DEUTERONOMIO 14 - Dios Rimashcata Quillcashcami

¹ Cancunaca Mandac Diospac huahuacunami canguichic. Chaimanta maijan huañucpica, mana chugririnachu canguichic. Acchatapish mana pitirinachu canguichic.

² Cancunaca, Mandac Diospac acllashca, jucha illac gentecunami canguichic. Mandac Diosca chican gente cachunmi tucui cai pachapi causaccunamanta acllarca.

Micuna animalcunamantapish, mana micuna animalmantapish

³ Mana micuna nishcataca ama micunguichicchu.

⁴ Cai animalcunamantaca: Huagrata, ovejata, chivota,

⁵ venadota, gacelata, corzosta, sacha chivota, ibiceta, antilopeta, sacha ovejata micui pudinguichic.

⁶ Pallca shillu, mana cashpaca libruc tucui animalcunatami micui pudinguichic.

⁷ Shina cashpapish libruc animalcunamantaca: Camellota, liebreta, conejotami mana micuna canguichic. Chai animalcunaca libruc animalcuna cashpapish mana pallca shilluchu.

⁸ Cuchitapish ama micunguichicchu. Cuchica pallca shillu cashpapish mana librunchu. Chai aichataca ama micunguichu, huañushcapipish ama tuparinguichicchu.

⁹ Cutin yacupi causac animalcunamantaca: Tucui alasyuc, escamayuc animalcunatami micui pudinguichic.

¹⁰ Mana alasyuc, mana escamayuc animalcunataca ama micunguichicchu. Chaicunaca mana micunachu.

¹¹ Mana mapachu nishca, tucui volac animalcunatami micui pudinguichic.

¹² Shina cashpapish angata, tulluta paquic angata, azorta,

¹³ ullachuta, tucuilaya milanota,

¹⁴ tucuilaya cuervota,

¹⁵ avestruzta, corvejonta, gaviotata, tucuilaya halconta,

¹⁶ mashuta, pucuta, calamonta,

¹⁷ pelicanota, ullachuta, somormujota,

¹⁸ cigüeñata, tucuilaya garzata, abubillata, ucuchatapish mana micunachu canguichic.

¹⁹ Tucui alasyuc chuspicunami mapa nishca, chaimanta ama micunguichicchu.

²⁰ Tucui volac animalcunataca micuna cacpica micunguichiclla.

²¹ Imapish huañushca animaltaca ama micunguichicchu. Ashtahuanpish cambac llactapi pozashpa causaccunaman micuchun cunguichic, mana cashpaca shuctac llactamanta shamuccunaman catunguichic. Cancunaca, Mandac Dios chicanyachishca jucha illac gentecunami canguichic. Ama llullu chivota mamapac lechepi yanunguichicchu.

Chungamanta shucta cunamanta

²² Chagrapi pucushca granotaca chungamanta shuctaca ama cungarishpa huatanta cunguichic.

²³ Mandac Dios paipac shutita causachun acllashca pushtupi, Mandac Diospac ñaupapi chungamanta shucta cushca huagrata, mushuc vinota, aceiteta, punta huacharishca huagrata, ovejata micunguichic. Chashnami Mandac Diostaca tucui punzhacuna manchana canguichic.

²⁴ Mandac Dios chungamanta shucta bendiciacpi, Mandac Dios paipac shutita causachun acllashca pushtu caru cashcamanta, mana apai pudishpaca,

²⁵ cullquita cunguichic. Cullquita apashpami maipi Mandac Dios acllashca pushtuman ringuichic.

²⁶ Chai cullquihuanca shungu munashcata randinguichicllami. Chaica: Vacata, ovejata, vinota, timbushca vinota, ima munashcatami randi pudinguichic. Chaita randishpami Mandac Diospac ñaupapi cancunapac familiacunahuan micushpa cushicunguichic.

²⁷ Cancunapac llactapi causac levitacunata pacta cungaringuichicman. Paicunaca cancuna shina allpatapish, imatapish mana charinchu.

²⁸ Quimsa huatapica, huatapi cosechashcata tucui chungamanta shucta cushcata llactacunapi huacaichinguichic.

²⁹ Chaitami cancunahuan pacta mana allpata japishca, imata mana charic levitacunapish, pozashpalla causaccunapish, taita mama illac huahuacunapish, shinallatac cancunapac llactapi causac viudacunapish huicsa pactata micunga. Chashna cacpimi, Mandac Diosca cancuna imata ruhuacpipish bendicianga.