DANIEL 6 - Dios Rimashcata Quillcashcami

Danielta leoncuna causana jutcupi shitashcamanta

¹ Jatun mandac Darioca llactata alli mandangapacca patsac ishcai chunga prefectocunata tucui llactacunapi churanatami munarca.

² Cutin paicunata mandachunca, quimsa mandaccunatami churarca. Chaica pai ama yallita llaquita apangapacmi, chai quimsa mandaccunamanmi imatapish tapuc carca. Chai quimsa mandaccunapurapica shucca Danielmi carca.

³ Shina cacpipish, Danielca tucui chai mandaccunata, prefectocunatapish yalli ashtahuan yuyaisapami carca. Chaimantami jatun mandacca pai mandana tucui llactacunata mandachun churanata yuyarirca.

⁴ Chaimantami prefectocunapish, caishuc mandaccunapish Danielta juchanchingapac pai ima shina mandacucta ricushpalla puricurca. Shina cashpapish, ima pandaita mana tarircachu. Chaica Danielca imatapish allillatami ruhuac carca. Chaimantami ima pandaitapish, ima juchatapish mana tarirca.

⁵ Chaimantami chai mandaccunaca: «Cai Danieltaca ima shina mana juchanchi pudishunchu. Ashtahuanpish paipac Dios mandashcacunallahuantac juchanchishunchic» nirca.

⁶ Shina nishpami, prefectocunapish, caishuc mandaccunapish jatun mandacpac ñaupapi tandanacushpaca: —¡Jatun mandac Dariolla, huiñaitami causangui!

⁷ Maijanpish shuctac diosta, mana cashpaca cambac randi shuctac runata alli nictaca leoncuna causana jutcupi shitashca cachun shuc mandashcata quillcachunmi, llactata tucui mandaccunapish, soldadocunata mandaccunapish, prefectocunapish yuyarishcanchic.

⁸ Jatun mandaclla, Media, Persia llactacunapi causaccunapac mandashcacunata shina quillcashpa, cambac shutita churai. Chai mandashcataca pi mana shuctayachingachu— nirca.

⁹ Shina nicpimi, jatun mandac Darioca chai mandashcata quillcashpa paipac shutita churarca.

¹⁰ Danielca chai mandashpa quillcashcapi jatun mandacpac shutita churashcata yachashpami paipac huasiman rishpa, Jerusalén ladoman ventanata pascashpa utcapi ima shina mañac cashca shinallatac cada punzha quimsa cutin paipac Diosta pagui nishpa mañarca.

¹¹ Chashna mañacucpimi, chai mandaccuna tandanacushpa shamushpaca Daniel Diosta mañacucta ricurca.

¹² Chaimantami chai mandaccuna jatun mandacpacman rishpa, chai mandashcamanta tapushpaca: —Jatun mandaclla, ¿manachu maijanpish shuctac diosta, mana cashpaca cambac randi shuctac runata alli nictaca leoncuna causana jutcupi shitashca cachun, mandashcata quillcashpa, cambac shutita churarcangui?— nirca. Shina nicpimi, jatun mandacca: —Chashnami Media, Persia llactacunapi causaccunapac mandashcacuna shina pi mana shuctayachipacta mandarcani— nirca.

¹³ Shina nicpimi, paicunaca jatun mandactaca: —Jatun mandaclla, Judá llactamanta prezu apamushcapuramanta Danielca cantapish, can mandashpa shutita churashcatapish mana cazushcachu. Chai mandashcata cazunapac randica, punzhapi quimsa cutinmi Diosta mañan— nirca.

¹⁴ Shina nicpimi, jatun mandacca yallita llaquirishpa, ima shinapish Danielta quishpichinata munarca. Chashnami inti tigrangacaman ima shinapish quishpichingapac caita chaita yuyarirca.

¹⁵ Shina cacpipish, chai mandaccuna jatun mandacpacman shamushpaca: —Jatun mandaclla, Media, Persia llactacunapi causaccunapac mandashcacuna shinata can jatun mandac churashcataca pi mana shuctacyachipac nicushcataca yuyarinami cangui— nirca.

¹⁶ Shina nicpimi, jatun mandacca Danielta apamushpa leoncuna causana jutcupi shitachun mandarca. Chashna shitacpimi, jatun mandacca Danieltaca: —¡Can punzhanta servina cambac Dios quishpichichun!— nirca.

¹⁷ Shitashca quipaca shuc rumita apamushpami, chai jatun punguta taparca. Chaitami jatun mandacca Danielta llaquichinata ama shuctacyachichun paipac sortejas-huan, pai churashca mandaccunapac sortejas-huan sellashpa churarca.

¹⁸ Chai quipaca jatun mandac paipac huasiman rishpami, mana micushpa pacarirca. Ima tocanacunata paipac cuchuman apamuchunpish mana munarcachu. Mana sueñurcachu.

¹⁹ Jatun mandacca cayandi achicyamucucpimi, utcashpa leoncuna causana jutcuman rirca.

²⁰ Chai jutcu cuchuman chayashpa Danielta llaquilla tucushpa cayashpaca: —¡Causac Diosta servic Daniel-lla! Punzhanta can servina cambac Diosca, ¿leoncunapac jutcumanta quishpichishcachu?— nirca.

²¹ Shina nicpimi, Danielca jatun mandactaca: —¡Jatun mandaclla, huiñaitami causangui!

²² Leoncuna ñucata ama llaquichichunmi ñuca Diosca leoncunapac shimita huichcachun, paipac angelta cacharca. Paipac ñaupapica ima juchayuc mana canichu. Jatun mandaclla, cambac ñaupapipish mana faltayucchu cani— nirca.

²³ Shina nicpimi, jatun mandacca yallita cushicushpa, Danielta chai jutcumanta llucchichun mandarca. Shina mandacpimi, Danieltaca chai jutcumanta llucchirca. Danielca Diospimi shunguta churarca. Chaimantami chai leoncuna causana jutcupica ima mana tucurca.

²⁴ Chai quipaca jatun mandacca Danielta juchanchic mandaccunata apamuchunmi mandarca. Chashna apamucpimi, paicunataca huarmindi, huahuacunandi leoncuna causana jutcupi shitarca. Paicuna manarac chai jutcu pambaman chayacpimi, japishpa tullucunata polvoshpa micurca.

²⁵ Chaimantami jatun mandacca tucui gentecunaman, shuctac llactapi causaccunaman, chican chican rimaita rimaccunaman quillcashpaca: «¡Cushi causaita causaichicyari!

²⁶ Ñucaca tucui ñuca mandana llactacunapi causaccuna Danielpac Diospac ñaupapi manchaihuan pagui nichunmi mandani. Paica huiñaita causac Diosmi. Pai mandanaca mana tucuringachu. Huiñaita mandacungallami.

²⁷ Paillatacmi quishpichicpish, cacharichicpish can. Jahua pachapipish, cai pachapipish pi mana ruhuaipaccunata ruhuashpami ricuchin. Paimi leoncuna causana jutcupica cuidarca» nishpami quillcarca.

²⁸ Danielca jatun mandac Darío mandacui punzhacunapipish, Persia llactamanta Ciro mandacui punzhacunapipish alli ricsishcami carca.