DEUTERONOMIO 11 - Dios Rimashcata Quillcashcami

Mandac Dios tucuita ruhuac cashcamanta

¹ Cancuna Mandac Diosta cuyanguichic. Pai mandashcacunata, pactachinacunata, yachachishcacunata punzhanta cazunguichic.

² Mandac Dios cancunata ima shina llaquichishcata yuyarichic. Chaitaca cancunapac huahuacunaca mana yachanchu, mana ricushcachu. Paicunaca Mandac Dios llaquishcatapish, pai poderta charishcatapish, paipac poderhuan llucchishcatapish mana yachanchu.

³ Egipto llactata jatun mandacta, chaipi causaccunata llaquichishcatapish, jatun mancharinacunata ruhuashcatapish,

⁴ Egipto gentecuna ñucanchicta caticucpi, Puca Cuchapi carretacunandi, caballocunandi cunancaman ucuyachishcatapish, mana yachanchu.

⁵ Shinallatac cancunata shitashca pambapi caiman chayamungacaman imata ruhuashcatapish,

⁶ Rubenpac aillupura Eliabpac churi Datantapish, Abiratapish imata ruhuashcataca mana yachanchu. Paicunataca familiandi, carpacunandi, paicuna charishcacunandimi israelcunapac chaupipi allpa pascarishpa millpuc shina tucuchirca.

⁷ Ashtahuanpish cancunami Mandac Dios tucui ima ruhuashcataca quiquin ñahuihuan ricurcanguichic.

Cusha nishca llactapi allicunata cunamanta

⁸ Cancunaman cunan ñuca huillashca tucui mandashcacunata pactachinguichic. Chashna pactachishpami alli sinchiyashpa llactaman yaicushpa, chaipi causaccunata llucchishpa cachashpa chai allpata japinguichic.

⁹ Mandac Dios cancunapac taitacunamanpish, quipa huiñaicunamanpish cushami nishca lechepish, mishquipish callpacuc llactapi unaita causangapacca tucui mandashcacunatami pactachina canguichic.

¹⁰ Cancuna japigricushca llactaca mana cancuna llucshimushca Egipto llacta shinachu. Chaipi tarpushpaca shuc huertata parcuc shinami chaquihuan aisashpa parcuc carcanguichic.

¹¹ Cancuna japingapac yaicugricuc llactaca urcucunapish, pambacunapish jahua cielomanta tamyahuan pucuna allpacunami.

¹² Chai llactataca Mandac Diosmi cuidacun. Mandac Diosca huata callarimanta, huata tucuringacamanmi cuidacunlla.

¹³ Cunan ñuca yachachishca cazushpa, Mandac Diosta tucui shunguhuan, tucui almahuan servishpa, paita cuyacpica,

¹⁴ punta tamyatapish, quipa tamyatapish cachangami. Chaimantami granotapish, vinotapish, aceitetapish japinguichic.

¹⁵ Quihuapish cancunapac animalcunaman tiyangami. Cancunaca huicsa pactatami micunguichic.

¹⁶ Shungupi pandarishpa, Diosta catinata saquishpa, shuctac dioscunapac ñaupapi ama cunguringuichicchu.

¹⁷ Chashna mana allita ruhuacpica, Mandac Dios nina japiric shina piñarishpami, pai cusha nishca sumac llactapica jahua cielota huichcac shina mana tamyachinga. Allpacunapish mana pucucpica, utcami tucuringuichic.

¹⁸ Ñuca yachachishcacunata cancunapac shungupi, cancunapac yuyaipi churaichic. Cai mandashcacunataca cancunapac maquipi, frentepi tucuipac ricuna cachun, huatashca shina apaichic.

¹⁹ Caicunataca huasipipish, ñanta purishpapish, samarishpapish, jatarishpapish cancunapac churicunaman yachachinguichic.

²⁰ Huasi pilarcunapipish, llacta yaicuna pungucunapipish quillcanguichic.

²¹ Mandac Dios cancunapac taitacunaman cushami nishca llactapica cancunapish, cancunapac huahuacunapish ima shinami jahua pacha, cai pacha huiñaita can, chashnami cancunapish huiñaita causanguichic.

²² Mandac Diosta cuyashpa, ñuca yachachishca mandashcacunata pactachishpa, Mandac Diosllata catinguichic.

²³ Chashna pactachicpica, Mandac Diosca chai llactapi causaccunata cancunapac ñaupamanta catishpa cachangami. Cancunata yalli achca, shinallatac sinchi gentecunatami llucchishpa cachashpa, chaipi causai callaringuichic.

²⁴ Maipimi cancuna sarunguichic, chai llactaca cancunapacmi canga. Cancunapac llactaca shitashca pambamanta Libanocaman, Eufrates yacumantaca inti llucshina lado cuchacamanmi canga.

²⁵ Cancunahuanca pipish mana cariyangachu. Mandac Diosca, pai ruhuasha nishca shinami, tucui cai pachapi manchaita chucchuita churanga.

²⁶ Riquichic, cunanmi bendiciontapish, maldiciontapish cancunapac ñaupapi churani.

²⁷ Chaica, cunan ñuca huillashca Mandac Dios mandashcacunata cazushpaca bendiciashcami canguichic.

²⁸ Ashtahuanpish ñuca mandashcata mana uyashpa, Mandac Diosta mana cazushpa, mana ricsishca shuctac dioscunata catishpaca, maldiciashcami canguichic.

²⁹ Cancuna causana llactata Mandac Dios cucpimi, Gerizim urcupi bendiciontaca ricuchinguichic. Cutin maldiciontaca Ebal urcupimi ricuchinguichic.

³⁰ Chai urcucunaca Jordán yacumanta chimbaman, inti tigrana lado Arabá pambapi causac cananeocunapac llactapimi. Canaán llactaca encina yuracuna tiyac Moré pamba ladollapi cac Gilgal ladopimi.

³¹ Mandac Dios cushca llactata japingapacmi Jordán yacuta pasagringuichic. Chai llactata japishpami, chaipi causanguichic.

³² Chaipica cunan cancunaman yachachishca mandashcacunatapish, pactachinacunatapish tucuita cazushpa causanguichic.