DEUTERONOMIO 28 - Dios Rimashcata Quillcashcami

Dios mandashcata pactachina alli cashcamanta

¹ Cunan ñuca huillashca mandashcacunata pactachingapac Mandac Dios tucui rimashcata uyacpica, paica cancunataca tucui llactacunamanta yalli ashtahuan jatun llactatami ruhuanga.

² Mandac Dios rimashcata pactachicpica, paica bendiciangami.

³ Cancunaca pueblopipish, campopipish bendiciashcami canguichic.

⁴ Cancunapac huahuacunapish, cancunapac allpapi pucushcapish, vacacuna mirashcapish, ovejacuna mirashcapish, tucui animalcuna mirashcapish, Mandac Dios bendiciashcami canga.

⁵ Cancunapac grano tandana canashtapish, tanda ruhuana bateapish Mandac Dios bendiciashcami canga.

⁶ Cancunaca maiman yaicushpapish, llucshishpapish bendiciashcami canguichic.

⁷ Cancunata piñaccuna jatarishpa, cancunata llaquichingapac jataricpica, Mandac Dios ayudacpimi, cancunaca mishanguichic. Cancunata macangapacca shuclla ñantami shamungacuna, ashtahuanpish cancunapac ñaupamantaca canchis ñantami callpangacuna.

⁸ Mandac Diosca cancunapac grano huacaichinatapish bendiciangami. Tucui cancunapac trabajashcami pai cushca llactapica bendiciashca canga.

⁹ Tucui mandashcacunata cancuna cazucpica, Mandac Diosca pai nishca shinami paipacllata ruhuashpa, jucha illacta ruhuanga.

¹⁰ Chaimantami tucui cai pachapi causaccunaca, cancunaca Mandac Dios acllashca llacta cashcata yachashpa manchangacuna.

¹¹ Mandac Diosmi huahuacunatapish, animalcunatapish, chagracunatapish cancunapac taitacunaman cungapac ari nishca allpapica achcata bendicianga.

¹² Paica jahua pachata pascac shinami, tamyana punzhapitac cancunapac allpapi tamyachishpa, cancunapac maquihuan ruhuashcataca bendicianga. Cancunaca imata mana mañanguichicchu, ashtahuanpish cancunami shuctac llactacunapi causaccunamanca mañachinguichic.

¹³ Cunan, ñuca huillashca Mandac Dios mandashcacunatapish, yachachishcacunatapish cazushpaca, uma shina mandacmi canguichic, ashtahuanpish mana chupa shinachu canguichic. Chashnami cancunalla mandashpa causanguichic. Pipish cancunataca mana mandangachu.

¹⁴ Cunan ñuca huillashpa mandashcacunamantaca allimanpish, lluquimanpish ama ladoyanguichicchu. Pacta shuctac dioscunata adorashpa pandaringuichicman.

Diosta mana cazucpi maldicianamanta

¹⁵ Mandac Dios rimashcata mana uyashpa, cunan ñuca huillashca mandashcacunatapish, pactachinacunatapish mana cazucpica, llaquicunami shamunga.

¹⁶ Pueblopipish, campopipish mana alli nishcami canguichic.

¹⁷ Grano tandana canashtapish, tandata ruhuana bateapish mana alli nishcami canga.

¹⁸ Cancunapac huahuacunapish, allpapi pucushcapish, ovejacuna mirashcapish, vacacuna mirashcapish mana alli nishcami canga.

¹⁹ Maipi cashpapish mana alli nishcami canguichic.

²⁰ Mandac Diosmi tucui cancunapac maquihuan ruhuashcacunataca maldicianga. Chaimantami manchaitapish, llaquicunatapish cachanga. Cashnami mana allita ruhuashpa, Diosmanta caruyashcamantaca tucui cancuna tucuringacaman llaquihuan canguichic.

²¹ Mandac Diosca cancuna causagricuc llactapica, cancuna tucuringacamanmi ungüicunata cachashpa llaquichinga.

²² Mandac Diosca tuberculosis, fiebre, pungui, rupachic ungüicunahuanmi llaquichinga. Chagracunatapish intihuan yallita rupachishpa, huairahuan yallita chaquichishpami cancuna tucuringacaman llaquichicunga.

²³ Cancunapac jahuapi cac cieloca bronce shinami canga. Cutin saruna allpaca fierro shinami canga.

²⁴ Mandac Diosca cancunapac allpamanca tamyapac randica uchupata, ñuto allpatami cielomanta cancuna tucuringacaman llaquichinga.

²⁵ Mandac Diosca cancunataca piñaccunapac maquipimi llaquichichun churanga. Cancunaca macanacungapacca shuc ñanllatami llucshinguichic. Cutin paicunapac ñaupamantaca canchis ñantami cutinguichic. Chaita ricushpaca, tucui cai pachapi tiyac jatun mandaccunami mancharinga.

