DANIEL 8 - Dios Rimashcata Quillcashcami

Cari ovejatapish, cari chivotapish Daniel muscushcamanta

¹ Jatun mandac Belsasar quimsa huatata mandacucpimi, Daniel ñucaca utcapi ricushca shinata cutin muscuipi shina ricurcani.

² Chaitaca Elam llactapi tiyac jatun llacta Susapi cashpami ricurcani. Shinallatac Ulai yacu ladopi cashpami, chashna muscuipi shina ricurcani.

³ Ñuca alzarishpa ricushpaca, chai yacu ladopi ishcai gachuyuc shuc cari ovejatami ricurcani. Chai gachucuna mai jatun cashpapish, shuc gachumi ashtahuan jatun carca. Chai ashtahuan jatun gachuca quipata huiñashcami carca.

⁴ Chai cari ovejaca inti tigrana ladoman, jahua ladoman, ura ladoman causaccunatami gachucunahuan llaquichicurca. Chai cari ovejahuanca ima animalpish mana chimbapurai pudircachu. Chai animalpac fuerzamantaca imapish mana quishpiri pudircachu. Pai munashcata ruhuashpami, punzhanta jatunyashpa caticurca.

⁵ Chaita ricushpa yuyaricushpallatacmi inti llucshina ladomanta shuc cari chivo pambapi mana sarushpa shamucucta ricurcani. Chai chivoca ishcai ñahuiyuc, cutin chai ñahuicuna chaupipica shuc jatun gachutami charirca.

⁶ Chai chivoca ñuca ricushca yacu ladopi shayacuc ishcai gachuyuc cari ovejapacmanmi yallita piñarishpa, tucui fuerzahuan llaquichingapac rirca.

⁷ Chai cari ovejapac cuchuman chayashpami, yallita piñarishpa llaquichirca. Chashna paipac gachuhuan tacashpami, chai cari ovejapac ishcai gachucunata paquirca. Chaimantami chai cari ovejaca shayaringapacllapish mana fuerzata charirca. Shina cacpimi, pambaman urmachishpa sarunacurca. Chashna chai cari chivo llaquichicucpica, chai cari ovejataca pipish mana misarcachu.

⁸ Shinami chai cari chivoca yallita sinchiyashpa, jatun tucushpa catirca. Chashna yallita sinchiyashpa, jatunyacucpimi, chai jatun gachuca paquirirca. Chashna paquiricpica, chai gachupac randica chuscu jatun gachumi cai pacha chuscu ladoman huiñarca.

⁹ Chai gachucunapuramanta shuc gachupica shuc huahua gachumi ura ladomanpish, inti llucshina ladomanpish, sumaimana allpa ladomanpish huiñarca.

¹⁰ Jahua pachacaman huiñashpami, chaipi ima tiyaccunatapish, lucerocunatapish, pambaman urmachishpa sarunacurca.

¹¹ Chashna ruhuashpami, jahua pachapi tiyaccunata mandac-huanpish piñarishpa shayarirca. Chashnami punzhanta Diosman cushpa rupachinatapish anchuchishpa Diospaclla huasitapish urmachirca.

¹² Gentecuna Diosta mana cazushcamantami jahua pachapi imalla tiyaccunatapish, punzhanta Diosman cushpa rupachinatapish paipac maquipi churarca. Chashna churacpimi, cashcata ninatapish chingachishpa, pai munashcata ruhuashpa, maipipipish alli nishca carca.

¹³ Chashna ruhuacpimi, shuc jucha illac ángel caishuc angelcunaman tapucucta uyarcani. Chashna tapushpaca: “Punzhanta Diosman cushpa rupachinata muscuc shina ricunaca, ¿ima horascamantac canga? Shinallatac ¿ima punzhacamantac mana cazunapish, Diospac huasitapish, jahua pachapi ima tiyaccunatapish sarucucta muscuipi ricuc shina ricuna canga?” nirca.

¹⁴ Chashna tapucpimi caishuc angelcunaca: “Ishcai huaranga quimsa patsac chishicunata, tutamantacunatami chashna canga” nirca.

¹⁵ Daniel ñuca tucui chaicunata muscuipi shina ricushcata entendinata yuyacucpimi, ñucapac ñaupapi shuc runalaya shayacuc ñapish ricurirca.

¹⁶ Chai quipaca Ulai yacu chaupipi shuc runa caparishpaca: “¡Gabriel chai muscuipi shina ricurishca imata nisha nicushcata huillai!” nirca.

¹⁷ Shina nishca quipami ñuca shayacuc cuchuman shamurca. Chaimantami ñucaca yallita mancharishpa cumurishpa urai urmarcani. Shina urmacpica paica: “Can muscuipi shina ricushcaca tucurina punzhacunatami ricuchicun. Chaimanta huañunalla runa allita entendiyari” nirca.

¹⁸ Pai ñucahuan parlacucllapitacmi pambapi urai urmashpa sueñushpa saquirishcarcani. Shina cacpimi, pai tuparishpa,

¹⁹ riccharishpaca: “Tucuri punzhaca chai nishca punzhapimi canga. Chaimanta Dios piñarishpa llaquichinatami huillagrini.

²⁰ Can ricushca gachuyuc cari ovejaca Media, Persia llactacunata jatun mandaccunatami nisha nin.

²¹ Cari chivoca Grecia llactata jatun mandactami nisha nin. Ñahuicunapi jatun gachuca chai llactata punta jatun mandactami nisha nin.

²² Shuc gachu paquiricpi, chaipac randi chuscu gachucuna huiñashcaca chai llactamanta chuscu jatun mandaccuna llucshinatami nisha nin. Chai jatun mandaccunaca mana punta mandac shina poderta charingachu.

²³ Chai chuscu mandaccuna tucuricpica, Diosta mana cazuccunami yalli mana allita ruhuanga. Chai punzhacunami fierro shina mandac, shinallatac mana yachashcata entendic jatun mandac llucshinga.

²⁴ Paica yallita sinchi cashpapish mana paipac poderhuanchu chashna sinchi canga. Paica mai llaquicunata ruhuashpapish, maipipipish alli nishca canga. Quiquin munashcata ruhuashpami, yallita sinchicunatapish, Diospaclla caccunatapish tucuchinga.

²⁵ Yallita yuyaisapa cashpami, pitapish jahualla urmachishpa, shungupi jatun tucunga. Cungaillami achcata tucuchinga. Mandaccunata mandaccunahuanmi macanacungapac shayaringa. Gentecunapac maquipi mana huañushpapish huañungallatacmi.

²⁶ Chishicunapi, tutamantacunapi can muscuipi shina ricushcaca chashnatacmi canga. Chaicunaca tauca huatacuna quipami pactanga, chaimanta cambac shungupi huacaichi” nirca.

²⁷ Daniel ñucaca yallita irquiyashpami, maijan punzhacunata ungushca carcani. Ña alliyashpaca jatun mandacpac ima ruhuaicunatami ruhuashpa catircani. Ñuca muscuipi shina ricurishcata yuyarishpa manchaihuanmi carcani, pi chaimanta huillacca mana tiyarcachu.