DEUTERONOMIO 7 - Dios Rimashcata Quillcashcami

Ruhuashcalla dioscunata ama adorachun nishcamanta

¹ Cancuna japina llactaman Mandac Dios pushacpica, cancunata yalli sinchi canchis llactacunamanta heteocunata, gergeseocunata, amorreocunata, cananeocunata, ferezeocunata, heveocunata, jebuseocunata llucchishpa cachanguichicmi.

² Mandac Dios chai llactapi causaccunata cancunapac maquipi churacpimi, tucuita tucuchinguichic. Paicunahuan ama ari ninacunguichicchu, paicunata ama llaquinguichicchu.

³ Paicunahuan churita, ushita cazarachishpa, ama familia tucunguichicchu.

⁴ Cancunapac churicunaca ñucata catinata saquishpami shuctac dioscunata servi callaringa. Chashna cacpica, Mandac Dios cancunahuan nina japiric shina piñarishpami utca tucuchinga.

⁵ Paicunataca cashnami ruhuana canguichic: Paicunapac altarcunata tigrachishpa, ruhuashcalla dioscunata yuyarina rumicunatapish polvonguichic. Asera huarmi diosta yuyarina yuracunatapish tigrachishpa, labrashpa ruhuashca dioscunatapish tucui rupachinguichic.

⁶ Cancunaca Mandac Diospaclla chicanyachishcami canguichic. Mandac Diosca tucui cai pachapi causaccunamanta ashtahuan alli gentecuna cachunmi acllarca.

Diosta cazuccuna allicunata japinamanta

⁷ Mandac Diosca mana shuctac llactacunamanta ashtahuan achca cashcamantachu acllarca. Ashtahuanpish cancunaca shuctac llactacunamanta ashtahuan uchillami canguichic.

⁸ Ashtahuanpish Mandac Diosca pai cuyac cashcamanta, cancunapac taitacunahuan ari nishcata mana cungarishcamantami cancuna Egipto llactapi Faraonpac maquipi huatashca shina servicucmanta paipac poderhuan llucchirca.

⁹ Mandac Diosca paita cuyaccunatapish, pai mandashcacunata cazuccunatapish cuyac, pai ari nishcata pactachic, shinallatac cashcata ruhuac Diosmi. Chaitaca yachaichicyari.

¹⁰ Shina cashpapish, paita piñaccunataca mana unayashpa llaquichicmi. Paita llaquichiccunataca paicuna llaquichishca shinallatacmi llaquichin.

¹¹ Chaimanta mandashcacunatapish, pactachinacunatapish, yachachishcacunatapish yuyarashpa cazunguichic.

Cazuccuna allicunata japic cashcamanta

¹² Cancuna cai mandashcacunata yuyarashpa cazucpimi, Mandac Diosca cuyashpa, cancunapac taitacunahuan ari nishcataca pactachinga.

¹³ Paica cuyangami, bendiciangami, achcata mirachingami. Cancunapac taitacunaman cushami nishca llactapica huahuacunatapish, allpapi pucushcatapish, granotapish, punta vinotapish, aceitetapish, vacacuna mirashcatapish, ovejacunatapish bendiciangami.

¹⁴ Tucui llactacunamanta yallimi bendiciashca canguichic. Cancunapurapica yarcaipish mana tiyangachu. Mana huachac huarmipish, mana huachac animalpish mana tiyangachu.

¹⁵ Mandac Diosca cancunamantaca nanaicunatapish, Egipto llactapi cancuna ricushca, manchana ungüicunatapish anchuchingami. Chai ungüicunaca cancunataca mana japingachu, ashtahuanpish cancunata mana ricunayachic gentecunatami japinga.

¹⁶ Mandac Dios shuctac llactapi causaccunata cancunapac maquipi churacpica, mana llaquishpa tucuchinguichic. Paicunapac dioscunaca mitcachic shinami pandachinga. Chaimanta ama chaicunataca adoranguichicchu.

¹⁷ Cancunapac shungupica: “Cai llactapi causaccunaca ñucanchicta yalli achcami. ¿Ima shinatac llucchishpa cachashunyari?” ninguichicmi.

¹⁸ Paicunataca ama manchaichicchu. Mandac Dios Egipto llactapi tucui imata ruhuashcata, Faraonta imata ruhuashcata yuyarichic.

¹⁹ Mandac Dios cancunapac ñaupapi jatun ricuchinacunatapish, jatun milagrocunatapish, pi mana ruhuaipaccunatapish ruhuashpa, paipac poderhuan Egiptomanta llucchimushcataca cancunapac ñahuihuanmi ricurcanguichic. Chashnallatacmi cancuna manchana llactacunatapish ruhuanga.

²⁰ Mandac Diosca avispacunata cachashpami, maipi miticushca gentecuna chingaringacaman tucuchinga.

²¹ Mandac Diosca cancunapac chaupipimi. Chaimanta ama paicunataca manchaichicchu. Paica jatun manchana Diosmi.

²² Chai llactapi causaccunataca allimantami cancunapac ñaupamantaca Mandac Diosca llucchishpa cachanga. Sacha animalcuna mirashpa, cancunata ama llaquichichunmi, mana utca tucuchinga.

²³ Mandac Diosmi paicunataca cancunapac maquipi churanga. Chashna ruhuashpami, tucuita tucuchingacaman jatun llaquicunata churashpa catinga.

²⁴ Jatun mandaccunatapish cancunapac maquipimi churanga. Cancuna paicunata tucuchicpimi, cai pachapica paicunapac shuticunatapish mana pi tapunga. Tucuita tucuchingacaman pi mana atingachu.

²⁵ Paicunapac ruhuashca dioscunataca ninapi rupachinguichic. Chai dioscunapi cahuishca curita, cullquita munashpapish ama japinguichicchu. Chaicunata japishpaca, mitcaric shinami pandaringuichic. Mandac Diosca chai dioscunata ruhuaccunataca millashpami mana ricunayachin.

²⁶ Cancunapish paicunahuan pacta mana tucuchishca cangapacca ama millanacunata cancunapac huasipi yaicuchinguichicchu. Chaicunataca Dios tucuchishpa, chingachina cashcamantaca millashpa, ama ricunguichicchu.