DANIEL 5 - Dios Rimashcata Quillcashcami

Pircapi quillcashcamanta

¹ Jatun mandac Belsasarmi pai churashca huaranga mandaccunaman shuc jatun micuita ruhuarca. Chashnami paica chai huaranga mandaccunapac ñaupapi vinota ubiacurca.

² Belsasar vinota mishquillirishpa ubiacushpami, paipac taita Nabucodonosor Jerusalenpi tiyac Diospac huasiman apamushca curi, cullqui vasocunata apamuchun cacharca. Chai vasocunapi pai ubiangapac, shinallatac pai churashca mandaccunapish, paipac caishuc huarmicunapish vinota ubiachunmi apachun cacharca.

³ Chashna cachacpimi, Jerusalenpi tiyac Diospac huasimanta apamushca curi vasocunata apamurca. Chai vasocunapimi jatun mandacpish, pai churashca mandaccunapish, paipac huarmicunapish, caishuc huarmicunapish vinota ubiarca.

⁴ Chashna ubiashpami curimanta, cullquimanta, fierromanta, rumimanta, caspimanta ruhuashca dioscunata alabarca.

⁵ Chai horasllatacmi mandana huasipi tiyacuc candelero ñaupapi cac, calhuan yuracyachishca pircapi shuc maqui dedohuan quillcacuc ricurirca. Chai maqui quillcacuctami jatun mandac ricurca.

⁶ Chaita ricushpami, jatun mandacca yallita mancharishpa ñahuipish irquiyashpa musparishca saquirirca. Paipac siqui tullucunapish chururic shina tucushpami, mucucunapish paicunapura huactarinacucurca.

⁷ Chaimantami jatun mandacca brujocunata, caldeocunata, adivinocunata apamuchun sinchita caparirca. Chaimantami jatun mandacca Babilonia llactapi causac chai yachaccunataca: —Maijanpish cai pircapi quillcashcata rezashpa, imata nisha nicushcata huillacmanca morado churanatami churachisha. Cutin cungapica curi huallcatami churachisha. Paimi quimsaniqui mandac canga— nirca.

⁸ Tucui yachaccuna jatun mandacpac ñaupaman shamushpapish, chai quillcashcata mana rezai pudircachu. Chai quillcashca imata nisha nicushcatapish mana huillai pudircachu.

⁹ Chaimantami jatun mandac Belsasarca yallita llaquirishpa ñahuipish irquiyarca. Pai churashca mandaccunapish llaquilla tucushpami, imata mana ruhuai pudirca.

¹⁰ Jatun mandacpish, pai churashca mandaccunapish rimanacucta uyashpami, mandac huarmica jatun micui ucuman yaicurca. Chaiman yaicushpaca: —¡Jatun mandaclla, canca huiñaita causangui! Ama yallita llaquirishpa ñahuipish irquiyaichu.

¹¹ Can mandacuc llactapimi shuc runa jucha illac diospac espirituyuc tiyan. Paimi cambac taita causacui punzhapica luz shina achicyachicpish, dioscuna shina allita yachacpish carca. Paitami cambac taita jatun mandac Nabucodonosorca lucerota ricushpa yachaccunata, caldeocunata, adivinocunata mandachun churarca.

¹² Chai runaca Danielmi. Paitami jatun mandacca tucuita alli yachac, allita yachacushca, allita entendic cashcamanta muscushca imata nisha nicushcatapish huillac cashcata, pipish mana yachashcata huillac cashcata ricurca. Paitami Beltesasarta shutichirca. ¡Chashna cashcamantaca Danielta cayaichic! Pai chai quillcashca imata nisha nicushcata huillachun— nirca.

¹³ Shina nicpimi, Danieltaca jatun mandacpac ñaupaman pushamurca. Chashna pushamucpimi, jatun mandacca Danieltaca: —¿Canchu ñuca taita jatun mandac Judá llactamanta prezu apamushca Daniel cangui?

¹⁴ Cantaca jucha illac diospac espirituyuc cashcatami uyani. Shinallatac cantaca luz achicyachic shina allita yachac, allita entendic cashcatami uyani.

