DEUTERONOMIO 22 - Dios Rimashcata Quillcashcami

¹ Huauquipac huagrata, mana cashpaca ovejata tarishpaca, ama upalla saquinguichu. Chaitaca cutichinami cangui.

² Huauqui carupi causacpi, mana cashpaca pipac cashcata mana yachashpaca, cambac huasipi charicungui. Pai mashcashpa shamucpica cutichingui.

³ Chashnallatac huauquipac burrotapish, churanatapish cutichingui. Imatami taringui, chaitaca cutichinami cangui. Ama upalla saquiringuichu.

⁴ Huauquipac burrota, mana cashpaca huagrata ñanpi urmashpa siricucta ricushpaca, ama saquinguichu, ama mana ricuc tucunguichu, ashtahuanpish utca jatarichingui.

⁵ Huarmica ama cari churanata churarichun, caripish ama huarmi churanata churarichun. Mandac Diosca chashna churariccunataca millanayachinmi.

⁶ Maita ricushpa, sacha jahuapi, mana cashpaca allpapi shuc zhuta huahuacunata, mana cashpaca rurucunata ucllashpa siricucta ricushpaca, ama mamata huahuacunandi japinguichu.

⁷ Unaita allita causangapacca, mamata richun saquishpa, huahuatami japina canguimi.

⁸ Shuc huasita ruhuashpaca, maijanpish ama urmachun terrazapi jarcarinata ruhuangui. Chaimanta maijan urmashpa huañucpica, canmi chai huañushcamantaca juchanchishca cangui.

⁹ Uvasta chagrapica ama shuctac muyutapish tarpunguichu. Chashna ruhuacpica, uvaspish, chaishuc muyupish chingaringami.

¹⁰ Ama huagrahuan, burrohuan chullashpa yapunguichu.

¹¹ Ama lino puchcahuan, millma puchcahuan ahuashca churanata churaringuichu.

¹² Jahuata churanapica chuscu esquinapi flecoscunata ruhuangui.

Cunanlla cazarashcacunata mandashcamanta

¹³ Shuc runa solterahuan cazarashpa, chayarishca quipa mana ricunayachishpa,

¹⁴ juchanchingaraicu llullashpaca: “Cai huarmihuan cazarashpa, paihuan sueñushpaca, shuc-huan chayarishcatami ricuni” ningami.

¹⁵ Chashna nicpica, chai solterapac taita mamami mana pihuan chayarishcata ricuchic pañota apashpa, chai llactata pushac yuyaccunaman ricuchingapac, chai llacta yaicunaman ringa.

¹⁶ Chaipimi solterapac taitaca: “Ñuca ushitami cai runaman cazarachun curcani. Cunanca, mana ricunayachinchu.

¹⁷ Paica: ‘Shuc-huan chayarishcatami ricuni’ nishpami, yanga juchanchin. Caipimi ñuca ushi mana shuc-huan chayarishcata ricuchic pañoca” nishpami, chai llactata pushac yuyaccunapac ñaupapi, chai pañota tendishpa ricuchinga.

¹⁸ Shina nicpica, chai llactata pushac yuyaccunaca chai runata japishpa macangami.

¹⁹ Llullashpa, Israel solterata llaquichishcamantami patsac cullquita chai solterapac taitaman pagashpa, huañuicaman paipac huarmi cachun chasquina can.

²⁰ Cutin ciertota chai soltera shuc-huan chayarishca cacpica,

²¹ paipac taitapac huasi punguman llucchishpami, chai llacta gentecuna rumihuan shitashpa huañuchina can. Chashna ruhuashpami cancunapac chaupimantaca juchata anchuchinguichic. Chai soltera paipac taitapac huasipi shuc-huan chayarishpami israelpurapi millaita ruhuashca.

Chayarishpa juchata ruhuashcamanta

²² Maijan shuc runa, shucpac huarmihuan chayarinacucucta japishpaca, ishcaitatacmi huañuchina can. Chashnami runapish, huarmipish huañuna can. Chashnami israelpuramanta juchata anchuchinguichic.

²³ Carihuan manarac chayarishca, cazarangapac shuc carihuan ari nishca solterapi shuc runa chayaricucta japishpaca,

²⁴ ishcaitatacmi chai llacta yaicunaman llucchishpa, rumihuan shitana canguichic. Chai solterataca llactapi japiricucpi, mana caparishcamanta, cutin runataca shuc-huan cazarangapac ari nishca solterata japirishcamantami chashna huañuchina can. Chashnami cancunapac chaupimanta juchata anchuchinguichic.

²⁵ Shuc carihuan cazarangapac ari nishca solterata campopi uyai mana uyai shuc runa japirishpaca, chai japiric runallami huañuna can.

²⁶ Cutin solterataca mana imata ruhuanachu. Paica mana ima huañuna juchata ruhuashcachu. Paitaca shuhuangapac japishpa, huañuchic shinami ruhuashca.

²⁷ Paica campopimi carca. Pai caparicpipish, mana pi misangapac shamunmanchu carca.

²⁸ Shuc runa mana pihuan ari nishca, mana pihuan chayarishca solterata uyai mana uyai japirishca yacharicpica,

²⁹ chai japiric runami pichca chunga cullquita solterapac taitaman pagana can. Shinallatac chai solterataca paipac huarmi cachunmi chasquina can. Chai solterata japirishcamantami tucui causaipi mana shitai pudin.

³⁰ Pipish paipac taitapac huarmihuan cazarashpa, paipac camatata mana yangapi churanachu can.