DEUTERONOMIO 20 - Dios Rimashcata Quillcashcami

Jatun macanacuicunamanta

¹ Cancunata piñaccunahuan macanacungapac llucshishpa caballocunata, carretacunata achcata ricushpa, achca gentecunata ricushpaca, ama manchanguichicchu. Cancunaca Egipto llactamanta llucchimuc Mandac Dios-huanmi canguichic.

² Ña macanacui callaricpica, shuc cura ñaupa rishpami israelcunataca:

³ “Israelcuna caita uyaichic. Cunanmi, cancunata piñaccunahuan macanacungapac ringuichic. Paicunapac ñaupapica ama chucchuichicchu. Ama manchaichicchu, ama manchailla caichicchu, ama manchai shungu caichicchu.

⁴ Mandac Diosmari cancunamanta cancunata piñaccunahuan macanacungapac rin. Paimi macanacuita mishachinga” nirca.

⁵ Quipa mandaccuna tucui israelcunata rimashpaca: “¿Maijantac huasita shayachishpa, manarac chai huasipi causanguichic? Cutishpa chai huasipi causagrichic. Pacta macanacuipi huañucpi, shuc runarac chai mushuc huasipi causanman.

⁶ ¿Maijantac uvas chagrata tarpushpa, manarac cosechanguichic? Chashna cashpaca huasiman cutichiclla. Pacta macanacuipi huañucpi, shuctac runa chai chagrata cosechashpa cushicunman.

⁷ ¿Maijantac shuc huarmihuan cazarangapac ari nishpa shamurcanguichic? Chashna cashpaca, huasiman cutichiclla. Pacta macanacuipi huañucpi, shuctac runa cazaranman” nirca.

⁸ Cutinllatac quipa mandaccuna israelcunata rimashpaca: “¿Cancunapurapi maijantac manchaihuan, mana cashpaca shaicushca shina canguichic? Chashna cashpaca, huasiman cutichiclla. Pacta shuccunatapish manchaipi churanman” nirca.

⁹ Quipa mandaccuna tucuita rimashca quipaca macanacuccunapac ñaupata richunmi soldadocunata acllanga.

¹⁰ Shuc llactapi macanacungapac chayashpaca cushi causaimanta parlashun ninguichic.

¹¹ Chai llactapi causaccuna cushi causaimanta parlashun nishpa llacta punguta pascacpica, chaipi tucui causaccunami cancunaman impuestota pagashpa, servishpa causanga.

¹² Ashtahuanpish paicuna cushi causaimanta parlasha nishpa, macanacui callaricpica, tucui muyundi llactata muyushpa macanacunguichiclla.

¹³ Mandac Dios cancunapac maquipi churacpica, tucui caricunata espadahuan huañuchinguichic.

¹⁴ Huarmicunatapish, huahuacunatapish, animalcunatapish, chai llactapi imalla tiyashcacunatapish japinguichic. Cancunata piñaccunamanta quichushcata micunguichic. Chaicunataca Mandac Diosmi curca.

¹⁵ Chashnami cancuna causacuc llactamanta carupi tiyac llactacunataca tucuchina canguichic.

¹⁶ Mandac Dios cancunaman cushca llactacunapi tiyac llactacunapi causaccunataca shucllatapish ama saquishpa, tucui huañuchinguichic.

¹⁷ Mandac Dios mandashca shina, chai llactacunapi causac heteocunatapish, amorreocunatapish, cananeocunapish, ferezeocunatapish, heveocunatapish, jebuseocunatapish tucui tucuchinguichic.

¹⁸ Chashna ruhuacpimi, paicunapac dioscunata adorashpa millana juchacunataca cancunaman mana yachachinga. Cancuna chashna ruhuashpami, mana Mandac Diospac ñaupapi juchallinguichic.

¹⁹ Maijan llactapi causaccunahuan macanacushpa, chai llactata quichungapac tauca punzhacunata chai llacta muyushpa tiyacushpaca, ama yuracunata pitinguichicchu. Chai yuracunamantami micunguichic. Chai yuracunaca mana runacuna shina piñashpa cancunata muyunacushpa macangapac shamungachu. Chaimanta ama tucui pitinguichicchu.

²⁰ Ashtahuancarin maijan mana pucuc yuracunataca pitishpa, chai llactahuan macanacuna baluartecunata ruhuanguichiclla.