DEUTERONOMIO 17 - Dios Rimashcata Quillcashcami

¹ Mandac Diosmanca alli huagrata, alli ovejata cunguichic. Chai shina animalcunataca Mandac Diosca millanayachinmi.

² Mandac Dios cushca maijan llactapi, maijan cari cashpa, huarmi cashpa paihuan ari nishcata mana cazushpa, Mandac Diospac ñaupapi mana allita ruhuashpa,

³ shuctac dioscunata servishpa, chai dioscunapac ñaupapi cumuricucta, mana cashpaca intita, quillata, tucui lucerocunata adoracucta, chashna ñuca ama ruhuachun nishcacunata ruhuacucta

⁴ maijan huillacpica, allita tapushpa yachanguichic. Israelcunapurapi millanayaita ciertota ruhuashca cacpica,

⁵ carita, mana cashpaca huarmita llactamanta llucchishpa, llacta pungupi huañungacaman rumihuan shitanguichic. Chashna shitacpimi, chai mana allita ruhuacca huañunga.

⁶ Chai runataca ishcai, mana cashpaca quimsa testigo huillacpimi, huañuchina can. Shuclla huillac tiyacpica, mana huañuchinachu.

⁷ Testigoracmi millaita ruhuac runataca rumihuan shitana can. Quipami chai llactapi causaccunaca rumihuan shitashpa huañuchina can. Chashnami cancunapac chaupimantaca millaita anchuchinguichic.

⁸ Maijan llaquicuna mana allipac tiyangami. Chaica huañuchinacui, quichunacui, macanacui, mana cashpaca shucta piñanacui tiyacpica, Mandac Dios acllashca pushtumanmi rina canguichic.

⁹ Chaipi levita curacunaman, chai punzhapi mandac juezcunaman tapunguichic. Paicunami allita ricushpa, ima shina taripanatapish huillanga.

¹⁰ Mandac Dios acllashca pushtupi ima shina taripachun nishca shinallatac llaquichinguichic. Paicuna imata nishcata ruhuanguichic.

¹¹ Paicuna yachachishcata, imata ruhuanata yuyarinacushcata tucuita ruhuanguichic. Chashna taripacushpaca allimanpish, lluquimanpish mana ladoyashpami, allichina canguichic.

¹² Mandac Diosta servic curatapish, jueztapish maijan mana cazushpa, quiquin munashcata ruhuacpica, chai runataca huañuchinami canguichic. Chashnami israelpuramanta millaita anchuchinguichic.

¹³ Shina ruhuacpimi, tucui israelcuna manchashpa, mana quiquin munashcata ruhuanga.

Jatun mandacta churanamanta

¹⁴ Mandac Dios cugricuc llactata japishpa, chaipi causacushpaca: “Muyundi llactacunapi causaccuna shina, ñucanchicpish jatun mandacta churanatami munanchic” ninguichicmi.

¹⁵ Mandac Dios acllashca runata churanguichic. Cancunapac huauquicunapuramanta shuc runata mandachunmi churanguichic. Shuctac llactamanta cac, mana cancunapac huauquicunapura runataca ama churanguichicchu.

¹⁶ Chai jatun mandacca mana achca caballota charina yuyaita charinachu can. Caballocunata charingaraicu israelcunata Egipto llactaman mana cachanachu can. Mandac Diosca: “Chai llucshishca ñantaca jaicapi mana cutinachu canguichic” nircami.

¹⁷ Chai mandacca paipac shungupi mana pandaringapacca, mana achca huarmita charinachu can. Mana shungupi achca curita, cullquita charinata munanachu can.

¹⁸ Jatun mandac mandai callarishpaca, levita cura cuidacuc quillcashca libromantami copiata llucchina can.

¹⁹ Cai quillcashcataca punzhantami maquipi apashpa, rezana can. Chashna ruhuacpimi, cai libropi quillcachishcacunatapish, yachachishcacunatapish cazushpa, Mandac Diosta manchanata yachacunga.

²⁰ Chashna ruhuacpimi, paicunapac huauquicunapurapi mana jatun tucushpa, allimanpish lluquimanpish mana ladoyashpa, mandashcacunallata ruhuanga. Chashnami israelpurapica unaita paipish, huahuacunapish mandacungalla.