DEUTERONOMIO 15 - Dios Rimashcata Quillcashcami

Mañachishcata perdonana huatamanta

¹ Cada canchis huatapi imata mañachishcata perdonanguichic.

² Caitaca cashnami ruhuana: Maijanman imata mañachishpa, chai mañac mana cutichi pudicpica saquinami. Mañashcata perdonana huatata Mandac Dios churashcamantami maijanman, mana cashpaca huauquiman mañachishcataca mana cutichichun nina canguichic.

³ Maijan shuctac llacta runaman mañachishpaca cutichichun ninguichiclla. Ashtahuanpish cancunapac huauquiman mañashcataca saquinguichiclla.

⁴ Chaimantami Mandac Dios cushca llactapica cancunapurapica huacchacuna mana tiyanga. Ashtahuanpish Mandac Diosmi chai llactapica bendicianga.

⁵ Cunan ñuca mandashcata cancuna pactachingapac Mandac Dios rimashcata allita uyacpica,

⁶ pai nishca shinallatacmi Mandac Diosca bendicianga. Chaica, tauca llactapi causaccunamanmi mañachinguichic. Shina cashpapish cancunaca mana mañanguichicchu. Tauca llactacunatami sarunguichic. Cutin shuctac llactacunaca cancunataca mana sarui pudingachu.

Huacchacunaman mañachinamanta

⁷ Mandac Dios cancunaman cushca llactacunapi cancunapac huauqui imata minishticpica, ama misa canguichicchu, ama maquita huichcanguichicchu.

⁸ Ashtahuanpish imata mañacpica, ama misashpa maquita pascashpa mañachinguichiclla.

⁹ Cancunapac shungupica ama millai munaicunahuan: “Mañachishcata perdonana huata chayamucunmi” nishpa cancunapac huaccha huauquiman mana mañachingaraicu ama piña ñahuihuan ricunguichicchu. Chai huacchaca Mandac Diosta caparishpa mañangami. Chashna caparicpica, cancunami juchata aparinguichic.

¹⁰ Tucui mañashcata ama nanarishpa cunguichiclla. Chashna alli shunguhuan mañachicpimi, Mandac Diosca cancuna imata ruhuacpipish bendicianga.

¹¹ Cai llactapica huacchacunaca mana illangachu. Chaimantami cancunapac llactapi imata mana chariccunataca maquita pascashpa ayudana canguichic.

Serviccunapac mandashcamanta

¹² Cancunapac huauqui hebreopuramanta cari cashpa, mana cashpaca huarmi cashpa cancunaman caturicpica, sucta huatallata servichinguichic. Ña canchis huatapica cacharinguichiclla.

¹³ Shina cachashpapish ama chushac maquillata cachanguichicchu.

¹⁴ Mandac Dios bendiciashca cancunapac oveja manadamanta, trillana pambamanta, uvasta cutanamanta imallatapish cunguichic.

¹⁵ Egiptopi huatashca shina causacucpi, Mandac Dios llucchimushcata yuyaringuichic. Chaimantami ñucaca caita mandani.

¹⁶ Chai caturishca runa: “Cancunatapish, cancunapac huasi ucutapish cuyanimi, mana risha ninichu, allimi caipi cani”

¹⁷ nicpica, tucui causaipi cancunata servic cachunmi, jutcuna fierrota japishpa, huasi pungupi saunachishpa ringrita jutcuna canguichic. Cancunata servic huarmitapish chashnallatac ruhuanguichic.

¹⁸ Chai cancuna randishca runaca sucta huatatami shuc trabajac runa japina chaupi pagota japishpa servirca. Chaimanta paita cacharicushpaca ama caita chaita yuyashpa cachanguichiclla. Chashna cachacpimi, Mandac Diosca tucui cancuna ruhuashcata bendicianga.

Punta huacharishca cari animalta Diospaclla cashcamanta

¹⁹ Tucui punta huacharishca huagracunata, cari ovejacunata Mandac Diospaclla cachun chicanyachinguichic. Punta huacharishca huagrahuan ama trabajanguichicchu. Punta huacharishca ovejata ama rutunguichicchu.

²⁰ Chaicunataca Mandac Dios acllashca pushtupimi huatanta paipac ñaupapi cancunapac familiacunahuan micuna canguichic.

²¹ Shina cashpapish maijan animal mana alli cacpi, suchu, ñahui mana ricuc, imapish tucushca cacpica, ama Mandac Diosman cunguichicchu.

²² Cancuna causacushca llactapi micunguichic. Mana micuna animaltapish, micuna animaltapish gacelata, venadota shina micunguichiclla.

²³ Yahuartaca ama micunguichicchu, ashtahuanpish yacuta shinami allpapi tallina canguichic.