DEUTERONOMIO 34 - Dios Rimashcata Quillcashcami

Moisesta enterrashcamanta

¹ Moisesca shitashca pamba Moabmanta rishpaca, Jericomanta chimbapurapi cac Nebo urcuman rishpami, Pisga urcu jahuaman chayarca. Mandac Diosca Galaad llactamantaca Danpac llactacamanmi tucui llactata ricuchirca.

² Neftalipac, Efrainpac, Manasespac shinallatac tucui Judapac llactacunatapish jatun mama cuchacamanmi ricuchirca.

³ Neguev llactata, Jericó pambacunatapish, palmacuna tiyac llactatapish Zoar llactacamanmi ricuchirca.

⁴ Chai tucuita ricuchishpami Mandac Diosca: «Cai llactacunatami Abrahamman, Isaacman, Jacoboman cungapac ari nishpaca: “Cambac huahua huahuacunamanmi cusha” nircani. Ñucaca cai llactacunata ricuchun saquinimi. Shina cacpipish, mana chaiman pasanguichu» nirca.

⁵ Mandac Diosta servic Moisesca pai nishca shinami Moab llactapi huañurca.

⁶ Shinami Moisestaca Bet-peor chimba ladopi cac Moab llacta pambapi enterrarca. Pai enterrashca jutcutaca cunancaman pi mana yachanchu.

⁷ Moisesca patsac ishcai chunga huatayuc cashpami huañurca. Paica jaicapi ñahui mana shuctaclaya tucurcachu. Alli sinchimi carca.

⁸ Israelcunaca Moisés huañushcamantaca quimsa chunga punzhacamanmi Moab pambapica huacarca. Chashnami Moisesmanta llaquirina punzhacuna pactangacaman carca.

⁹ Nunpac churi Josueca Moisés maquita uma jahuapi churashcamantami alli yachac carca. Chaimantami israelcunaca Mandac Dios Moisesta mandashca shina Josué tucui nishcata cazurca.

¹⁰ Israel llactapica Moisés shina, Mandac Dios-huan ñahui ñahui parlac Diosmanta huillacca mana pi tiyarcachu.

¹¹ Mandac Dios Moisesta mandacpi, tucui ricuchinacunata, mancharinacunata Egipto llactapi Faraonman, paita serviccunaman, chaipi causaccunaman ruhuashpa ricuchishca shinataca pi mana ruhuarcachu.

¹² Moisesca pi mana ruhuaipaccunatapish, jatun mancharinacunatapish ruhuashpa, tucui israelcunaman ricuchircami. Pai ruhuashca shinataca pi mana ruhuarcachu.