DEUTERONOMIO 31 - Dios Rimashcata Quillcashcami

Moisespac randi Josueta pushachun churashcamanta

¹ Moisés israelcunata rimashpaca:

² «Ñucaca patsac ishcai chunga huatayucmi cani. Chaimanta maiman yaicunatapish, llucshinatapish mana pudinichu. Chaipac jahuapica Mandac Diosllatacmi: “Canca mana Jordán yacutaca pasanguichu” nirca.

³ Ashtahuanpish Mandac Diosmi cancunapac ñaupata rishpa, chai llactapi causaccunata cancunapac ñaupapi tucuchinga. Chashna ruhuacpimi, llucchishpa cachanguichic. Mandac Dios nishca shinami Josueca cancunapac ñaupata pasanga.

⁴ Mandac Diosca chai llactapi causaccunataca amorreocunata jatun mandac Sehonta, Ogta shinami paicunapac llactacunandi tucuchinga.

⁵ Mandac Dios chai llactapi causaccunata cancunapac maquipi churacpimi, cancunaca ñuca mandashca shina ruhuanguichic.

⁶ Paicunapac ñaupapica ama manchaichicchu. Mandac Diosca cancunahuanmi. Paicunata ricushpa, ama manchanguichicchu. Ama chucchunguichicchu. Paica cancunata mana saquingachu, mana cungaringachu» nirca.

⁷ Chaimanta Moisés Josueta israelcunapac ñaupaman cayashpaca: «Ama manchaichu, sinchi cai. Canmi Mandac Dios ñaupa taitacunaman cungapac ari nishca llactamanca israelcunata ñaupashpa yaicugringui. Canmi chai llactataca paicunaman cungui.

⁸ Mandac Diosmi ñaupashpa ringa. Paimi canhuanca canga. Mana saquingachu, mana canllata saquingachu. Ama manchaichu, ama chucchuichu» nirca.

Mandashcacunata rezashcamanta

⁹ Moisesca cai mandashcacunata quillcashpami Mandac Dios-huan ari nishca quillcata huacaichina Arcata apac Levipac huahua huahuacunamanpish, israelcunata pushac yuyaccunamanpish curca.

¹⁰ Moisesca paicunataca: «Cada canchis huatapi, mañashcacunata perdonana, ramacunahuan chucllata ruhuana fiesta punzhapica,

¹¹ cai mandashcacunata Mandac Diospac acllashca pushtuman israelcuna tandanacumucpi rezanguichic.

¹² Caicunata uyashpa, yachacushpa Mandac Diosta manchachun, mandashcacunata quillcashca libropi tucui nishcacunata cazuchunmi caricunatapish, huarmicunatapish, huahuacunatapish, cancunahuan causac caru llacta runacunatapishmi tucuita tandachina canguichic.

¹³ Paicunapac huahua huahuacunapish cai mandashcacunata manarac ricsishca cashpapish yachacushpaca, Mandac Diosta manchangami. Chashna yachacushpami Jordán yacuta pasashpa, chai llactapi yaicushpaca, Mandac Diosta tucui causaipi manchashpa causanga» nirca.

¹⁴ Mandac Diosca Moisestaca: «Riqui, ñami cambac huañuna punzhaca chayamushca, Josueta ñucahuan tupana huasiman pushai. Chaipimi pai imata ruhuanata mandasha» nirca. Shina nicpimi, Moisesca Josuehuan Dios-huan tupana huasipi shuyarca.

¹⁵ Chaipi cacpimi, Mandac Diosca paihuan tupana huasi yaicunapi suniclla puyupi ricurirca.

¹⁶ Mandac Diosca Moisestaca: «Canca huañushpa, ñaupa taitacunahuan tandanacugringuimi. Israelcunaca paicuna ricushca llactaman chayashpaca, chaipi tiyac dioscunata catishpami huainayanga. Shinami ñucamanta caruyashpa, ñuca paicunahuan ari nishcatapish yangapi churanga.

¹⁷ Chaimantami chai punzhapica paicunahuanca nina japiric shina piñarisha. Paicunata saquishpa, mana tigra ricucpimi tucuringa. Paicunataca achca llaquicuna, manchaicunami japinga. Chai llaquicunahuan cashpami: “¿Manachu chai llaquicunaca ñucanchic Dios mana ñucanchic-huan cacpi japicunga?” ninga.

¹⁸ Shina cacpipish, ñucaca chai punzhacunaca manatac ñuca ñahuita ricuchishachu. Shuctac dioscunata catishcamantami chashna ruhuasha.

¹⁹ Cunanca, cai cantota quillcashpa israelcuna cantachun yachachi. Cai cantollatacmi israelcuna llaquita apanatapish ricuchinga.

²⁰ Lechepish, mishquipish yacu shina tiyac allpata ñaupa taitacunaman cungapac ari nishca llactaman chayashpa, mana nicta micushpa huirayashpaca, shuctac dioscunapacman rishpami adoranga. Chashna causashpami ñuca mandashcacunata mana valichishpa, ñuca ari nishcatapish yangapi churanga.

²¹ Paicuna manchaihuan, llaquihuan cacpica, cai cantomi paicunata yuyachinga. Paicunapac ñaupa taitacunaman cushami nishca llactaman manarac yaicucpimi, paicunapac yuyaicuna ima shina cashcata ñucaca yachasha. Chaimanta paicunapac huahuacunami chaita cantashpa yuyaringa» nirca.

²² Moisesca chai punzhallatacmi cai cantota quillcashpa israelcunaman yachachirca.

²³ Mandac Dios Nunpac churi Josueta cachacushpaca: «¡Sinchicui, ama manchaichu! Canmi israelcunata ñaupashpa ñuca paicunaman cungapac ari nishca llactaman yaicungui. Ñucami canhuan casha» nirca.

Arca ñaupapi imata ruhuana cashcamanta

²⁴ Moisés cai mandashcacunapi ima nishcacunata shuc libropi tucui quillcashpa,

²⁵ Mandac Dios-huan ari nishca quillcata huacaichina Arcata apac levitacunaman cushpaca:

²⁶ «Mandashcacunata quillcashca librota japishpa, Mandac Dios-huan ari nishca quillcata huacaichina Arca ladopi churaichic. Chaipimi cancunata llaquichinata ricuchishpa tiyacunga.

²⁷ Cancuna mana cazuc sinchi shungu cashcataca yachanimi. Cunan ñuca cancunahuan pacta causacucpipish, Mandac Diosta mana cazuc cashpaca, ñuca huañushca quipaca, ¡imachari canguichic!

²⁸ Cancunapac aillucunata pushac yuyaccunatapish, caishuc mandaccunatapish ñuca ñaupaman tandachichic. Paicunamanmi paicuna uyachun caicunata rimasha. Chashnallatac paicunata llaqui japina cashcata ricuchichunmi jahua pachatapish, cai pachatapish churani.

²⁹ Ñuca huañushca quipaca huacllirishpami, ñuca mandashcacunamantapish caruyanguichic. Mandac Diospac ñaupapi cancunapac maquihuan mana allita ruhuashpa, Diosta piñachishcamantami quipa punzhacunapica llaqui japinga» nirca.

Moisés cantashcamanta

³⁰ Moisés cai cantopi tucui nishcacunata tandanacushca israelcunaman huillashpaca: