DEUTERONOMIO 18 - Dios Rimashcata Quillcashcami

Levita curacuna imata japina cashcamanta

¹ Leví aillu curacunaca mana israelcunahuan pacta allpata japingachu. Paicunaca Mandac Diosman cushpa rupachishcacunata, Diospaclla chicanyachishcacunatami micunga.

² Paicunapac huauquicunahuan pacta mana allpata japingachu. Mandac Dios nishca shinami, paicuna japina allpa shinaca Mandac Dios canga.

³ Curacunaca gentecuna Diosman cushpa rupachishca huagrata, mana cashpaca cari ovejatami japina can: Huasha aichata, quijada aichata, chunzhullitami japina can.

⁴ Punta pucushca granotapish, mushuc vinotapish, aceitetapish, punta rutushca oveja millmatapish cunguichic.

⁵ Mandac Diosmi paicunatapish, paicunapac churicunatapish huiñaita paipac shutipi servichun tucui aillumanta acllarca.

⁶ Israelcuna causana maijan llactapi shuc levita causacushpa, Mandac Dios acllashca pushtuman tucui munaihuan

⁷ paipac huauquicuna shinallatac Mandac Diospac shutipi servingapac shamushpaca, Mandac Diospac ñaupapimi caishuc levitacuna shinallatac servinga.

⁸ Micunatapish caishuccuna shinallatacmi charinga. Chaicunataca taitamanta imata japishca jahuami charinga.

Ama millaita ruhuashpa causachun nishcamanta

⁹ Cancuna Mandac Dios cushca llactaman yaicushpaca, ama chai llactapi causaccuna shina, millaita ruhuashpa causanguichicchu.

¹⁰ Cancunapuramanta maijanpish churita, ushita yanga diosman cushpa ama rupachichun. Shinallatac adivino canata, brujo canata, quipa ima tucunata huillac canata,

¹¹ muspachic canata mana munanachu can. Shinallatac huañushcacunata mañac canata, ayahuan parlac canata, huairata cric canataca mana munanachu can.

¹² Chai shina millaita ruhuaccunaca Mandac Diospac millanayachinmi. Chaimantami Mandac Diosca chai llactamanta llucchishpa cachanga.

¹³ Mandac Diospac ñaupapica imapipish ama pandaringuichicchu.

¹⁴ Cancuna japigricuc llactapi causaccunaca adivinaccunata uyaccuna, quipaman ima tucunata huillacta uyaccunami. Mandac Diosca mana chaita ruhuachun munanchu.

Moisés shinallatac huillacta Dios cachasha nishcamanta

¹⁵ Mandac Diosca cancunapuramantami ñuca shina shuc huillacta acllanga. Paita cazunguichic.

¹⁶ Mandac Diosca cancuna Horeb urcupi paita mañashpa: “Mandac Dios rimashcata mana uyasha ninchicchu. Cai jatun ninatapish mana ashtahuan ricusha ninchicchu, huañushunmi” nishca shinami ruhuanga. Chaipica tucui gentecunami tandanacushca carca.

¹⁷ Shina mañacpica, Mandac Diosca: “Chashna mañashpaca allitami nishcanguichic.

¹⁸ Cancunapac huauquipuramanta can shina ñucamanta huillacta cachashami. Paipac shimipi ñuca rimaicunata churacpimi, paica tucuita huillanga.

¹⁹ Maijanpish pai ñuca shutipi huillashcata mana cazuctaca ñucami juchanchisha.

²⁰ Maijan huillac ñuca shutipi manapish ñuca huillachicpi, mana cashpaca shuctac yanga dioscunapac shutipi huillacpica, chai huillactaca huañuchinguichic” nirca.

²¹ Cambac shungupica: “¿Ima shinatac Mandac Dios mana huillachishcataca yachashunyari?” ninguichicmi.

²² Chai huillac Mandac Diospac shutipi huillashcapish mana pactacpi, pai nishca shina mana tucucpica, pai huillashcaca mana Mandac Dios huillachishcachu canga. Chai huillacca pai jatun tucungapacllami huillanga. Chaimanta paitaca ama manchanguichicchu.