DEUTERONOMIO 33 - Dios Rimashcata Quillcashcami

Moisés israelcunata bendiciashcamanta

¹ Dios acllashca Moisés manarac huañushpa israelcunata

² bendiciashpaca: «Mandac Dios Sinaí urcumantami shamurca. Seir urcumantami achicyachirca. Parán urcumantami achicyachirca. Paipac alli maquipi achicta apashpami pai acllashca huaranga huarangacunahuan shamurca.

³ Pai acllashcacunataca cuyacunmi. Paipaclla cachun chicanyachishcacunataca cuidacunmi. Paicunaca can munashca shinami mandashcacunatapish cazurca.

⁴ Moisés ñucami mandashcacunataca Jacobopac huahua huahuaman curcani.

⁵ Israelcunata mandaccunahuan, caishuc mandaccunahuan tandanacucpica, Mandac Diosca Jesurunpimi mandac carca.

⁶ ¡Rubenca ama huañuchun, ashtahuan achca tucuchun! Paipac runacunapish achca cachun» nirca.

⁷ Judamanta nishpaca: «¡Mandac Dioslla, Judá mañashcataca uyaiyari! Paipac gentecunatapish apamuiyari. Paita piñaccunataca cambac poderhuan mishachiyari» nirca.

⁸ Levimanta nishpaca: «Mandac Dioslla, Tumimtapish, Urimtapish canta alli cazuc Leviman cuiyari. Pai ima shina cactaca Masá nishca Meriba yacupimi ricurcangui.

⁹ Paimi taita mamataca: “Mana ricsinichu” nirca. Paipac huauquicunatapish, huahuacunatapish mana ricsircachu. Paicunaca cambac nishcacunata cazurcami. Pai ari nishcatapish pactachircami.

¹⁰ Paicunami Jacobomanca mandanata allita yachachinga. Israelcunaman mandashcacunatapish yachachingami. Inciensotapish, tucui rupachinatapish, cambac altar ñaupapimi churanga.

¹¹ ¡Mandac Dioslla, paicuna imata ruhuashcataca bendiciaiyari! ¡Paicunapac maquihuan trabajashcataca cushicushpa chasquiyari! Ama cutin jatarichun piñaccunatapish, millanayachiccunatapish lomota paquiyari» nirca.

¹² Benjaminmanta nishpaca: «Mandac Diosca paita cuyanmi. Paipac ladopimi mana manchashpa causanga. Paipac rigra ucupimi cuidashpa charinga» nirca.

¹³ Josemanta nishpaca: «Mandac Dios allpaman jahua pachamanta tamyata cachashpa, allpa ucumanta yacuta llucchishpa bendiciachun.

¹⁴ Intihuanpish sumac granota pucuchishpa, quillahuanpish muyuta huiñachishpa bendiciachun.

¹⁵ Ñaupamanta tiyac urcucunapipish, lomacunapipish alli grano pucuchun.

¹⁶ Alli allpapi pucuchishpa bendiciachun. Zarza yurapi ricurishca Diospac cuyaica Josepac umapi cachun. Huauquicunapuramanta acllashca jatun mandaccunaman bendiciachun.

¹⁷ Punta huacharishca huagra shina sumaimana cachun. Sacha huagrapac gachu shina fuerzasapami. Chai fuerzahuanmi shuctac llactacunataca cai pacha tucuricaman catishpa cachanga. ¡Efrainpac huahua huahuacunapish, Manasespac huahua huahuacunapish huaranga huarangami canga!» nirca

¹⁸ Sabulonmanta nishpaca: «¡Zabulón, canca maiman llucshishpapish cushillami cangui!» nirca. Isacar: «¡Canca, cambac carpa huasillapitac saquirishpami cushicungui!

¹⁹ Paicuna gentecunata urcuman cayacpimi, paicunaca Diosman cushpa, cashcata ruhuashpa rupachinga. Mama cuchapi imalla tiyaccunata, tiyupi tiyac sumaccunatami japinga» nirca.

²⁰ Gadmanta nishpaca: «¡Gadman achca allpata cushpa, chayucyachic Diosca alli nishca cachun! Paica león shinami rigracunata, umacunata pitinga.

²¹ Gadca mandaccuna japina sumac allpatami japirca. Mandaccuna tandanacucpica, Mandac Dios mandashcacunami ruhuarca. Mandac Dios imata ruhuachun nishcataca israelcunahuanmi pactachirca» nirca.

²² Danmanta nishpaca: «Danca maltón león shinami Basán urcumanta saltan» nirca.

²³ Neftalimanta nishpaca: «Neftalimanca Mandac Diosmi yallita allicunata cushca. Paimanca Mandac Diosmi bendiciashca. Paica inti yaicunamantaca uracamanmi allpata charin» nirca.

²⁴ Acermanta nishpaca: «¡Acerca caishuc churicunamanta ashtahuan bendiciashca cachun! Huauquicunapac alli nishca cachun. Olivos aceitetapish achcata charichun.

²⁵ Pungu huichcanacunapish fierromanta, broncemanta ruhuashca cachun. Paipac fuerzapish paipac tucui causaipi tiyachun.

²⁶ ¡Jesurunpac Dios shinaca, mana shucca tiyanchu! Paica, jatun cashcahuanmi puyu jahuapi tiyarin. Paica canta ayudangapacmi jahua pachapi tiyarin.

²⁷ Canta cuidacca huiñaita causac Diosmi. Huiñaita causac Diospac rigrapish, cai pachacamanmi can. Paimi canta piñaccunataca catishpa cachacushpaca: “¡Tucurichic!” ninga.

²⁸ Israelca mana manchashpami causanga. Jacobomanta mirashca israelcunaca paicunallami grano allpapi, uvas chagra allpapi causanga. Jahua pachamanta urmac sumac garua tamyapish mana illangachu.

²⁹ ¡Israelcunalla, cushicuichicyari! ¿Cancuna shina, Mandac Dios quishpichishca gentecunaca pi shuctac tiyangachu? ¿Pitac canta escudo shina pacacca tiyangayari? Cancunata piñaccunataca paipac espadahuanmi cumurichinga. Shinami cancunaca, cancunata piñaccunapac cungapi sarunguichic» nirca.