DEUTERONOMIO 24 - Dios Rimashcata Quillcashcami

¹ Maijan cari shuc huarmihuan cazarashpa, chai huarmipi ima mana allita ricushpa, mana ricunayachishpaca, raquirishca quillcata paiman cushpa, huasimanta cachanallami.

² Chashna huasimanta cachacpica, huarmica shuctac carihuan cazarai pudinmi.

³ Chai cusapish manallatac ricunayachishpa raquirishca quillcata huarmiman cushpa, huasimanta cachacpi, mana cashpaca cusa huañucpica,

⁴ punta cusaca mana cutinllatac chai huarmihuan cazarai pudinchu. Chai huarmica mapayashcami can. Shina ruhuashpaca Mandac Diospac ñaupapi millanatami ruhuan. Mandac Dios cancunaman cushca llactataca juchata ruhuashpa, mana mapayachinachu canguichic.

⁵ Maijan cunanlla cazarashca cashpaca, jatun macanacuimanpish, ima shuctac ruhuaicunamanpish mana rinachu can. Ashtahuanpish huarmita cushichishpami, shuc huatata huasillapi cana can.

⁶ Imata mañachishpaca, ama cutana rumicunata prendashpa apanguichicchu. Shina apashpaca, causaipac minishtishcatami apanguichic.

⁷ Maijan huauquita shuhuashpa, llaquichishpa charicucpi, mana cashpaca catushca cacpi, yachac chayashpaca, chai shuhuactaca huañuchinami canguichic. Chashna ruhuashpami, cancunapac chaupimanta millaita anchuchinguichic.

⁸ Lepra ungüi ricuricpica, levita curacuna mandashcata allita yachacunguichic. Paicuna tucui nishcata ruhuanguichic. Ñuca nishcacunataca tucuita pactachinguichic.

⁹ Mandac Dios Egipto llactamanta llucchimucucpi, Mariata imata ruhuashcata yuyaringuichic.

¹⁰ Huauquiman imata mañachishpaca, ama prendata japingapac huasiman yaicunguichicchu.

¹¹ Mañac runa cutichingacaman canzhallapi shuyanguichic.

¹² Chai huaccha runapac prendata charicushpaca, ama cayacaman charicunguichicchu.

¹³ Chai prendataca manarac inti tigracpi cutichinguichic. Shina cutichicpimi, paica cushilla canta alli nishpa sueñunga. Shinallatac Mandac Diospac ñaupapipish cashcata ruhuac nishcami canguichic.

¹⁴ Imata mana charic, huaccha trabajac runataca cancunapura cacpipish, shuc llacta runa cancunapac llactapi causac runa cacpipish, ama llaquichinguichicchu.

¹⁵ Trabajac runamanca manarac inti tigracpi, chai punzhallatac paganguichic. Paica huacchami, chai pagana cullquillatami charin. Chashna pagacpica, cancunata Mandac Dios llaquichichun mana mañangachu. Shina mana mañacpica, juchayucchu tucunguichic.

¹⁶ Taitacunaca mana churicunapac juchamantaca huañungachu. Churicunapish mana taitacunapac juchamanta huañungachu. Ashtahuanpish quiquin juchamantaca, quiquinllatacmi huañunga.

¹⁷ Shuctac llacta runa japinatapish, taita mama illaccuna japinatapish ama quichunguichicchu. Viudamantapish ama prendata japinguichicchu.

¹⁸ Chaipac randica, cancunapish Egipto llactapi servishpa causacucpi, Mandac Dios llucchishcata yuyaringuichic. Chaimantami ñucaca caita cancuna ruhuachun mandani.

¹⁹ Cancunapac trigota cosechapi, shuc gavilla cungarishpa saquirishcataca ama apangapac cutinguichicchu. Chaicunataca shuctac llacta runaman, taita mama illac huahuacunaman, viudacunaman saquinguichic. Shina ruhuacpimi, Mandac Diosca tucui cancunapac maquihuan ruhuashcata bendicianga.

²⁰ Olivosta pallacushpaca, ama saquirishcata cutin pallanguichicchu. Chaicunaca shuctac llacta runaman, taita mama illac huahuacunaman, viudacunaman saquinguichic.

²¹ Uvas chagrata pallacushpaca, ama saquirishcata cutin pallanguichicchu. Chaicunataca shuctac llacta runaman, taita mama illac huahuacunaman, viudacunaman saquinguichic.

²² Cancunapish Egipto llactapi servishpa causashcata yuyaringuichic. Chaimantami caicunata ruhuachun mandani.