DANIEL 7 - Dios Rimashcata Quillcashcami

Daniel chuscu animalta muscushcamanta

¹ Jatun mandac Belsasar Babilonia llactata mandai callari huatami Danielca camapi sueñucushpa, shuc muscuita muscurca. Paipac yuyaipish muscuipi shinami imacunata ricurca. Chaimanta riccharishpami, maijan yuyaicunallata quillcarca.

² Chashna quillcashpami Danielca: «Ñucaca shuc tutami muscuipi shina jahua pacha huaira chuscu ladomanta mama cuchata caiman chaiman cuyuchicucta ricurcani.

³ Shinallatac mama cuchamanta chican chican chuscu manchana jatun animalcuna shamucuctapish ricurcanimi.

⁴ Punta animalca león shinapish, anga shina alascunayucpishmi carca. Ñuca ricucucllapitacmi paipac alascunata piticpi, pambamanta jatarishpa, runa shina ishcai chaquihuan jatarirca. Chai animalmanca runapac yuyaitami curca.

⁵ Quipa animalca oso shinami carca. Chai animalpac costillasca shuc ladoca yallimi carca. Quimsa costillasta quirupi canichishpa shimipi apashcami carca. Chai animaltaca: “¡Jatarishpa, sacsangacaman achca aichata micui!” nircami.

⁶ Ñuca ricucucllapitacmi shuctac leopardo shina animal ricurirca. Chai animalca volac animalpac chuscu alastami lomopi charirca. Shinallatac chuscu umatami charirca. Chai animalmanmi llactata mandachun curca.

⁷ Tuta camapi siricushpallatacmi chuscuniqui manchanaipac animalta muscuipi shina ricurcani. Chai animalca millai sinchi animalmi carca. Shinallatac jatun fierro quiruyucmi carca. Tucuita polvoshpa micushpami, puchutaca chaquihuan sarucurca. Chai animalca utcapi ricurishca animalcunamanta shuctaclaya, shinallatac chunga gachuyucmi carca.

⁸ Chai gachucunata ricucucllapitacmi chai gachucuna chaupipica shuc uchilla gachu huiñashpa ricurirca. Chai uchilla gachupac ladomantami caishuc gachucunapuramanta quimsa gachuta anchuchirca. Chai uchilla gachuca gentecunapac ñahui shinami carca. Shinallatac millaita rimaric shimitapish charircami.

⁹ Chashna ricucucllapitacmi mandaccuna tiyarinata churashpa, shuc yuyac runata tiyachirca. Chai runaca rasu shina yuranlla churanata churashca, acchaca chuya oveja millma shina yuranllami carca. Chai mandashpa tiyarinapish, chai tiyarinapac ruedacunapish rupacuc shinami carca.

¹⁰ Paipac ñaupamantaca yacu shinami nina llucshicurca. Paipac ñaupapica huaranga huarangacunami servicurca. Maita mana yupaipacmi paipac ñaupapi shayacurca. Juezcuna tiyaricpica, librotami pascarca.

¹¹ Shinallatac gachuca millai rimaicunatami rimacurca. Chai manchaipac animalta huañuchishpa, cuerpota polvoshpa ninapi shitactapish ricurcanimi.

¹² Shinallatac caishuc animalcunamantapish mandanata quichushpa, asha punzhacunallatac causachun saquishcatapish ricurcanimi.

¹³ Tuta muscuipi shina ricucucpimi, jahua pacha puyupi Runa tucushcapac churi shina, maijanchari shamucucta ricurcani. Chai yuyac runapac ñaupaman shamucpimi, yuyac runapacman pusharca.

¹⁴ Paimanmi llactata mandanatapish, podertapish curca. Tucui llactapi causaccunapish, llactapi causaccunapish chican chican rimaita rimaccunami paita servicurca. Paipac mandanaca jaicapi mana tucuric, huiñaita mandana cashcata, mana taripac mandana cashcatami ricurcani.

¹⁵ Daniel ñucaca yallitami mancharircani. Chai muscuipi shina ricurishcamantaca yallitami llaquirircani.

¹⁶ Chai shayacuccunapuramanta shucpacman cuchuyashpami, tucui chaicuna imata nisha nicushcata tapurcani. Chashna tapucpimi, paica chaicuna imata nisha nicushcata huillashpaca:

¹⁷ “Cai chuscu jatun animalcunaca cai pachata chuscu jatun mandaccuna mandangapac shamuna cashcatami nisha nin.

¹⁸ Shina shamucpipish, chai mandanataca jahua pachapi causac Diospaclla caccuna japishpami, huiñai huiñaita mandanga” nirca.

¹⁹ Chaimantami chai chuscuniqui caishuc animalcunamantaca shuctaclaya animal imata nisha nicushcata yachasha nircani. Chai animalca fierro quirucuna, bronce shillucuna manchaipacmi carca. Chai animalca polvoshpa micushpami, puchutaca paipac chaquihuan sarucurca.

²⁰ Shinallatac umapi tiyac chunga gachucuna, shinallatac chai quimsa urmashca gachucunapac ladopi huiñashca gachu imata nisha nicushcatapish yachasha nircanimi. Chai gachuca ñahuicunayuc, millai rimaicunata rimac shimiyucmi carca. Chai gachuca caishuc gachucunata yallimi carca.

²¹ Chai gachu, Diospaclla caccunahuan macanacushpa mishactami ricurcani.

²² Chashna cacpimi, Yuyac Runa shamushpa Diospaclla caccunaman cashcata ruhuarca. Chashna ruhuacpimi, Diospaclla caccuna mandanata japina punzha chayamurca.

²³ Chai Yuyac Runaca: “Chai chuscuniqui animalca cai pachata chuscuniqui jatun mandactami nisha nin. Chai mandacca caishuc jatun mandaccunamanta chican mandacmi canga. Paica tucui cai pachatami trillac shina, polvoshpa tucuchinga.

²⁴ Chunga gachucunaca chai jatun mandacmanta shuctac chunga jatun mandaccuna shamunatami nisha nin. Paicunapac quipaca punta mandaccunata yalli jatun mandac shamushpami, chai quimsa mandaccunata mishanga.

²⁵ Paica jahua pacha Diosta millaita rimashpami, jahua pachapi causac Diospaclla caccunata yallita llaquichinga. Paica fiestacunatapish, mandashcacunatapish shuctacyachisha ningami. Paipac maquipimi Diospaclla caccunataca quimsa huata chaupicaman churanga.

²⁶ Shina cacpipish, mandanapi tiyarishpami, pai mandanata quichushpa huiñaita tucuchinga.

²⁷ Chaipimi cai pacha mandanatapish, jahua pacha ucupi tiyac sinchi mandanacunatapish jahua pacha Diospaclla caccunaman cunga. Paicunaca huiñaitami mandanga. Tucui jatun mandaccunami paicunata cazushpa servinga” nirca.

²⁸ Chai ricushcacunaca caipimi tucurin. Daniel ñucaca yuyaipi yallita llaquirishpami, ñahuipish shuctaclaya tucurcani. Shina cashpapish tucui chaicunataca ñuca shungupimi huacachigrini» nirca.