DEUTERONOMIO 4 - Dios Rimashcata Quillcashcami

Mandac Diosta cazuchun mandashcamanta

¹ Cunanca israelcuna, ñaupa taitacunata Mandac Dios cushca llactaman yaicushpa causangapacca cai mandashcacunatapish, yachachishcacunatapish, imata ruhuachun yachachishcatapish alli uyaichic.

² Cai ñuca mandashcacunataca ama yapachinguichicchu, ama anchuchinguichicchu. Ñuca yachachishca, Mandac Dios mandashcacunataca cazushpa causanguichic.

³ Mandac Dios Baal-peor diosta mañaccunata imata ruhuashcataca quiquin ñahuihuanmi ricurcanguichic. Mandac Diosca Baal-peor diosta caticcunataca cancunapac chaupimi tucuchirca.

⁴ Ashtahuanpish cancunaca, Mandac Diosta tucui shunguhuan catishcamantaca causacunguichicmi.

⁵ Riquichic, ñucata Mandac Dios mandashca shinami mandashcacunatapish, yachachishcacunatapish cazuchun yachachini. Cancunaman cushca llactaman yaicushpa, pactachishpa causachunmi yachachircani.

⁶ Cai mandashcacunata cazunguichic. Chashna cazushpa causashpami cancunaca alli yuyaiyuccuna, alli yachaccuna canguichic. Chashna cacpimi, cai pachapi causaccunaca: “¡Cai gentecunaca alli yachac, alli yuyaiyuccunami!” ninga.

⁷ Ñucanchicta Mandac Diosca ñucanchic mañashcata uyangapac ñucanchic ladopimi. ¿Maijan shuctac llactatac ñucanchic Dios shina, mañashcata uyac diosta charingayari?

⁸ ¿Maijan jatun llactatac cashna cancunaman yachachishca pactachinacunata, cashcata yachachic mandashcacunataca charinga?

⁹ Chaimanta alli cuidaringuichic. Cambac ñahuihuan ricushcacunata ama cungarishpa, yuyarashpa causanguichic. Tucui causaipi cambac shungupi huacaichishca shina causaichic. Huahuacunamanpish, nietocunamanpish yachachinguichic.

Israelcuna Horeb urcupi ima tucushcamanta

¹⁰ Horeb urcupi Mandac Diospac ñaupapi cancuna cacpimi, paica: “Ñuca nishcacunata uyachun, tucui israelcunata ñuca ñaupaman tandachi. Caicunata yachacushpami, cai pachapi causashpaca ñucata manchashpa causangacuna, shinallatac huahuacunamanpish yachachinga” nirca.

¹¹ Chashna nicpimi, cancunaca urcu chaquiman cuchuyarcanguichic. Chai urcuca cielocaman rupashpami yana yana puyuhuan purayashca carca.

¹² Mandac Diosca chai nina chaupimantami cancunataca rimarca. Chai rimashcata uyashpapish, pai ima shina cashcataca cancunaca mana ricurcanguichicchu.

¹³ Chaipimi Mandac Diosca pai ari nishcata huillashpa, chunga mandashcacunata ishcai tabla rumipi quillcashpa mandarca.

¹⁴ Chai huatacunallapitacmi Mandac Diosca ñucataca cancuna japigricushca llactaman yaicushpa, mandashcacunata, pactachinacunata yuyarashpa cazuchun, yachachi nirca.

Yanga dioscunata mana ruhuana cashcamanta

¹⁵ Cancunaca Horeb urcupi nina chaupimanta Mandac Dios rimacucpica, imata mana ricurcanguichicchu. Chaimanta cancunallatac allita cuidarichic.

¹⁶ Pacta cariman riccha, huarmiman riccha dioscunata ruhuashpa, huaclliringuichicman.

¹⁷ Shinallatac allpapi tiyac animalman riccha, jahua cielota volac animalman riccha,

¹⁸ allpata aisarishpa puric animalman riccha, yacupi tiyac challuaman riccha dioscunata ruhuashpa, pacta huaclliringuichicman.

¹⁹ Pacta jahua cielota ricushpa, intita, quillata, lucerocunata, tucui jahua cielopi tiyashcata ricushpa cungurishpa adoranguichicman. Chaicunataca Mandac Diosmi tucui cai pachata achicyachichun ruhuarca.

²⁰ Mandac Diosca cancunataca Egipto llactapi fierrota nuyuchina hornopi shina causacucpimi llucchimurca. Cunan punzha shina, paipaclla acllashca cachunmi llucchimurca.

²¹ Shina cacpipish, Mandac Diosca cancuna millaita ruhuashcamantami ñucahuan piñarishpa: “Jordán yacuta pasashpa, sumac llactamanca mana yaicunguichu” nirca.

²² Chaimantami ñucaca Jordán yacuta mana pasashpa, cai llactapi huañugrini. Shina cacpipish, cancunaca cai yacuta pasashpa, sumac llactata japinguichicmi.

²³ Chaiman chayashpaca, pacta Mandac Dios cancunahuan ari nishcata cungarishpa, imaman riccha shuctac dioscunata ruhuanguichicman. Chaicunataca Mandac Diosca ama ruhuachun nircami.

²⁴ Mandac Diosca paipaclla cachunmi munan. Paica rupachishpa tucuchic nina shinami.

