DANIEL 3 - Dios Rimashcata Quillcashcami

Curimanta ruhuashca diosta adorashcamanta

¹ Jatun mandac Nabucodonosormi curimanta shuc runaman ricchata ruhuarca. Chaica altomanca ishcai chunga canchis metro, anchomanca ishcai metro, canchis chunga centimetromi carca. Chai runaman ricchataca Babilonia llacta Dura pambapimi shayarirca.

² Chashna ruhuashpami, jatun mandac Nabucodonosorca prefectocunata, soldadocunata mandaccunata, shuctac mandaccunata, cunaccunata, cullquita huacaichiccunata, juezcunata, tucui llactacunapi mandaccunata tandachichun mandarca. Chai mandaccunataca chai runaman ricchata mañai callaringapacmi cayarca.

³ Jatun mandac Nabucodonosor ruhuashca runaman ricchata ricushpa, mañai callaringapacmi prefectocunapish, soldadocunata mandaccunapish, shuctac mandaccunapish, cunaccunapish, cullquita huacaichiccunapish, juezcunapish, shinallatac tucui llactapi causac mandaccunapish tandanacurca. Chashna tandanacushpa, jatun mandac Nabucodonosor ruhuashca runaman ricchapac cuchupi shayacucpimi,

⁴ shuc huillac runa sinchita caparishpaca: «Llactacunapi, pueblocunapi causaccunalla, chican rimaita rimaccunalla,

⁵ cornetapi, flautapi, tamborpi, arpapi, salteriopi, zampoñapi shuctac tocanacunapi tocashca uyaricpica, jatun mandac Nabucodonosor curimanta ruhuashca runaman ricchapac ladopi cumurishpa, alli ninguichic.

⁶ Maijanpish chai runaman ricchata cumurishpa mana adoractaca chai ratollatacmi rupacuc hornopi shitashca canga.

⁷ Shina nicpimi, cornetapi, flautapi, tamborpi, arpapi, salteriopi, zampoñapi, shuctac tocanacunapi tocashcata uyashpaca, tucui gentecuna jatun mandac Nabucodonosor curimanta ruhuashca runaman ricchata cumurishpa adorarcacuna.

⁸ Chai punzhallatacmi adivinocunapuramanta maijan jatun mandacpacman shamushpa, Judá gentecunapac contra huillarca.

⁹ Chashnami jatun mandac Nabucodonosortaca: —¡Jatun mandaclla, canca huiñaitami causangui!

¹⁰ Jatun mandaclla, canca cornetapi, flautapi, tamborpi, arpapi, salteriopi, zampoñapi, shuctac tocanacunapi tocashcata uyashpaca tucui gentecuna, curimanta ruhuashca runaman ricchapac ñaupapi cumurishpa adorachunmi mandarcangui.

¹¹ Maijan cumurishpa mana adoractaca rupacuc hornopi shitachunmi mandarcangui.

¹² Chaica, can Babilonia llactata mandachun churashca israelcunapuramanta Sadrac, Misac shinallatac Abed-negomi can mandashcata mana cazushpa, cambac dioscunatapish, can curimanta ruhuashca runaman ricchatapish mana adorancuna.

¹³ Chashna nicpimi, Nabucodonosorca yallita piñarishpa, Sadracta, Misacta, Abed-negota pushamuchun cacharca. Chashna mandacpimi, chai runacunata jatun mandacpac ñaupaman pushamurca.

¹⁴ Nabucodonosorca paicunataca: —Sadrac, Misac, Abed-nego, cancuna ñuca diostapish, ñuca curimanta ruhuashca runaman ricchatapish mana adorac nishcatami uyani.

¹⁵ Cunanca Cornetapi, flautapi, tamborpi, arpapi, salteriopi, zampoñapi, shinallatac shuctac tocanacunapi tocashca uyaricpi, ¿ñuca ruhuashca runaman ricchapac ñaupapi cumurishpa alli ningapac rinallachu canguichic? Chai horas cumurishpa mana adorashpaca rupacuc hornopimi shitashca canguichic— nirca.

