DANIEL 2 - Dios Rimashcata Quillcashcami

Nabucodonosor muscushcamanta

¹ Jatun mandac Nabucodonosor ishcai huatata mandacushpami muscushpa shungupi llaquilla tucushpa mana sueñui pudirca.

² Chaimantami jatun mandacca chai muscushcata tapungapac yachaccunata, lucerota ricushpa yachacuccunata, brujocunata, caldeocunata cayachun cacharca. Chashna cayacpimi, jatun mandacpac ñaupaman shamurca.

³ Jatun mandacca paicunataca: —Muscushpami, chai muscui imata nicushcata mana entendishpa, shungupi llaquilla cani— nirca.

⁴ Shina nicpimi, paicuna arameo rimaipi rimashpaca: —¡Jatun mandaclla huiñaita causangui! Canta serviccunaman can muscushcata huillailla, ñucanchicca imata nisha nicushcata huillashunllami— nirca.

⁵ Shina nicpimi, jatun mandacca paicunataca: —Ñucaca cungarishcanimi. Imata muscushcatapish, chai muscui imata nisha nicushcata mana huillashpaca ñutuchishcami canguichic. Cancunapac huasicunapish tucuchishcami canga.

⁶ Ashtahuanpish imata muscushcata, chai muscui imata nisha nishcata huillashpaca, alli japinatami japinguichic. Alli nishcami canguichic. Chaimanta imata muscushcata, chai muscui imata nisha nicushcata huillaichic— nirca.

⁷ Shina nicpimi, paicuna cutinllatac rimashpaca: —Jatun mandaclla, canta servic ñucanchicman can muscushcata huillailla, ñucanchicca chai muscui imata nisha nicushcata huillashunllami— nirca.

⁸ Shina nicpimi, jatun mandacca: —Cancunaca ñuca muscushcata cungarishcata yachashpami, imatapish nic tucushpa unaiyacunguichic. Chaitami ricuni.

⁹ Ñuca muscushcata cancuna mana huillashpaca huañuitami shuyacunguichic. Cancunaca ñuca imata ruhuagricushcata saquichunmi ñucaman llullashpa huillangapac yuyarinacushcanguichic. Chai muscushca imata nisha nicushcata huillai pudic cashcata ñuca ricungapac, chai muscushca imata nisha nicushcatarac huillaichic— nirca.

¹⁰ Shina nicpimi, paicunaca jatun mandacpac ñaupapi rimashpaca: —Pi jatun mandacpish, pi sinchi jatun mandacpish can tapushca shina, yachaccunaman, lucerota ricushpa yachacuccunaman, caldeocunaman mana tapushcachu.

¹¹ Shinallatac can jatun mandac tapushcaca sinchimi. Pipish canman huillacca mana tiyanchu. Caitaca dioscunallami huillai pudin, paicunaca mana runacunahuan causanchu— nirca.

¹² Shina nicpimi, jatun mandacca yallita piñarishpa, Babiloniapi causac tucui yachaccunata huañuchichun cacharca.

¹³ Yachaccuna huañuchichunmi shuc mandashcata quillcarca. Shinallatac Danieltapish, paihuan caccunatapish huañuchingapac mashcarcami.

Mandac Dios jatun mandac muscushcata Danielman huillashcamanta

¹⁴ Jatun mandacta cuidaccunata mandac Arioc Babiloniapi causac yachaccunata huañuchingapac llucshicpimi, Danielca yallita yuyarishpa, mandac Arioc-huan parlangapac rirca.

¹⁵ Chashna rishpa, jatun mandacta cuidaccunata mandac Arioctaca: —¿Imamantatac jatun mandacca yallita llaquichichun mandashpa quillcarcayari?— nirca. Shina huillacpimi, Ariocca imamanta mandashpa quillcashcata Danielman huillarca.

¹⁶ Shina huillacpimi, Danielca jatun mandacpacman rishpa, pai muscushcata huillangapac asha punzhacunata shuyachun mañarca.

¹⁷ Chai quipaca Danielca huasiman rishpami, paihuan cac Ananiasman, Misaelman, Azariasman huillarca

¹⁸ Shinallatac Danieltapish, paihuan caccunatapish Babiloniapi causac yachaccunata shina huañuchinatami mancharca. Chaimantami jahua pacha Dios llaquishpa ayudachun mañai ningapac rirca.

