DEUTERONOMIO 29 - Dios Rimashcata Quillcashcami

Mandac Dios Moab llactapi israelcunahuan ari nishcamanta

¹ Mandac Diosca Horeb urcupimi israelcunahuan ari ninacurca. Chaipi ari nishca jahuami Mandac Diosca Moab llactapipish israelcunahuan ari ninacuchun Moisesta mandarca.

² Chaimanta Moisés tucui israelcunata cayashpaca: «Egipto llactapi Faraontapish, tucui paita serviccunatapish, chaipi causaccunatapish, cancunapac ñaupapi Mandac Dios imata ruhuashcataca cancunapac ñahuihuanmi ricurcanguichic.

³ Jatun ricuchinacunatapish, jatun mancharinacunatapish, pi mana ruhuaipaccunatapish, cancunapac ñahuihuanmi ricurcanguichic.

⁴ Chashna cacpipish, Mandac Diosca cunancamanmi chaicunata entendichunca yuyaitapish, ñahuitapish, ringritapish mana cushca.

⁵ Ñucaca chuscu chunga huatatami shitashca pambataca cancunata pushamurcani. Chai huatacunaca cancunapac churanapish mana maucayarcachu, ushutapish mana tucurircachu.

⁶ Tandatapish mana micurcanguichicchu, llullu vinotapish, pucushca vinotapish mana ubiarcanguichicchu. Ñucaca Mandac Dios cashcata yachachunmi chashna pushamurcani.

⁷ Chashnami cai llactaman chayamurcanchic. Hesbón llactata jatun mandac Sehonpish, Basán llactata jatun mandac Ogpish ñucanchic-huan macanacungapac llucshircami. Shina cacpipish atircanchicmi.

⁸ Paicunata atishpaca, allpata quichushpami Rubenpac ailluman, Gadpac ailluman, Manasespac chaupi ailluman curcanchic.

⁹ Cancuna tucui ima ruhuashcapish alli llucshichunca, Dios-huan ari nishcatami pactachishpa causana canguichic.

¹⁰ Cunanca, tucui cancunami Mandac Diospac ñaupapi canguichic. Aillucunata mandaccunapish, pushac yuyaccunapish, caishuc mandaccunapish, tucui israelcunapish caipimi canguichic.

¹¹ Cancunapac huahuacunapish, huarmicunapish, cancunahuan causac caru llacta runacunapish, yantata piticcunapish, yacuta ashtaccunapish caipimi canguichic.

¹² Mandac Dios cancunahuan ari nishcata chasquishpa, chai ari nishcata pactachingapacmi caipi canguichic.

¹³ Cancunapac ñaupa taita Abrahamman, Isaacman, Jacoboman ari nishca shinami cancunaca Dios acllashca cangapac, cutin Mandac Diosca cancunapac Dios cachun caipi canguichic.

¹⁴ Cai ari nishcatapish, cai pactachishami nishcacunatapish mana cancunallahuanchu ruhuarca.

¹⁵ Ashtahuanpish Mandac Diospac ñaupapi cunan ñucanchic-huan caccunahuanpish, mana ñucanchic-huan caccunahuanpishmi ruhuarca.

¹⁶ Egipto llactapi ima shina causashcatapish, chaimanta llucshishpa shuctac llactacunata ima shina pasamushcatapish cancunallatac yachanguichicmi.

¹⁷ Chai llactapi causaccuna millaita ruhuac cashcatapish, caspimanta, rumimanta, cullquimanta, curimanta ruhuashca dioscunata charictapish ricurcanguichicmi.

¹⁸ Cancunapuramanta cari cashpa, huarmi cashpa, familia cashpa, aillu cashpa Mandac Diosmanta caruyashpa, chai llacta dioscunata pacta adoranguichicman. Cancunapurapica pacta jayac venenota pucuc yura shina tiyanman.

¹⁹ Shina tiyashpaca, cai ari nishcata uyashpapish jatun tucushpa shungupi: “Ñucaca munashcata ruhuashpapish allimi causasha” ninguiman. Chashna yuyacpica, canmantami tucui llaqui tucunga.

²⁰ Mandac Diosca chashna mana alli ruhuactaca mana perdonangachu. Ashtahuanpish nina rupashpa cushnicuc shina piñarishpa, paipaclla cachun munashpa, cai libropi sinchita nicushca shinami llaquichinga. Chashnami cai pachamanta chai runapac shutitaca chingachinga.

²¹ Mandac Diosca chai runataca llaquichingapacmi tucui Israel aillucunamanta chicanyachinga. Llaquichingapac ari nishcata cai mandashcacunata quillcashca libropi nishca shinami yallita llaquichinga.

²² Cancunapac churicunapish, huahua huahuacunapish, caru llacta runacunapish Mandac Dios cai llactaman jatun plagacunata, jatun ungüicunata cachashcata ricushpaca:

²³ “Azufrehuan, cachihuan rupashca allpaca imata tarpucpipish mana pucungachu. Ima quihuapish mana huiñangachu. Sodoma, Gomorra, Adma, Zeboim, llactacuna shinami tucushca. Chai llactacunataca Mandac Diosmi nina japiric shina piñarishpa, tucui tucuchirca” ninga.

²⁴ Chaita tucui llactacunapi causaccuna tapushpaca: “¿Imamantatac Mandac Diosca cai llactataca cashna ruhuarca? ¿Imamantatac Diosca nina japiric shina piñarirca?” ningami.

²⁵ Chashna tucucpi, maijancunaca: “Ñaupa taitacunapac Mandac Dios Egipto llactamanta llucchimushpa, ari nishcata cungarishcamantami chashna tucushca.

²⁶ Paicunaca manapish adorana, manapish ricsishca dioscunata servishpa adorangapacmi rishca.

²⁷ Chaimantami Mandac Diosca chai llactapi causaccunahuan nina japiric shina piñarishpa, cai libropi sinchita nicushca shina, llaquicunahuan llaquichishca.

²⁸ Chashna yallita piñarishpa, mana ricunayachishpami paicunataca llactamanta sapindi aisac shina, Mandac Diosca shuctac llactacunaman catishpa cachashca. Chaitami cunanca ricunguichic” ninga.

²⁹ Imapish pacallacunaca ñucanchic Mandac Diospacmi. Ashtahuanpish cai ricuchishcacunaca ñucanchicpacpish, ñucanchic huahua huahuacunapacpishmi can. Cai mandashcacunapi tucui nishcacunatami huiñaita pactachina canchic.