DEUTERONOMIO 32 - Dios Rimashcata Quillcashcami

¹ «Jahua pachalla, rimashcata uyaiyari. Cai pachapish ñuca rimashcata uyaiyari.

² Yachachishcaca tamya shinami chayanga. Ñuca rimashcaca shulla tamya shina, quihuapi garua tamya shinami urmanga.

³ Mandac Diospac shutitami alli nisha. ¡Ñucanchic Diosca jatunmi!

⁴ Paica jatun Rumi shina Diosmi. Paipac ruhuashcaca tucui allimi. Pai ruhuashcaca allita ruhuashcami. Paica cashcata nic Diosmi. Paipica ima mana allica mana tiyanchu. Paica cashcata ruhuacmi.

⁵ Cancunaca huaclliric, millaillata ruhuaccunami canguichic. Mana paipac huahua shinachu canguichic. Millaita ruhuac, mana cazucmi canguichic.

⁶ Imatapish mana yachac, yuyai illac gentecunalla, ¿chashnachu Mandac Diostaca ruhuana carcanguichic? ¿Paica manachu cancunaman causaita cuc Taita? Paimari causaita cushpa callarichirca.

⁷ Ñaupa punzhacunata yuyarichicyari. Huahua huahuacunapac huatata yuyarichicyari. Taitacunamanpish, ñaupa huiñai yuyaccunamanpish tapuichicyari. Paicunami cancunaman huillanga.

⁸ Jahua pacha Dios llactacunaman allpata cushpaca, Adanpac churicunata chicanyachicushpami Israelpac huahuacuna mashna cashcata ricushpa linderocunata churarca.

⁹ Mandac Dios japinaca pai acllashcacunami. Pai japinaca Jacobomi.

¹⁰ Paitaca shitashca pambapimi tarirca. Manchana chaquishca pambapimi tarirca. Paimi tucui muyundita cuidarca. Paipac quiquin ñahuita shinami huacaichirca.

¹¹ Águila cuzha ladota volashpa, volanata yachachic shinami cuidarca. Chashnami alasta pascashpa, chai jahuapi churac shina aparca.

¹² Mandac Diosllami pusharca. Pihuan chimbapurangapacca shuctac dioscunaca mana tiyanchu.

¹³ Jahua urcucunata pushashpami, campopi pucushca granocunata cararca. Paimi quingraimanta abeja mishquita, sinchi rumimanta aceiteta cararca.

¹⁴ Vaca leche mantequillatapish, oveja lechetapish, maltón oveja huirahuan, cari oveja huirahuanmi cararca. Basanmanta cari chivohuan, tucuimanta yalli alli trigohuanmi cararca. Sumac uvas vinotami ubiachirca.

¹⁵ Jesurunca yallita huirayashpa, huira tapashpa cashpami paita ruhuac Mandac Diostaca mana cazurca. Quishpichic jatun Rumi shina Diostaca mana chasquircachu.

¹⁶ Shuctac dioscunata adorashpami, millaita ruhuashpa yallita piñachirca.

¹⁷ Supaimanmi animalta rupachirca. Diosmanca mana rupachircachu. Mana ricsishca dioscunaman, cunanlla ruhuashca dioscunaman, cuchullamanta apamushca, taitacuna mana manchana dioscunamanmi animalta cushpa rupachirca.

¹⁸ Cancunata ruhuac jatun Rumi shina, Diostami cungarircanguichic.

¹⁹ Chaita Mandac Dios ricushpami, churicunatapish, ushicunatapish piñarca.

²⁰ Chaimantami: “Paicuna ima tucucta ricungapac, paicunata mana tigra ricushachu. Paicunaca huahua huahua millaita ruhuaccunami.

²¹ Paicuna manapish dioscunata, yanga dioscunata adorashpami yallita piñachirca. Ñucapish shuctac gentecunahuanmi piñachisha. Mana cazuc gentecunahuanmi paicunataca yallita piñachisha.

²² Nina japiric shinami, yallita piñarishca cani. Chashna piñarishpami ucu pacha seolcaman rupachinga. Cai allpataca chaipi pucushcandimi rupachinga. Urcucunatapish sapicamanmi rupachinga.

²³ Yalli mana allicunahuanmi paicunataca yallita llaquichisha. Ñuca flechacunahuanmi paicunata tucuchisha.

²⁴ Yarcaihuan, millai fiebre ungüihuanmi tucui huañunga. Millai animalcunatapish, culebracunatapish cachashami.

²⁵ Canzhapica espadacunahuan tucuchinga. Ucupica yalli manchaimi tucuchicunga. Chashnami mosocunatapish, solteracunatapish, chuchucuc huahuatapish, yuyaccunatapish tucuchinga.

²⁶ Ñucaca tucui israelcunataca shic-huashpa cachashami. Ñucaca ‘paicunataca pipish cai pachapica ama yuyaringachun’ yuyarcanimi.

