DEUTERONOMIO 3 - Dios Rimashcata Quillcashcami

Basán llactata jatun mandac Ogta israelcuna mishashcamanta

¹ Cutinllatacmi Basán llactaman huichai cutircanchic. Chaipimi Basán llactata jatun mandac Ogca tucui paipac gentecunahuan Edrei llactapi ñucanchic-huan macanacungapac llucshirca.

² Chaipimi Mandac Diosca: “Ama manchaichicchu, cambac maquipimi paitapish, paipac gentecunatapish, paipac llactatapish churani. Hesbonpi causac amorreocunata jatun mandac Sehonta ruhuashca shinami paicunatapish ruhuangui” nirca.

³ Ñucanchicta Mandac Dios Basán llactata mandac Ogtapish, paipac gentecunatapish ñucanchic maquipi churacpimi, shucllatapish mana saquishpa, tucui huañuchircanchic.

⁴ Chashnami, shucllatapish mana saquishpa, tucui llactacunata quichurcanchic. Jatun mandac Og mandana Basán llactapi, Argob llactapi tiyac sucta chunga llactatami tucui japircanchic.

⁵ Tucui chai llactacunami alto pircacunahuan jarcashca, pungucunapish jatun fierrocunahuan huichcashca carca. Mana pircashca llactacunaca mana yupashcachu carca.

⁶ Hesbón llactata mandac Sehonta ruhuashca shinami tucui llactacunapi causac caricunatapish, huarmicunatapish, huahuacunatapish huañuchircanchic.

⁷ Ñucanchicca animalcunata, chai llactacunapi imalla tiyashcallatami japircanchic.

⁸ Chai punzhacunapica Arnón jatun yacumantaca Hermón urcucamanmi amorreocunapac ishcai jatun mandacmantaca allpata quichurcanchic. Chai llactacunaca Jordán yacumanta chimba ladomanmi carca.

⁹ (Hermón urcutaca Sidón llactapi causaccunaca Sirión nishpami cayac carca. Cutin amorreocunaca Semir nishpami cayac carca).

¹⁰ Pugru pambacunapi tiyac llactacunatapish tucuitami japircanchic. Basán llacta mandac Ogmantaca Galaadpi tiyac llactacunata, Basanpi tiyac pueblocunata, Salca llacta, Edrei llactacunacamanmi quichurcanchic.

¹¹ Manchana jatun gentecunamantaca Basanta mandac Ogllami saquirirca. Paipac camaca fierromi carca. ¿Chai camaca manachu Amón llactapi tiyac Rabá llactapi tiyacun? Chai camaca chuscu metro largo, shuc metro pusac chunga centímetro anchomi carca.

Inti llucshina lado llactacunata japishcamanta

¹² Chai huatacunapi ñucanchic japishca llactacunataca Amón yacu patapi tiyac Aroermantaca Galaad urcu chaupicamanmi Galaadpac aillucunaman, Rubenpac aillucunaman curcani.

¹³ Galaad chaupi urcuta, shinallatac jatun Mandac Og mandana Basán llactataca Manasespac chaupi aillumanmi curcani. Argob llactapi, Basán llactapi causaccunataca manchana jatun nishpami cayac carca.

¹⁴ Manasespac churi Jairca tucui Argob llactata japishpami Gesur, Maaca llacta tupanacuicaman japirca. Chashna japishpami, Basantaca paipac quiquin shuti Havot-jairta churarca. Chai llactataca cunancamanmi chashna cayancuna.

¹⁵ Galaadtaca Maquirmanmi curcani.

¹⁶ Rubenpac ailluman, Galaad aillumanca Galaadmanta Arnón, Jaboc yacucunacamanmi curcani. Chai yacumi amonitacunapac linderoca.

¹⁷ Jordán yacuta lindero ruhuashpami, Arabá llactataca Cineretmanta Arabá Cachi Cuchacaman curcani. Pisga urcu quingraicamanmi inti llucshina ladomanca curcani.

¹⁸ Chai huatacunapica cancunataca: “Mandac Diosmi cai llactacunata curca. Tucui macanacuc runacunaca cancunapac huauqui israelcunapac ñaupata richic.

¹⁹ Ñuca cushca llactacunapica cancunapac huarmicunallata, huahuacunallata, cancunapac animalcunallata saquichic. (Cancuna achca animalcunata charishcataca ñucallatacmi yachani). Chaicunataca chai llactallapitac saquinguichic.

²⁰ Mandac Dios cancunaman allpata cushpa, sumac causaita cushca shinallatac cancunapac huauquicunapish Jordán yacumanta chimba ladopi cac llactata japingacaman chaipi saquirichic. Chai quipami ñuca cushca llactaman cutinguichic” nishpami cacharcani.

²¹ Chai huatallatacmi Josuetaca: “Canta Mandac Dios chai ishcai jatun mandaccunata imata ruhuashcataca quiquin ñahuihuanmi ricurcangui. Chashnallatacmi Mandac Diosca can maita pasana jatun mandaccunatapish ruhuanga.

²² Mandac Diosmi cancunamantaca macanacunga. Chaimanta ama manchaichicchu” nirca.

Moisés Canaanman mana yaicuna cashcamanta

²³ Chai punzhacunapimi Mandac Diostaca:

²⁴ “Mandac Dioslla, canta serviccunaman can jatun cashcata, can poderta charishcata ricuchi callarishcangui. Can shina sumaccunata, jatun mancharinacunata ruhuacca jahua pachapipish, cai pachapipish, ¿pi shuctac Diostac tiyangayari?

²⁵ Ñucapish Jordán yacuta pasashpa, chai urcu alli allpacunatapish, Líbano llactatapish ricungapac richun saquiyari” nishpa mañarcani.

²⁶ Mandac Diosca cancunamantami ñucahuanpish piñarishpa ñuca mañashcata mana uyarca. Chaimantami Mandac Diosca: “¡Ña chailla! Ama caimanta ashtahuan rimaichu.

²⁷ Pisga urcuman llucshishpa uratapish, jahuatapish, inti tigrana ladotapish, inti llucshina ladotapish ricui. Canca Jordán yacutaca mana pasanguichu.

²⁸ Ashtahuanpish Josueta cushichishpa sinchiyachishpa cachai. Paimi israelcunapac ñaupata rishpa, can ricugricuc llactata cunga” nirca.

²⁹ Chaimantami Bet-peorpi cac pugru pambapi saquirircanchic.