DEUTERONOMIO 8 - Dios Rimashcata Quillcashcami

Mandac Diosta mana cungarinamanta

¹ Mandac Dios ñaupa taitacunaman cungapac ari nishca llactaman yaicushpa, achca tucushpa causangapacca cunan cancunaman mandashcacunata alli yuyarashpa cazunguichic.

² Mandac Dios chuscu chunga huatata shitashca pambata apamushcata yuyaringuichic. Chaitaca cancuna imata yuyac cashcata, mandashcata cazucta, mana cazuc cashcata ricungapacmi ruhuarca.

³ Paica chai pambapica yarcaihuanmi llaquichirca. Chaipimi cancunapish, cancunapac taitacunapish jaicapi mana ricsishca maná shuti micunata cararca. Chaitaca runacunaca mana micunallahuan, ashtahuanpish Mandac Diospac rimashca shimicunahuan causana cashcata ricuchingapacmi ruhuarca.

⁴ Cancuna chuscu chunga huatata puricucpica, churanapish mana maucayarcachu. Chaquipish mana punguircachu.

⁵ Shuc taita paipac huahuata cunac shina, canta Mandac Dios cunac cashcataca yuyaringuichic.

⁶ Mandac Dios mandashcata cazushpa, pai munashca shina paipac ñaupapi, paita manchanguichic.

⁷ Mandac Diosca sumac yacu caita chaita callpacuc, allpa ucutapish yacu callpacuc, pambacunapish, urcucunapish yacu llucshicuc llactatami cancunamanca cunga.

⁸ Trigopish, cebadapish, uvaspish, higopish, granopish tiyac, sumac aceiteta cuc olivospish tiyac, sumac mishquicunapish tiyac llactatami cunga.

⁹ Chai llactapica mana ashallatachu micunguichic. Chaipica imapish mana illangachu. Chai llacta rumimantaca fierromi llucchicunga. Urcucunamantaca cobretami llucchinguichic.

¹⁰ Cancunaca mana nictami micunguichic. Sumac llactata cushcamantami Mandac Diostaca, allimari cangui ninguichic.

Diosta mana cungarina cashcamanta

¹¹ Cunan ñuca mandashcacunatapish, pactachinacunatapish, yachachishcacunatapish mana cazushpa, pacta canta Mandac Diosta cungaringuichicman.

¹² Mana nicta micushpa, sumac huasicunata ruhuashpa,

¹³ vacacunapish, ovejacunapish achca miracpi, curitapish, cullquitapish, tucui imatapish achcata charishpa, pacta cungaringuichicman.

¹⁴ Shungupi jatun tucushpa, Mandac Diosta pacta cungaringuichicman. Paimi Egipto llactapi huatashca shina causacucmanta llucchirca.

¹⁵ Paimi huañuchic culebracuna, alacrancuna tiyac, maipipish mana yacu tiyac, shitashca pambata pushamurca. Yacunayachicpipish, paimi sinchi rumimanta yacuta llucchirca.

¹⁶ Shinallatac cancunapac taitacuna mana ricsishca maná shuti micunatami cararca. Cancuna ima shina cashcata ricungapac, cancunapac allipacllatami llaquichirca.

¹⁷ Chaimanta pacta cancunapac shungupi: “Ñucanchic sinchi cashcamanta, ñucanchic sinchi maquimantami caicunataca charinchic” ninguichicman.

¹⁸ Chaipac randica Mandac Diosta yuyaringuichic. Paimi cunan shina, cancunapac ñaupa taitacunahuan ari nishcata pactachingapac imatapish achcata charichun, fuerzata cancunamanca curca.

¹⁹ Ashtahuanpish canta Mandac Diosta cungarishpa, shuctac dioscunata catishpa paicunapac ñaupapi cumurishpa, adorashpaca, tucuimi tucuringuichic nishpami huillani.

²⁰ Mandac Diosca cancunapac ñaupapimi shuctac llactacunataca tucuchinga. Mandac Dios rimashcata cancuna mana cazucpica, chashnallatacmi cancunatapish tucuchinga.