DEUTERONOMIO 23 - Dios Rimashcata Quillcashcami

Maijancunalla Mandac Diospac tandanacuiman yaicuna cashcamanta

¹ Mandac Diospac tandanacuimanca ruru ungushca, mana cashpa capashcacunapish mana yaicungachu.

² Huainayashpa charishca huahuapish Mandac Diospac tandanacuimanca mana yaicungachu. Paicunapac chunganiqui miranacuicamanmi Mandac Diospac tandanacuimanca mana yaicunga.

³ Amonitacunapish, moabitacunapish Mandac Diospac tandanacuimanca mana yaicungachu. Paicunapac chunganiqui miraicunapish Mandac Diospac tandanacuimanca mana yaicungachu.

⁴ Paicunaca, cancuna Egipto llactamanta llucshimucpica, micunallahuanpish, yacullahuanpish mana tupangapac llucshircachu. Ashtahuanpish Mesopotamia llactapi tiyac Petormanta Beorpac churi Balaamtami cancunata maldiciachun apamurca.

⁵ Ashtahuanpish Mandac Diosca Balaamtaca mana uyasha nircachu. Mandac Diosca cuyanmi. Chaimantami maldicianapac randica bendiciarca.

⁶ Paicunahuanca jaicapi ama apanacunguichicchu, shinallatac alli causachunpish ama saquinguichicchu.

⁷ Edomitacunaca cancunapac huauquicunami, chaimanta paicunataca ama millanguichicchu. Cancunaca Egiptopica pozashpallami causarcanguichic. Chaimanta Egipto runacunatapish ama millanguichicchu.

⁸ Paicunaca quimsaniqui miraicamanmi Mandac Diospac tandanacuimanca mana yaicunga.

Carpa huasipi chuyanlla causanamanta

⁹ Cancunata piñaccunahuan macanacungapac llucshishpaca, tucui mana allimanta cuidaringuichic.

¹⁰ Cancunamanta maijan tuta musparishpa mapayashpaca, campamentomanta llucshishpa, mana cutin yaicunachu can.

¹¹ Manarac tutayacpimi, yacuhuan armarishpa, inti tigrashca quipa carpa huasimanca yaicuna can.

¹² Carpa huasimanta carupimi mapayachingapac shuc pushtuta ricushpa, chaiman llucshina canguichic.

¹³ Shuc ishtacata cinturapi apanguichic. Ishpangapac llucshishpaca chai ishtacahuan jutcushpa pambanguichic.

¹⁴ Mandac Diosmi cancunata ayudashpa, piñaccunata cancunapac maquipi churangapac, carpa huasi chaupipi purin. Chaimantami carpa huasica Diospaclla, shinallatac chuyaclla cana can. Mapa cacpica, Mandac Diosca anchuringami.

Shuctac yachachishcacunamanta

¹⁵ Shuc servic amopacmanta miticushpa, cancunapacman chayacpica, ama amopacllamanta cutichishpa cachanguichicchu.

¹⁶ Paillatac cancunapac maijan llactata acllashpa cancunapac chaupipi causachun saquinguichic. Ama paita llaquichinguichicchu.

¹⁷ Israelcunapurapica cullquimanta huainayac huarmipish, caripurapica chayarinacuc caripish mana tiyanachu can.

¹⁸ Mandac Diospac huasimanca ama huainayashpa japishca cullquita apamunguichicchu. Caripura chayarinacushpa japishca cullquitapish ama apamunguichicchu. Mandac Diosca ishcaitatacmi millanayachin.

¹⁹ Huauquiman cullquita, micunata, ima shuctac mañachishpaca, interesta cobraccuna shina ama cobranguichicchu.

²⁰ Shuctac llacta runacunamantaca cobranguichiclla. Shina cashpapish, huauquimantaca mana cobranachu canguichic. Chashna cacpimi, Mandac Diosca cancuna japigricuc llactapica tucui imata ruhuacpipish bendicianga.

Cusha nishcata pactachinamanta

²¹ Mandac Diosman imata cusha nishpaca, ama unayashpa, utca cunguichic. Mana cucpica, Mandac Diosca cuchun ningami. Chaimanta juchayucmi tucunguichic.

²² Cutin paiman mana cusha nishpaca, mana cushpapish, mana cushpapish mana juchayucchu tucunguichic.

²³ Cancunapac shimihuan cusha nishcataca pactachinami canguichic. Mandac Diosman cushami nishcata, cunami canguichic. Chashnami cancunapac shimihuan cusha nishcata pactachina canguichic.

Shucpac allpapi ima shina canamanta

²⁴ Huauquipac uvas chagrapi yaicushpaca, huicsa pactatami micui pudinguichic. Ashtahuanpish apangapac ama canashtapi churanguichicchu.

²⁵ Shucpac chagrata pasashpaca shuc espigata piti pudinguichicmi. Shina cashpapish hoces-huanca mana pitinachu canguichic.