²⁷ Shina yuyacushpapish paicunata piñaccuna jatun tucushpa: ‘Caicunataca mana Mandac Dioschu ruhuan, ashtahuanpish ñucanchicmi ruhuanchic’ ama nichunmi mana chashna ruhuarcani” nirca.

²⁸ Israelcunaca yuyai illaccunami, imatapish mana entendinchu.

²⁹ ¡Yuyaisapa cashpaca entendinmanmi! ¡Ima tucugricushcata yachanmanmi!

³⁰ Jatun Rumi shina Diosllatac mana mishachishca cacpica, ¿ima shinatac shuclla runa huaranga genteta callpachinga? ¿Ima shinatac ishcailla runa chunga huaranga genteta catishpa cachanga?

³¹ Paicunapac rumi shina dioscunaca mana ñucanchic jatun Rumi shina Dios cashcataca allita yachanmi.

³² Paicunapac uvas chagra shinaca Sodomami. Pambacunaca Gomorra shinami. Uvas caspacunapish jayacmi, shinallatac uvasca venenomi.

³³ Vinoca culebra veneno shinami, canishpa huañuchic culebra shinami.

³⁴ ¿Chaitaca manachu ñuca ladopi huacaichinapi huacaichishpa charicuni?

³⁵ Ima shina llaquichina cashca shina, llaquichinapish ñucapacmi. Ima punzha pactacpimi, chaqui lluchcaric shina urmanga. Paicuna chingarinaca ñami pactamucun. Paicunaman allichishcapish ñami chayamucun.

³⁶ Mandac Diosca pai acllashcacunataca cashcata ruhuashpami taripanga. Paita serviccunata llaquingami. Ña fuerza illac cacpi, pipish mana saquiricpi, prezucunapish, mana prezucunapish mana saquiricpi llaquingami.

³⁷ Paica: “¿Maipitac cancunapac dioscunaca? ¿Maipitac cancunapac jatun rumi shina dioscunaca?

³⁸ ¿Maipitac cancuna animalcunata rupachishpa cushca huirata chasquic, cancuna cushca vinota ubiac diosca?” ninga. ¡Chai dioscuna jatarishpa ayudangapac, cancunata misangapac shamuchunyari!

³⁹ Ñucaca shuclla Diosmi cani. Shuctac Diosca mana tiyanchu. Ñucaca huiñaita causac Diosmi cani. Chugrichicpish, allichicpishmi cani. Ñuca maquimantaca pi mana quichungachu.

⁴⁰ Maquita jahua pachaman alzashpami: ¡Huiñaitami casac ñuca shutipimi nisha!

⁴¹ Ñucapac jagan nicuc espadata mulashpa ñuca maquihuan alzashpa cashcata ruhuacushpami ñucata piñaccunataca paicuna llaquichishca shina llaquichisha.

⁴² Ñuca espadaca yahuarsapa tucungami. Huañushcacunapac, prezucunapac, jatun acchata charic ñucata piñaccunapac yahuarhuanmi cahuiringa.

⁴³ ¡Llactacunalla, Dios acllashca llactata alli nichicyari! Paipac servicta huañuchiccunataca huañuchingami. Paimi, paita piñaccunata huañuchinga. Pai acllashca llactacunapac juchata pichangapacmi chashnaca ruhuanga» nirca.

⁴⁴ Moisesca Nunpac churi Josuehuanmi chaipi cantashcacunataca tucui israelcunapac ñaupapi huillarca.

⁴⁵ Moisés tucui israelcunaman huillashpaca:

⁴⁶ «Cunan ñuca rimashcataca tucui shunguhuan yuyarashpa pactachinguichic. Mandashcacunata quillcashca libropi tucui ima nicushcata huahuacunapish uyashpa cazuchunmi, chashna ruhuana canguichic.

⁴⁷ Cai nishcacunaca mana yangachu, ashtahuanpish causaita cuc rimashcami. Cai rimashcacunamantami Jordán yacuta pasashpa, chai llactata japishpa, unaita causanguichic» nirca.

Moisesman Canaán llactata ricuchishcamanta

⁴⁸ Chai punzhallatacmi Mandac Diosca Moisestaca:

⁴⁹ «Jericó chimba lado Moab llactapi cac Abarim urcupura Nebo urcuman huichicushpa, israelcunaman ñuca cushca Canaán llactata ricui.

⁵⁰ Chai urcupimi cambac huauqui Aarón Hor urcupi huañushpa paipac ñaupa aillucunahuan tandaringapac ric shina canpish chai urcuman rishpa huañushpa, cambac ñaupa aillucunahuan tandaringapac ringui.

⁵¹ Cadespi tiyac Meriba yacupi, shitashca pamba Zinpi cashpaca ñucata llaquichircanguimi. Israelcunapac chaupipica mana ñucataca jucha illac nishpa huillarcanguichu.

⁵² Chaimantami ñuca israelcunaman cushca llactamanca mana yaicungui, ashtahuanpish carullamantami ricungui» nirca.