DEUTERONOMIO 10 - Dios Rimashcata Quillcashcami

Cutin Dios-huan ari ninacuita ruhuashcamanta

¹ Chai punzhapica Mandac Diosca: “Puntapi ruhuashca shinallatac ishcai tabla rumita ruhuashpa, ñucapacman urcuman shamui. Shinallatac caspimanta Arcatapish ruhuangui.

² Puntapi can paquishca rumipi quillcashca shinallatacmi chai rumipi quillcasha. Chai rumitaca caspimanta ruhuashca Arcapi huacaichingui” nirca.

³ Chaimantami ñucaca acacia caspimanta Arcata ruhuashpa, puntapi ruhuashca shinallatac ishcai tabla rumitapish ruhuashpa, urcuman rircani.

⁴ Puntapi quillcashca shinallatacmi chai ishcai tabla rumipi cancuna tandanacushca cacpi, nina rupacuc urcu chaupimanta rimashca chunga mandashcacunata quillcarca. Mandac Diosca chaitaca ñucamanmi curca.

⁵ Urcumanta uraiman cutishpami, chai rumicunataca ñuca ruhuashca Arcapi churarcani. Chaipimi Mandac Dios mandashca shinallatac cunancaman tiyacun.

⁶ (Chai quipami israelcunaca Beerot-bene-jaacán pambamantaca Moseraman rirca. Chaipi Aarón huañucpimi, enterrarca. Paipac randica paipac churi Eleazarmi cura tucurca.

⁷ Chaimantaca Gudgodaman, cutin chaimantaca yacucuna tucyacuc Jotbata llactamanmi rirca.

⁸ Chai huatacunapimi Mandac Dios ari nishca quillcata huacaichina Arcata apachun, Levipac aillucunata chicanyachirca. Mandac Diosca paipac ñaupapi servichun, paipac shutita cunan punzhacaman alli nichunmi chicanyachirca.

⁹ Chaimantami levitacunaca paicunapac huauquicunapurapica imata mana japinga. Mandac Dios nishca shinami, paicuna japinaca Mandac Dios can.)

¹⁰ Punta punzhacunapi shinallatacmi ñucaca chuscu chunga punzhata, chuscu chunga tutata urcupi carcani. Mandac Dios cutinllatac ñuca mañashcata uyashpami, cancunataca mana tucuchirca.

¹¹ Mandac Diosca: “Cunanca jatari, ñuca ñaupa taitacunaman cungapac ari nishca llactata japingapac ñaupashpa ri” nirca.

Mandac Diosllata cazunamanta

¹² Israelcunalla, ¿imatatac Mandac Diosca ruhuachun nin? Mandac Diosca paita manchashpa, pai munashca shina causachun, tucui shunguhuan, tucui almahuan, paillata cuyachun,

¹³ cunan ñuca huillashca mandashcacunatapish, pactachinacunatapish, yachachishcatapish cazuchunmi munan.

¹⁴ Riquichic, jahua pachapish, ashtahuan jahuaman cac pachapish, cai pachapish, chaipi tucui tiyaccunapish Mandac Diospacmi can.

¹⁵ Shina cacpipish, Mandac Diosca cancunapac taitacunata cuyarcami. Chaimantami paicunapac huahua huahuacunata tucui llactacunamanta acllarca. Chai acllashcacunaca cancunami canguichic.

¹⁶ Chaimantami circuncisionta ruhuashpa, cancunapac shungumanta asha carata pitic shina, tucui millai yuyaita anchuchina canguichic. Ama sinchi shungu caichicchu.

¹⁷ Mandac Diosca tucui dioscunapac Diosmi, mandaccunapacpish Mandacmi. Mandac Diosca manchana poderyucmi. Mana pitapish ñahuita ricushpa llaquichic Dioschu. Pimantapish mana imata japicchu.

¹⁸ Paica taita mama illaccunamanpish, viudacunamanpish cashcata ruhuacmi. Shuctac llactamanta shamushpa causaccunamanpish caracmi, churachicmi.

¹⁹ Cancunaca Egiptopica pozashcallami carcanguichic. Chaimantami shuctac llactamanta caccunataca cuyana canguichic.

²⁰ Mandac Diosta manchanguichic, paita servinguichic, paillata catinguichic, paillata servinguichic. Paipac shutipi ima ari nina cacpica, ari ninguichic.

²¹ Cancuna alli nina Diosmi. Paica cancunamantami jatun mancharinacunata ruhuarca. Chaitaca cancunapac ñahuihuanmi ricurcanguichic. Paica cancunapac Diosmi.

²² Cancunapac taitacunaca canchis chunga gentehuanmi Egiptoman rirca. Cunanca, Mandac Diosca jahua pachapi tiyac lucerocunata shinami achcata mirachishca.