¹⁵ Chai quillcashcata rezachun, chai quillcashca imata nisha nicushcata huillachunmi yachaccunata, lucerota ricushpa yachacuccunata ñucapac ñaupaman pushamurca. Shina shamushpapish, paicunaca mana huillai pudircachu.

¹⁶ Ñucaca cantaca muscushcata huillashpa, ima llaquitapish allichic cashcatami uyani. Cunan cai quillcata rezashpa, cai quillca imata nisha nicushcata huillacpica, morado churanatami churachisha. Shinallatac cungapica curi huallcata churarishpami quimsaniqui mandanapi mandangui— nirca.

¹⁷ Shina nicpimi, jatun mandactaca: —Cambac carashcaca canllamanta cachun. Shina cacpipish, ñucaca chai quillcata rezashami. Shinallatac chai quillcashca imata nisha nicushcatapish huillashami.

¹⁸ Jatun mandaclla, cambac taita Nabucodonosormanca jahua pacha Diosmi sinchi mandac cachunpish, tucuipac alli nishca cachunpish curca.

¹⁹ Chashna jatun mandac cacpimi, tucui llactacunapish, jatun llactapi causaccunapish, tucui rimaita rimaccunapish paipac ñaupapica chucchuc carca. Pai maijanta huañuchisha nishpaca huañuchicmi carca. Maijanta causacta saquisha nishpaca, causacta saquicmi carca. Maijanta jatunyachisha nishpaca jatunyachicmi carca. Maijanta cumurichisha nishpaca cumurichicmi carca.

²⁰ Ashtahuanpish paipac shungupipish, yuyaipipish jatun tucushcamantami, pai mandanatapish, pai alli nishca canatapish quichurca.

²¹ Chaimantami gentecunapuramanta anchuchishca carca. Animalcuna shina yuyashpami, sacha burrocunahuan causarca. Huagraman shinami quihuata cararca. Paipac cuerpotaca jahua pachamanta tamya urmashpami jucuchirca. Runacuna mandana llactata jahua pacha Dios Mandac cashcata, shinallatac cai pacha mandanata maijanman cusha nishpaca cuc cashcata yachangacamanmi chashna causanga.

²² Shina cashpapish, paipac churi can Belsasarca chaicunata yachashpapish mana shungupi llaquirircanguichu.

²³ Ashtahuanpish jahua pacha Diosta llaquichishpami, paipaclla huasimanta vasocunata apachun cacharcangui. Chai vasocunapimi canpish, can churashca mandaccunapish, cambac huarmicunapish, cambac caishuc huarmicunapish vinota ubiarcanguichic. Shinallatac curimanta, cullquimanta, broncemanta, fierromanta, rumimanta ruhuashca mana uyac, mana ricuc, mana entendic dioscunatami alabarcangui. Ashtahuanpish cambac causaita paipac maquipi charicuc Diostaca mana alli nircanguichu. Tucui cambac causaitaca paimi ricucun.

²⁴ Chaimantami paica cai maquita quillcachun cacharca.

²⁵ Cai quillcashcaca: MENE, MENE, TEKEL, PARSIN ninmi.

²⁶ Cutin chai quillcaccunaca: MENE nishpaca Diosmi mandana punzhacunata yupashpa, caicamanllami mandangui nisha ninmi.

²⁷ TEKEL nishpaca balanzapi pezacpica, faltayucmi llucshishcangui nisha ninmi.

²⁸ PARSIN nishpaca, can mandana llactata chaupishpa shuc partetaca Media llacta runacunaman, shuc partetaca Persia llactapi causaccunaman cuna cashcatami nisha nin— nirca.

²⁹ Shina nicpimi, Belsasarca Danielmanca morado churanata churachirca. Cutin cungapica curi huallcatami churachirca. Chashna churachishpami llactata quimsaniqui mandacta ruhuarca.

³⁰ Chai tutallatacmi caldeocunata jatun mandac Belsasarca huañurca.

³¹ Media llactamanta Dariomi mandai callarirca. Paica sucta chunga ishcai huatatami mandarca.