²⁶ Cancuna huañushca aichaca volac animalcunapac, allpata puric animalcunapac micunami tucunga. Chashnami pipish mana misashca micunga.

²⁷ Mandac Diosmi cancunataca Egipto llactapi causaccunata llaquichishca shina, sisu ungüihuanpish, chupu ungüihuanpish, shicshi ungüihuanpish llaquichinga. Cancunaca mana jambiri pudinguichicchu.

²⁸ Mandac Diosca muspachishpa, ñahui mana ricucta ruhuashpa, yuyaicunata chingachishpami llaquichinga.

²⁹ Cancunaca chaupi punzhami ñahui mana ricuc runa shina tantiashpa puringuichic. Mana alli causanguichicchu. Cancunaca punzhantami llaquichishcalla canguichic. Cancunapacta imata shuhuacucpi, caparicpipish pi mana ayudangachu.

³⁰ Cancunahuan cazarangapac ari nishca huarmihuanpish shuc carimi sueñunga. Huasita shayachishpapish, mana causanguichicchu. Uvasta tarpushpapish mana pallanguichicchu.

³¹ Cancunapac huagrata huañuchishpapish ama micunguichicchu. Cancunapac ñaupamanta burrota quichu rishpapish mana cutichingachu. Cancunapac ovejatapish cancunata piñaccunaman cushcami canga. Chaicunataca pi mana llucchingachu.

³² Cancunapac churicunapish, ushicunapish shuctac gentecunapac maquipi churashcami canga. Chaicunata punzhanta ricushpaca shungupi llaquiringuichicmi. Shina cashpapish mana imata ruhuai pudinguichicchu.

³³ Cancunapac allpapi pucushcatapish, cancuna trabajashcatapish cancuna mana ricsishca gentecunami micunga. Cancunaca punzhanta llaquita servishpallami causanguichic.

³⁴ Tucui chaicunata ricucushpallami yuyaita chingachinguichic.

³⁵ Mandac Diosmi cancunapac mucucunatapish, changacunatapish, ismuchic ungüihuan llaquichinga. Chaqui pambamanta umacamanmi mana jambiripac ungüihuan llaquichinga.

³⁶ Mandac Diosmi cancunatapish, cancunapac llactata jatun mandaccunatapish, cancunapish, cancunapac taitacunapish mana ricsishca llactacunapacman apanga. Chai llactapimi rumimanta, caspimanta ruhuashca shuctac dioscunata servinguichic.

³⁷ Mandac Dios mai llactacunaman apacpipish, chai llactapi causaccunapac burlashcalla, asishcallami canguichic.

³⁸ Cancunaca achca muyuta tarpushpapish langostacuna micucpimi, ashallata cosechanguichic.

³⁹ Uvasta tarpushpapish, jallmashpapish curucuna micucpimi, mana pallanguichic, shinallatac vinotapish mana ubianguichicchu.

⁴⁰ Cancunapac llactapi olivosta tarpushpapish, chai olivos granocuna tucui urmacpimi, olivos aceitehuanca mana cahuiringuichic.

⁴¹ Churicunata, ushicunata charishpapish mana paicunahuan causanguichicchu. Paicunataca shuctac llactacunamanmi prezu apanga.

⁴² Cancunapac allpapi tiyac yuracunatapish, granotapish langostami tucuchinga.

⁴³ Shuctac llactamanta shamushpa, cancunapac chaupipi causac runacunami cancunamantaca punzhanta chayucyanga. Cutin cancunaca punzhantami huacchayanguichic.

⁴⁴ Paicunami cancunamanca mañachinga. Ashtahuanpish cancunaca ima mañachinata mana charinguichicchu. Paicunami uma shina mandanga. Cutin cancunaca chupa shinami canguichic.

⁴⁵ Tucuilaya llaquicunami cancunataca japinga. Mandac Dios mandashcacunatapish, pactachinacunatapish mana uyashcamanta, mana cazushcamantami cancuna tucuringacaman cai llaquicunaca caticungalla.

⁴⁶ Shina llaquichicpimi cancunapish, cancunapac huahua huahuacunapish tucui causaipi mancharina, yuyarina canguichic.

⁴⁷ Mandac Dios tucuilaya allicunata cucucpipish, mana cushicushpa, tucui shunguhuan servircanguichichu.

⁴⁸ Chaimantami Mandac Dios cancunata piñac gentecunata cachacpi, paicunata servinguichic. Chashnami yarcaihuan yacunayaihuan cashpapish, churana illac cashpapish, tucuilaya illac cashpapish paicunata servinguichic. Paicunaca fierro yugota apachic shinami, tucuchingacaman llaquichinga.