²⁵ Cancuna chai llactapi causacushpaca huahuacunayuc, nietocunayuc tucushpami yuyaccuna tucunguichic. Chashna causacushpaca, ama labrashca dioscunata, imaman riccha dioscunata ruhuashpa adoranguichicchu. Chashna ruhuashpaca Mandac Diospac ñaupapi mana allita ruhuashpami paita piñachinguichic.

²⁶ Chaimantami cunanca tucurinata ricuchichunmi jahua pachatapish, cai pachatapish churani. Jordán yacuta pasashpa, chai llactapi causacushpa, utca tucurina cashcata ricuchichunmi churani. Mana unaitachu chai llactapica causanguichic.

²⁷ Mandac Diosmi tucui cancunataca shuctac llactacunaman shic-huashpa cachanga. Shina ruhuacpica, ashallami saquiringuichic.

²⁸ Chai llactacunapimi gentecuna caspimanta, rumimanta ruhuashca, mana ricuc, mana uyac, mana mutquic, mana micuc yanga dioscunata servinguichic.

²⁹ Shina cashpapish, chai llactacunapi cashpa, tucui shunguhuan, tucui yuyaihuan Mandac Diosta mañashpaca taringuichicmi.

³⁰ Quipa punzhacunapi llaquicuna japicpi, jatun llaquicunahuan cashpaca, Mandac Diosman cutirishpa, pai rimashcata uyanguichicmi.

³¹ Mandac Diosca llaquic Diosmi. Paica mana saquingachu, mana tucuchingachu, shinallatac cancunapac ñaupa taitacunahuan ari nishcatapish mana cungaringachu.

³² Cancuna manarac tiyashca punzhacunapi, Dios runata cai pachapi ruhuashcamanta pacha, cai shina ruhuashcata tapuichicyari. Cai pacha callarimanta, cai pacha tucuricaman cai shina tiyashcata, mana tiyashcata tapuichicyari. Mana cashpaca, cai shina pi ruhuashcata tapuichicyari.

³³ ¿Shuc llactapi causaccunaca nina chaupimanta Dios rimashcata cancuna uyashca shina uyashpapish causashpa caticca tiyangachu?

³⁴ Mandac Diosmi Egipto llactapi cancuna causacucpi, llaquicunata cachashpa, milagrocunata ruhuashpa, jatun macanacuita ruhuashpa paipac poderhuan, paipac maquihuan llucchimurca. ¿Pai shina shuctac dioscunaca tiyangachu?

³⁵ Mandac Dios caicunata ruhuashpaca, pailla Dios cashcata, pi shuctac dios mana tiyashcata ricuchingapacmi ruhuarca.

³⁶ Yachachingapacca jahua pachamantami rimarca. Cutin cai pachapica paipac jatun ninatami ricuchirca. Nina pai chaupimanta rimashcataca uyarcanguichic.

³⁷ Paica cancunapac ñaupa taitacunata cuyashpami, paicunapac huahua huahuacunataca acllarca. Paimi Egiptomantaca paipac poderhuan llucchimurca.

³⁸ Cancunapac ñaupamanta jatun llactacunata, yalli jatun, sinchi gentecunata llucchishpa cachashpami, chai llactapi cancunaman cunga. Cunanpish chashnallatacmi ruhuacun.

³⁹ Mandac Diosca jahua pachapipish, cai pachapipish Diosmi. Chaitaca cancunapac shungupi yuyarichic.

⁴⁰ Cancunapish, cancunapac huahuacunapish, cancunapac quipa huiñaicunapish alli cangapac, shinallatac Mandac Dios cushca llactapi unaita causangapacca cai ñuca cunan yachachishpa mandashcacunata, pactachinacunata cazunguichic» nirca.

Miticuna llactacunata chicanyachishcamanta

⁴¹ Chai quipami Moisesca Jordán yacumanta inti llucshina ladoman quimsa llactacunata chicanyachirca.

⁴² Chai llactacunataca maijanpish mana huañuchina munaihuan cashpa, huañuchishpa, chai maijan llactacunapi miticugrichunmi chicanyachirca.

⁴³ Rubenpac aillumanca shitashca Beser pugru pambatami chicanyachirca. Galaadpac aillumanca Galaad llactapi tiyac Ramot llactatami chicanyachirca. Cutin Manasés aillumanca Basán llactapi tiyac Golán llactatami chicanyachirca.

Mandashcacunata Moisés huillashcamanta

⁴⁴ Cai mandashcacunatami Moisesca israelcunamanca huillarca.

⁴⁵ Egipto llactamanta israelcuna llucshishca quipa Moisés paicunaman huillashca mandashcacuna, pactachinacuna, ima shina causanata yachachishcacunaca caicunami.

⁴⁶ Caitaca Jordán yacumanta inti llucshina shuctac ladoman cac Bet-peor chimba lado pugru pambapimi yachachirca. Chai llactataca Hesbonpi causac amorreocunata mandac Sehonmi mandacurca. Chai mandactaca Moisesmi israelcunahuan Egiptomanta llucchimushca quipa huañuchirca.

⁴⁷ Chashnami paicunapac llactatapish, Basán llactata mandac Ogpac llactatapish japirca. Amorreocunata ishcai mandaccunaca Jordán yacumanta inti llucshina ladoman cac llactacunapimi causarca.

⁴⁸ Paicunaca Arnón yacu ladopi tiyac Aroer llactamantaca Sirión nishca, Hermón urcucamanmi japirca.

⁴⁹ Jordán yacumanta inti llucshina ladoman tiyac Arabá shuti tucui llactatapish Pisga urcu chaquiman cac Arabá yacu patacamanmi japirca.