cashcamantami paicunataca cambac poderhuan Egiptomanta llucchimurcangui.

²⁷ Canta servic Abrahamta, Isaacta, Jacobota yuyariyari. Cai gentecunapac sinchi shungutapish, canta mana cazushpa juchata ruhuashcatapish ama ricuichuyari” nirca.

²⁸ Egipto llactapi causac gentecunaca: “Mandac Diosca pai cusha nishca llactaman mana yaicuchi pudishcachu, ashtahuanpish paicunataca shitashca pambapi huañuchingapacmi caimanta llucchishpa rishca” ningacunami.

²⁹ Can Egipto llactamanta cambac poderhuan llucchimushca gentecunaca cambaclla chicanyachishca gentecunamari.