⁴⁹ Mandac Diosca mana entendipac rimaita rimac gentecunatami cai pacha tucurimanta apamunga. Paicunaca carumantami águila shina cungailla shamunga.

⁵⁰ Chai gentecunaca mai millaicuna cashpami yuyaccunatapish mana manchanga, shinallatac huahuacunatapish mana llaquingachu.

⁵¹ Paicunaca cancuna tucuringacamanmi cancunapac animalcuna mirashcatapish, allpapi pucushcatapish tucui micunga. Cancuna huañushpa tucuringacamanmi allpapi tucui pucushcatapish, animalcuna mirashcatapish tucui micunga. Shinami cancuna tucuringacaman trigotapish, mushuc vinotapish, aceitetapish, ovejacuna mirashcatapish, vacacuna mirashcatapish mana saquinga.

⁵² Chai gentecunaca tucui cancuna causana llactacunata jarcachishca jatun pircacuna, tucui urmangacamanmi muyunacunga. Chai jarcachishca pircacunahuanca cushillami carcanguichic. Mandac Dios cushca tucui cancunapac llactacunatapish, llactacunatapishmi muyunacushpa shayacunga.

⁵³ Cancunata piñaccuna muyundita shayacucpi, yalli yarcaihuan cashpami Mandac Dios cushca quiquin churicunacaman, ushicunacaman micunguichic.

⁵⁴ Chaimantami cancunapuramanta cuyanacushpa sumacta causac runapish paipac huauquita, huarmita, saquirishca churita piñailla ricunga.

⁵⁵ Chaica, paipac churipac aichata mana convidangaraicu piñalla ricunga. Paicunata piñaccuna tucui llactacunata muyushpa charicucpi, imapish mana tiyacpi, manchaihuanpish, llaquihuanpish causacushpami canga.

⁵⁶ Chai punzhacunapica cancunapuramanta cuyanacushpa sumacta causac, jaicapi mana lluchu chaquilla allpapi saruc, cuyac huarmipish paipac cuyana cusata, cuyana cari huahuata, huarmi huahuata piña ñahuihuan ricungami.

⁵⁷ Cancunapac llactacunata piñaccuna muyushpa llaquichicpi, ima micuna mana tiyacpimi, sajuarishca huahuatapish, catictapish pacalla micunga.

⁵⁸ Cai quillcashca mandashcacunapi tucui nicushcata cungarishpa, Mandac Diospac sumaimana manchana shutita mana cazucpica,

⁵⁹ Mandac Diosca unaita llaquichic, manchana plagacunata, yallita cachashpami, cancunapac huahua huahuacunatapish llaquichinga. Llaquichic ungüicunahuan, huañuchic ungüicunahuanmi

⁶⁰ Egipto llactapi llaquichishca shina manchana plagacunahuan llaquichinga. Chai plagacunaca cancunamantaca mana anchuringachu.

⁶¹ Mandac Diosca cai mandashcacunata quillcana libropi mana quillcashca, shuctac plagacunatapish, ungüicunatapish cancuna tucuringacamanmi cachanga.

⁶² Mandac Dios rimashcata mana uyashcamantami jahua pacha lucerocuna shina, achca cashpapish ashalla saquiringuichic.

⁶³ Mandac Diosca cancunata allita, achcata ruhuashpaca cushicurcami. Chashnallatacmi cancunata llaquichishpapish, tucuchishpapish cushicunga. Cancuna japishca allpamantaca anchuchishcami canguichic.

⁶⁴ Mandac Diosmi cancunataca cai pacha callari llactamanta tucuri llactacaman tucui llactacunata shic-huashpa cachanga. Chaipica caspimanta, rumimanta ruhuashca, cancunapac taitacunapish mana ricsishca dioscunatami adoranguichic.

⁶⁵ Chai llactapica mana samaringuichicchu. Chaqui plantapish mana samaringachu. Cancuna chaipi cacpica, Mandac Diosca cancunapac shungupica manchaitami churanga. Chaimantami llaquilla shungu puringuichic. Llaquilla ñahuicunami puringuichic.

⁶⁶ Cancunapac causai pitirinalla puchcahuan huarcushca shina cacpimi, tutapish, punzhapish manchailla canguichic.

⁶⁷ Cancunapac ñahuihuantac ricushpa, manchai shunguhuan cashpami tutaca: “¡Utca pacarinmanlla!” ninguichic. Cutin punzhaca: “¡Utca tutayanmanlla!” ninguichic.

⁶⁸ Mandac Diosca: “Egipto llactamanca manatac cai ñantaca cutinguichicchu” nircami. Shina cacpipish, chai ñanllatatacmi barcopi apanga. Chai llactapimi caripish, huarmipish cancunata piñaccunata servingapac caturisha ninguichic. Shina yuyacucpipish pi mana randisha ningachu» nirca.