¹⁶ Shina nicpimi, Sadroc, Misac, Abed-negoca jatun mandactaca: —Caimantaca mana imata nisha ninchicchu.

¹⁷ Chashna ruhuacpica, ñucanchic servina, ñucanchic Diosmi chai rupacuc hornomantapish, can jatun mandacpac maquimantapish quishpichinga.

¹⁸ Jatun mandaclla, pai mana quishpichicpipish ñucanchicca cambac diosta mana servishunchu. Can ruhuashca runaman ricchata cumurishpa mana adorashunchu— nirca.

¹⁹ Shina nicpimi, Sadrac-huan, Misac-huan, Abed-negohuan yallita piñarishpa ñahui shuctaclaya tucurca. Chaimantami hornotaca canchis cutinhuan yalli rupacyachichun mandarca.

²⁰ Chai quipami paipac soldadopuramanta ashtahuan sinchi runata Sadractapish, Misactapish, Abed-negotapish huatashpa rupacuc hornopi shitachun mandarca.

²¹ Shina mandacpimi, chai soldadocunaca paicunata churanacunandi, ushutacunandi, turbantendi, jahualla churanacunandi rupacuc hornopi shitarca.

²² Jatun mandac mandashcapish sinchimi carca. Horno ninapish yallitami rupacurca. Chaimantami Sadracta, Misacta, Abed-negota shitac soldadocunata rupachirca.

²³ Chashnami Sadrac, Misac, Abed-negoca maquicuna huatashca rupacuc hornopi urmarca.

²⁴ Chaimantami jatun mandac Nabucodonosorca mancharishpa utca jatarirca. Chashna jatarishpami shuctac mandaccunata cayashpaca: —¿Manachu chai ninapi quimsa runacunata huatashpa shitarcanchic?— nirca. Shina nicpimi paicunaca: —Jatun mandaclla, chashnami carca— nirca.

²⁵ Shina nicpimi, jatun mandacca: —Riquichic, chai nina chaupipica chuscu runacunami imapish mana tucushca puricun. Chai chuscu runapuramanta shucca dioscunapac churilayami puricun— nirca.

²⁶ Chaimanta Nabucodonosorca chai rupacuc horno pungu cuchuman cuchuyashpaca: —¡Jahua pacha Diosta servic Sadrac, Misac, Abed-nego, chaimanta llucshishpa shamuichic!— nirca. Shina nicpimi, Sadracpish, Misacpish, Abed-negopish chai nina chaupimanta llucshirca.

²⁷ Chai quipaca prefectocunatapish, soldadocunata mandaccunatapish, shuctac mandaccunatapish, chai ninamanta llucshishca runacunata ricungapacmi tandachirca. Chaica, chai runacuna mana rupashcata, acchallapish, churanapish mana yanayashcata, paicunapac cuerpoca ninallapish mana ashnacushcata ricungapacmi tandachirca.

²⁸ Chaimantami Nabucodonosorca: «Sadrocpac, Misacpac, Abed-negopac Diosca alli nishca cachun. Paimi, paita yuyarishpa causac, paita servic runacunata quishpichingapac paipac angelta cacharca. Paicunaca ñuca jatun mandac cacpipish, ñuca mandashcata mana cazurcachu. Paicunaca Diosta saquishpa, shuctac diosta servinapac randica, paicunapac cuerpotami rupachun saquirca.

²⁹ Chaimantami ñucaca: ‘Llactapi causaccunapish, ima rimaita rimaccunapish Sadracpac, Misacpac Abed-negopac Diosta piñashpa rimacca pitinacushca canga. Paipac huasipish tucuchishcami canga. Cashna quishpichic Dios shinaca mana shuctac dios tiyanchu’ nishpami mandani» nirca.

³⁰ Chai quipami jatun mandacca Sadracta, Misacta, Abed-negota tucui Babilonia llactata mandachun churashpa, allita pusharca.