DEUTERONOMIO 16 - Dios Rimashcata Quillcashcami

Huata fiestacunamanta

¹ Mandac Diosca Egipto llactamantaca Abib quilla, shuc tutami cancunata llucchimurca. Chaimanta Abib quilla chayamucpica, Mandac Diosta yuyarishpa, Pascua fiestata ruhuanguichic.

² Chai punzhapica Mandac Dios paipac shuti causachun acllashca pushtupimi ovejata, mana cashpaca vacata paiman cushpa huañuchinguichic.

³ Chai aichataca levadura illac tandahuan micunguichic. Egipto llactamanta ima shina llucshishca punzhataca tucui cancunapac causaipi yuyaringuichic. Canchis punzhacunata levadura illac tandata micunguichic. Chai tandaca llaquita yuyarina tandami. Egiptomantaca huacta huactami llucshircanguichic.

⁴ Canchis punzhacamanmi cancunapac llactacunapica levadura illana can. Shinallatac callari punzha chishipi huañuchishca aichataca cayandi punzhapacca mana puchuchinachu canguichic.

⁵ Mandac Dios cushca llactapi cashpaca, ama maipipish animalta huañuchinguichicchu.

⁶ Ashtahuanpish Mandac Dios paipac shutita causachun acllashca pushtupimi huañuchina canguichic. Chaipimi chishi inti tigracpi, animaltaca huañuchina canguichic. Chai horasmi Egiptomantaca llucshircanguichic.

⁷ Mandac Dios acllashca pushtupi cusashpa micushpami, cayandi tutamantaca huasiman cutina canguichic.

⁸ Sucta punzhata levadura illac tandata micunguichic. Canchisniqui punzhaca Mandac Diospaclla chicanyachishca punzhami canga. Chai punzhapica ama trabajanguichicchu.

Pentecostés fiestamanta

⁹ Cosecha callari punzhamanta canchis semanata yupashpa,

¹⁰ Mandac Diosman Pentecostés fiestata ruhuanguichic. Chaipacca Mandac Dios bendiciashca shinami quiquin munaihuan ofrendataca apamuna canguichic.

¹¹ Mandac Dios paipac shutita causachun acllashca pushtupimi paipac ñaupapi cancunapac churicunahuan, ushicunahuan, servic caricunahuan, servic huarmicunahuan, cancunapac llactapi causac levitacunahuan, shuctac llacta runacunahuan, taita mama illaccunahuan, cancunapac llactapi causac viudacunahuan cushicuna canguichic.

¹² Egiptopi servic cashcataca yuyaringuichic. Chaimanta cai mandashcacunata yuyarashpa cazunguichic.

Chucllacuna ruhuana fiestamanta

¹³ Granota cosechashca, uvasta tandashca quipaca canchis punzhacaman chucllacunata ruhuana fiestata ruhuanguichic.

¹⁴ Chai fiestapica cancunapac churicunahuan, ushicunahuan, servic caricunahuan, servic huarmicunahuan, chaipi causac levitacunahuan, shuctac llacta runacunahuan, taita mama illaccunahuan, cancunapac llacta causac viudacunahuan cushicunguichic.

¹⁵ Mandac Dios acllashca pushtupi Mandac Diosman canchis punzhacaman fiestata ruhuanguichic. Mandac Diosca tucui cancunapac granota, tucui cancunapac maquihuan ruhuashcatami bendiciashca. Chaimanta yallitami cushicunguichic.

¹⁶ Cancunapac llactapi causac tucui caricunami huatapi quimsa cutin Mandac Dios acllashca pushtuman, paipac ñaupaman rina can. Chai fiestacunaca: levadura illac tandata micuna fiesta, pentecostés fiesta, chucllacunata ruhuana fiestami can. Chai fiestacunamanca pipish mana chushacllachu shamuna can.

¹⁷ Mandac Dios bendiciashca shinami cada shuc imatapish apamuna can.

Cashcata ruhuanamanta

¹⁸ Mandac Dios cancunaman cugricuc llactacunapica cashcata ruhuashpa mandachun juezcunatapish, shuctac mandaccunatapish churanguichic.

¹⁹ Cashcata ruhuanata ama saquinguichicchu. Ama ñahuita ricushpalla taripanguichicchu. Imata ruhuangapac ama imata pacalla japinguichicchu. Chai japishcami alli yachac cacpipish, ñahui mana ricucta shina ruhuan. Shinallatac cashcata ruhuactapish pandachinmi.

²⁰ Mandac Dios cushca llactata japishpaca, cashcata ruhuanguichic.

²¹ Mandac Diospac altar ladopica Asera huarmi diosta yuyarina yurataca ama tarpunguichicchu.

²² Mandac Dios mana ricunayachishca dioscunata yuyarina rumicunatapish ama shayachinguichicchu.