DEUTERONOMIO 27 - Dios Rimashcata Quillcashcami

Rumicunapi quillcashca mandashcamanta

¹ Moisespish, israelcunata pushac yuyaccunapish israelcunata rimashpaca: «Cunan ñuca huillashca mandashcacunata pactachinguichic.

² Mandac Dios cushca llactaman ringapac Jordán yacuta pasashca punzhapica jatun rumicunata shayachishpami calhuan yuracyachina canguichic.

³ Mandac Dios ñaupa taitacunaman cushami nishca llactaman yaicungapac pasashpaca cai mandashcacunata chai rumipi quillcanguichic. Chai llactaca lechepish, mishquipish yacu shina tiyac llactami.

⁴ Cunan ñuca mandashca shina Jordán yacuta pasashpa, Ebal urcupi rumicunata shayachishpa, calhuan yuracyachinguichic.

⁵ Chaipi rumicunamanta shuc altarta Mandac Diosman ruhuanguichic. Chai rumicunataca ama fierrohuan labranguichicchu.

⁶ Chai mana labrashca rumicunahuan ruhuashca altarpi Mandac Diosman cushpa, animalta tucui rupachinguichic.

⁷ Shinallatac Dios-huan alli tucungapacpish animalta cunguichic. Chaipi micushpa, Mandac Diospac ñaupapi cushicunguichic.

⁸ Chai rumicunapica cai mandashcacunata tucui ricunallata quillcanguichic» nirca.

⁹ Chaimantaca Moises-huan levita curacunahuan israelcunata rimashpaca: «Israelcunalla, upalla caita uyaichicyari. Cunanmi cancunaca Mandac Dios acllashca tucushcanguichic.

¹⁰ Mandac Dios tucui nishcata cazunguichic. Tucui pai mandashcacunatapish, pactachinacunatapish cazunguichic» nirca.

Ebal urcupi maldiciashcamanta

¹¹ Chai punzhapi Moisés israelcunata mandashpaca:

¹² «Jordán yacuta cancuna pasacpica, Simeonpac, Levipac, Judapac, Isacarpac, Josepac, Benjaminpac aillucunami israelcunata bendiciangapac Gerizim urcupi shayaringa.

¹³ Cutin Rubenpac, Gadpac, Aserpac, Zabulonpac, Danpac, Neftalipac aillucunaca maldiciangapacmi Ebal urcupi shayaringa.

¹⁴ Levitacunaca israelcunataca:

¹⁵ “Caspimanta, mana cashpaca fierrota yacuyachishpa imamanpish riccha, Mandac Dios millanayachishca diosta ruhuashpa, pacallapi churacca, llaqui tucushca cachun” nishpa caparicpica, tucui gentecunami: “¡Chashna cachun!” ninga.

¹⁶ Cutin: “¡Taita mamata mana ricunayachicca, llaqui tucushca cachun!” nicpica, tucui gentecunami: “¡Chashna cachun!” ninga.

¹⁷ Cutin: “¡Maijanpac allpa linderota yaicurishpa, llaquichicca, llaqui tucushca cachun!” nicpica, tucui gentecunami: “¡Chashna cachun!” ninga.

¹⁸ Cutin: “¡Ñahui mana ricuc runata ñanta pandachicca, llaqui tucushca cachun!” nicpica, tucui gentecunami: “¡Chashna cachun!” ninga.

¹⁹ Cutin: “¡Shuctac llactata runacuna, taita mama illaccuna, viudacuna japinata shucman cucca, llaqui tucushca cachun!” nicpica, tucui gentecunami: “¡Chashna cachun!” ninga.

²⁰ Cutin rimashpaca: “¡Taitapac huarmihuan sueñushpa, taitata pingaichicca, llaqui tucushca cachun!” nicpica, tucui gentecunami: “¡Chashna cachun!” ninga.

²¹ Cutin: “¡Huarmihuan chayaric shina animalhuan chayaricca, llaqui tucushca cachun!” nicpica, tucui gentecunami: “¡Chashna cachun!” ninga.

²² Cutin: “¡Taitamanta, mana cashpaca mamamanta panihuan sueñucca, llaqui tucushca cachun!” nicpica, tucui gentecunami: “¡Chashna cachun!” ninga.

²³ Cutin: “¡Suegrahuan sueñucca, llaqui tucushca cachun!” nicpica, tucui gentecunami: “¡Chashna cachun!” ninga.

²⁴ Cutin: “¡Maijanta pacalla japishpa huañuchicca, llaqui tucushca cachun!” nicpica, tucui gentecunami: “¡Chashna cachun!” ninga.

²⁵ Cutin: “¡Mana faltayuc runata huañuchingapac cullquita japicca, llaqui tucushca cachun!” nicpica, tucui gentecunami: “¡Chashna cachun!” ninga.

²⁶ Cutin: “¡Cai mandashcapi ima nishcacunata mana cazushpa, mana pactachicca, llaqui tucushca cachun!” nicpica, tucui gentecunami: “¡Chashna cachun!” ninga.