DEUTERONOMIO 19 - Dios Rimashcata Quillcashcami

Miticuna llactacunamanta

¹ Mandac Dios cugricuc llactacunapi causaccunata tucuchishpa, cancunaman cucpica, cancunaca llactacunapi, huasicunapi causanguichic.

² Mandac Dios cushca llactata cancunaman cucpica, quimsa llactacunata chicanyachinguichic.

³ Mandac Dios cushca llactataca quimsapi chaupishpa, chai llactacunaman rina ñancunatapish allichinguichic. Maijan huañuchishpa, chai llactacunapi miticugrichunmi chicanyachina canguichic.

⁴ Chai llactacunapimi maijan manapish piñashca cashpa, shuc runata huañuchishpaca miticugringa. Chaiman rishpami paipish mana huañuchishca canga.

⁵ Chaica shuc runa paipac ricsishcahuan yantacushpa, hachahuan yurata piticucpi, hacha fierro cabomanta llucshishpa, ricsishca runata huañuchicpica, chai huañuchic runaca chai llactacunapi miticugrishpami, mana huañunga.

⁶ Chai miticuna llacta yalli caru cacpi, huañuchishcamanta piñarishpa paitapish huañuchingapac cati rishpa, pacta huañuchinman. Paica manapish piñanacushca cashpami huañuchirca. Chaimanta paitaca mana huañuchinachu can.

⁷ Chaimantami cancunataca quimsa llactacunata chicanyachichun mandani.

⁸ Mandac Diosca cancunapac ñaupa taitacunaman cungapac ari nishca shinallatacmi chai llactataca ashtahuan mirachishpa, tucui allpacunata cancunaman cunga.

⁹ Cai ñuca mandashcacunata yuyarashpa pactachinguichic. Mandac Diosta cuyashpa, punzhanta paita cazushpaca, cai quimsa llactacunamanta shuctac quimsahuanmi yapachinguichic.

¹⁰ Chashna causashpami Mandac Dios cushca llactapica manapish faltayuc runapac yahuarta mana jichanguichic. Shinallatac cancunapish chai yahuarmanta mana juchanchishcachu canguichic.

¹¹ Maijanpish shuctac runata piñashpa, mana cashpaca huañuchishpa, chai chicanyachishca maijan llactaman miticungapac ricpica,

¹² cancunapac llactapi causac yuyaccunami chai pueblomanta llucchichun cachanga. Chashna llucchishpami paitapish huañuchichun huañucpac familiapac maquipi churanga.

¹³ Chai runataca ama llaquinguichicchu. Chashna ruhuacpimi, israelpurapica manapish faltayucpac yahuarta jichacca mana tiyanga. Shinallatac cancunapish allita causanguichic.

¹⁴ Mandac Dios cushca llactapi causacushpaca, ñaupa taitacuna churashca vecinopac linderocunata ama yaicuringuichu.

Llullac huillaccunamanta

¹⁵ Ima llaquita, mana cashpaca ima juchata ruhuashcata shuc testigolla huillacpica, mana imata ruhuanachu can. Ashtahuanpish ishcai, mana cashpaca quimsa runa ricushpa huillacpimi, imatapish ruhuana can.

¹⁶ Maijan shuc runata llaquichingaraicu llullashpa huillashpa juchanchicpica,

¹⁷ ishcaitacmi Mandac Diospac ñaupapi, chai punzhapi cac curacunapacman, juezcunapacman rina can.

¹⁸ Chaipimi juezcunaca tucui nishcata allita uyashpa, chai huillac paipac huauquita yangalla juchanchicushcata yachac chayashpa,

¹⁹ pai juchanchishpa llaquichinata munashca shinallatac paitarac llaquichinga.

²⁰ Shina ruhuashcata caishuccuna uyashpaca, manchashpami cancunapac chaupipica mana ashtahuan millaita ruhuanga.

²¹ Millaita ruhuaccunataca mana llaquishpami tucuchina canguichic. Maijan ñahuita surcucpica, paitapish ñahuita surcunguichic. Quiruta surcucpica, paitapish quiruta surcunguichic. Maquita, chaquita paquicpica, paitapish paquinguichic.