DEUTERONOMIO 12 - Dios Rimashcata Quillcashcami

Mandac Diospaclla huasimanta

¹ Ñaupa taitacunata Mandac Dios cushca llactata japishpa, huiñaita causangapacca pai mandashcacunatapish, yachachishcacunatapish cazushpa causanguichic.

² Cancuna japigricuc llactapi causaccunaca jatun urcucunapi, lomacunapi, sacha ucucunapimi dioscunata charin. Tucui chaicunataca polvonami canguichic.

³ Altarcunatapish, adorana rumicunatapish tigrachinguichic. Asera huarmi diosta yuyarina yuracunatapish ninapi rupachishpa, polvoshpa, paicunapac shuticunata chai llactapi chingachinguichic.

⁴ Cancunaca chai runacuna shinachu, Mandac Diosta servina canguichic.

⁵ Ashtahuanpish Mandac Dios, paipac shutita causachun churangapac acllashca pushtuman rishpa, chaipi paitaca alli nina canguichic.

⁶ Chaimanmi tucui rupachinatapish, paiman cunatapish, chungamanta shuctapish, alzashpa cuna ofrendatapish, cushami nishca ofrendatapish, quiquin munaimanta cuna ofrendatapish, punta huacharishca huagratapish, ovejatapish apana canguichic.

⁷ Chaipimi Mandac Diospac ñaupapi cancunapish, familiacunapish cushicushpa, micuna canguichic. Cancunapac maquihuan ruhuashcata cancunata Mandac Dios bendiciashcamantami chashna cushicuna canguichic.

⁸ Chaipica, ama caipi ruhuashca shina, quiquin munashcata ruhuanguinchicchu.

⁹ Chaica, manarac Mandac Dios cushca llactapi samaringapac yaicunguichicchu.

¹⁰ Jordán yacuta pasashpami, Mandac Dios cushca llactamanca yaicunguichic. Pai tucui piñaccunamanta muyundita cuidacpimi, cushilla samaringuichic.

¹¹ Mandac Dios paipac shutita causachun acllashca pushtuman ñuca apachun nishca tucui rupachinatapish, paiman cunatapish, chungamanta shuctapish, alzashpa cuna ofrendatapish, cushami nishca ofrendatapish apanguichic.

¹² Mandac Diospac ñaupapi cancunapish, churicunapish, ushicunapish, servic caricunapish, servic huarmicunapish, cancunapac llactapi causac levitacunapish cushicunguichic. Levitacunaca cancunapurapica ima allpata mana charinchu.

¹³ Ama maipipish paiman cushpa tucuita rupachinguichicchu.

¹⁴ Cancunapac aillupurapi Mandac Dios acllashca pushtupi rupachinguichic. Chaillapitac tucui ñuca mandashcatapish ruhuanguichic.

¹⁵ Shina cashpapish tucui cancunapac llactacunapimi cancuna munashca shina, Mandac Dios bendiciashca animalta huañuchishpa, micui pudinguichic. Chaicunataca mapa cashpapish, mana mapa cashpapish, gacelata, venadota micuc shina micunguichiclla.

¹⁶ Yahuarllata ama micunguichic, yahuartaca yacuta shina, allpapi tallinguichic.

¹⁷ Cancuna causana llactapica chungamanta shucta cushcatapish, mushuc vinotapish, aceitetapish, punta huachashca huagratapish, ovejatapish, cushami nishca ofrendatapish, quiquin munaimanta cushca ofrendatapish, alzashpa cushca ofrendatapish mana micui pudinguichicchu.

¹⁸ Mandac Dios acllashca pushtuman rishpa, paipac ñaupapi ushicunahuan, churicunahuan, servic caricunahuan, servic huarmicunahuan, cancunapac llactapi causac levitacunahuan micunguichic. Chaipimi cancunapac maquihuan ruhuashcata Mandac Dios bendiciashcamanta cushicuna canguichic.

¹⁹ Cancunapac llactapi causacushpaca, levitacunata ama cungaringuichicchu.

²⁰ Mandac Dios, pai nishca shina, chai llactata ashtahuan jatunyachicpica cancunaca: “Aichanayanmi” ninguichicmi. Chashna munashpaca, cancuna munashca shinami, cushilla micunguichic.

²¹ Mandac Dios paipac shutita churangapac acllashca pushtu carupi cacpica, ñuca mandashca shina huagracunatapish, ovejacunatapish huañuchishpa, cancuna munashca shina, cancunapac llactallapitac micunguichiclla.

²² Chai animalcunataca mapa cashpapish, mana mapa cashpapish gacelata shina, venadota shina micunguichiclla.

²³ Yahuarllata ama micunguichic. Yahuarmi causaita cun. Chaimantami aichataca yahuar illacta micuna canguichic.

²⁴ Ama yahuartaca micunguichicchu, ashtahuanpish yacuta tallic shinami, allpapi tallina canguichic.

²⁵ Cancunapish, cancunapac quipa huiñaicunapish allita causangapacca, mana chaicunata micunachu canguichic. Mandac Diospac ñaupapi allita ruhuashpa causanguichic.

²⁶ Shina cashpapish, Mandac Diosman cungapac chicanyachishcatapish, cushami nishca ofrendatapish Mandac Dios acllashca pushtuman apanguichic.

²⁷ Tucui rupachinatapish, aichatapish, yahuartapish Mandac Diospac altarpi churanguichic. Chai huañuchishca animalpac yahuartaca Mandac Diospac altarpi tallinguichic. Chai quipami aichataca micui pudinguichic.

²⁸ Mandac Diospac ñaupapi cashcata ruhuangapacca, tucui ñuca mandashcacunata yuyarashpa cazunguichic. Chashnami cancunapish, cancunapac huahuacunapish huiñaita allita causanguichic.

Ruhuashcalla dioscunata mana adorana cashcamanta

²⁹ Cancuna japigricuc llactapi causaccunata Mandac Dios cancunapac ñaupapi tucuchicpica, cancunami chaipica causanguichic.

³⁰ Paicuna shina causashpa, pacta pandaringuichicman. Chai llactapi causaccunata tucuchishca quipaca: “Ñucanchicpish paicuna shina adorangapac, ¿paicunaca ima shinashi chai dioscunata adorac carca?” nishpa tapunacunguichicchu.

³¹ Mandac Dios-huanca ama chashna ruhuanguichicchu. Mandac Diosca paicuna ruhuashcataca mana ricusha ninchu. Paicunapac dioscunamanca millana mana allicunatami ruhuarca. Paicunapac churicunatapish, ushicunatapish paicunapac dioscunaman cushpami rupachirca.

³² Ñuca mandashcallata ruhuanguichic, ama yapachinguichicchu, ama anchuchinguichicchu.