DEUTERONOMIO 26 - Dios Rimashcata Quillcashcami

Punta pucushca granota cunamanta

¹ Mandac Dios cushca llactaman yaicushpa, chaipi causacushpaca,

² punta pucushca granota shuc canashtapi churashpa, Mandac Dios paipac shuti causachun acllashca pushtuman apanguichic.

³ Chaita, chai punzhapi servicuc curaman cushpaca: “Cunanmi Mandac Dios ñucanchic ñaupa taitacunaman cungapac ari nishca llactapi causacunchic” ninguichic.

⁴ Cura chai canashtata japishpa, Mandac Diospac altar ñaupapi churacpi,

⁵ cancuna Mandac Diospac ñaupapi rimashpaca: “Ñaupa taitaca llaquita puric arameo runami carca. Paica Egipto llactaman rishpami chaipi causarca. Paica ashalla familia cashpapish mirashpa, jatun llacta tucushpami, yalli sinchicuna tucurca.

⁶ Egipto runacunaca yallita servichishpami llaquichirca. Sinchitami trabajachirca.

⁷ Chaipimi ñaupa taitacunata Mandac Diosta mañarcanchic. Paica ñucanchic mañashcata uyashpami sinchita trabajacushcata shinallatac ñucanchic llaquita causacushcata ricurca.

⁸ Chaimantami Mandac Diosca paipac poderhuan, jatun milagrocunata ricuchishpa, pi mana ruhuaipaccunata ruhuashpa, Egipto llactamantaca llucchimurca.

⁹ Chashna caiman apamushpami lechepish, mishquipish yacu shina tiyac cai sumac llactata curca.

¹⁰ Mandac Dioslla, can cushca allpapi punta pucushcatami apamunchic” ninguichic. Chai canashtata Mandac Diospac ñaupapi churashpa, cancunata Mandac Diosta alli nishpa cumuringuichic.

¹¹ Chai quipaca cancunamanpish, cancunapac familiamanpish Mandac Dios tucui allicunata cushcamantami levitacunahuanpish, cancunahuan causac shuctac llacta runacunahuanpish cushicuna canguichic.

Huacchacunaman ima illashcata cuna cashcamanta

¹² Cada quimsa huatami chungamanta shucta cuna huata. Chaicunata cushca quipaca levitacunaman, carumanta shamushcacunaman, taita mama illaccunaman, viudacunaman cunguichic. Chashna cucpimi, cancunapac llactapi causaccunaca huicsa pactata micunga.

¹³ Chaimanta Mandac Diostaca: “Ñami cambaclla chicanyachishcataca ñucanchic huasimanta llucchimunchic. Can mandashca shinami levitacunamanpish, carumanta shamushcacunamampish, taita mama illaccunamanpish, viudacunamanpish curcanchic. Can mandashcacunataca mana cungarishpami tucuita pactachircanchic.

¹⁴ Chaicunataca huañuimanta llaquilla cashpapish mana micushcanchicchu, mapa cashpapish imata mana ruhuashcanchicchu, huañushcacunamanpish mana carashcanchicchu. Ñucanchicta Mandac Dios nishcata ruhuashpami tucui pai mandashcacunata pactachishcanchic.

¹⁵ Can tiyacuc sumaimana jahua pachamanta can acllashca israelcunatapish, ñucanchic taitacunaman cungapac ari nishca allpatapish bendiciaiyari. Chai allpaca lechepish mishquipish yacu shina callpacucmi” ningui.

¹⁶ Mandac Diosca cunan mandashcacunatapish, pactachinacunatapish cazuchunmi mandan. Caicunataca tucui shunguhuan, tucui almahuan yuyarashpa cazunguichic.

¹⁷ Cunanmi cancunallatac tucuipac ñaupapi: “Mandac Diosca ñucanchic Diosmi” nishcanguichic. Shinashpaca pai munashca shina causashpa, mandashcacunatapish, pactachinacunapish cazushpa, pai ima nishcata uyanguichic.

¹⁸ Mandac Dios pai munashca shina, cancunata rimashpaca: “Ñucapaclla acllashcami canguichic” nishcami. Tucui pai mandashcacunata cazuchunmi chashna acllashca.

¹⁹ Cancunataca tucui pai ruhuashca llactacunamanta ashtahuan yalli cachun, tucuipac ricsishca, tucuipac alli nishca llacta cachunmi Mandac Diosca pai munashca shina acllashca ninguichic» nirca.