¹⁹ Chashna huillacpimi, pi mana huillai pudishcata Danielman tuta muscuipi shina ricuchirca. Chaimantami Danielca jahua pacha Diosta alli nishpaca:

²⁰ «¡Huiñaimanta huiñaicaman Diospac shutica alli nishca cachun!

²¹ Canmi huatacunatapish, punzhacunatapish shuctaclayata ruhuangui. Canmi jatun mandaccunatapish churangui, shinallatac llucchingui. Alli yachaccunamanca alli yachaita, yuyaisapacunamanca alli yuyaitami cungui.

²² Canmi maita mana yachaipaccunatapish yachachingui. Canmi yalli purapi caccunatapish achicyachingui. Canmi luz cangui.

²³ Ñucanchic taitacunapac Dioslla, cantami alli nini. Canmi alli yachaita cushpa sinchiyachishcangui. Cunanmi ñucanchic mañashcata uyashpa, jatun mandac tapushcata ñucanchicman ricuchingui» nirca.

²⁴ Chai quipami, Danielca jatun mandac Babiloniapi causac yachaccunata huañuchichun cachashca Ariocpacman rishpaca: —Babiloniapi causac yachaccunata ama huañuchichu. Jatun mandacpac ñaupaman ñucata pushai, pai muscushcata paiman huillashallami— nirca.

²⁵ Shina nicpimi, Ariocca Danielta utca jatun mandacpacman pusharca. Chaiman pushashpaca: —Judá llactamanta prezu apamushcapurapimi jatun mandac muscushcata huillac shuc runata tarimuni— nirca.

²⁶ Shina nicpimi, jatun mandacca Beltesasar nishca Danieltaca: —¿Canca ñuca muscushcatapish, chai muscushca imata nisha nicushcatapish huillai pudinguichu?— nirca.

²⁷ Shina nicpimi, Danielca jatun mandactaca: —Pipish mana yachashcata can tapushcataca yachaccunapish, lucerota ricushpa yachacuccunapish, adivinocunapish mana huillai pudinchu.

²⁸ Shina cacpipish, jahua pachapimi, pipish mana yachashcata huillac Dios tiyan. Paimi jatun mandac Nabucodonosorman shamuc punzhacunapi ima tucunata ricuchishca. Can muscushca, can sueñushpa ricushcaca,

²⁹ jatun mandac canca, cambac camapi sueñucushpami, shamuc punzhacunapi ima tucunata yachanata munarcangui. Pi mana yachashcata huillacmi shamuc punzhacuna ima tucunata canman ricuchishca.

³⁰ Chai mana yachashcataca ñucamanmi ricuchirca. Chaica, mana ñuca tucui gentecunata atishpa yachashcamantachu ñucaman ricuchirca. Ashtahuanpish can muscushca imata nisha nicushcata, cambac shungu imata yuyacushcata huillachunllami ñucaman ricuchirca.

³¹ Jatun mandaclla, jatun runaman ricchata cambac ñaupapi shayacuctami ricurcangui. Chaica yalli jatun, yallita achic nicuc, ñahuica manchaipacmi carca.

³² Umaca curimi carca. Pechopish, rigrapish cullquimi carca. Cutin huicsamanta uraimanca broncemi carca.

³³ Cutin changacunaca fierromi carca. Chaquica chaupica fierro, chaupica allpamanta ruhuashcami carca.

³⁴ Chaita ricucucpimi, manapish pi cacharicpi, shuc rumi shamushpaca, chai runaman ricchapac fierro chaquita, allpamanta ruhuashca chaquita huactashpa polvorca.

³⁵ Chashna polvocpimi, fierropish, allpamanta ruhuashcapish, broncepish, curipish, cullquipish usyai punzhacunapi trillana erapi tiyac tamo shina tucurca. Chaita huaira apacpimi, chai shayacushca pushtupica jaicapi mana ricurirca. Cutin chai runaman ricchata huactac rumica jatun urcu tucushpami, tucui cai pachata taparca.

³⁶ Chaitami muscurcangui. Chai muscushca imata nisha nicushcatapish jatun mandacpac ñaupapimi huillagrini.

³⁷ Jatun mandaclla, canca jatun mandaccunatapish mandacmi cangui. Chaica, jahua pacha Diosmi, llactata mandanatapish, fuerzatapish, mandangapac yuyaitapish canman curca.

³⁸ Cambac maquipimi cai pachapi causac runacunatapish, sacha animalcunatapish, jahuata volashpa ric animalcunatapish mandachun churarca. Canmi chai curi umaca cangui.

³⁹ Cambac quipaca shuc yangalla jatun mandacmi mandai callaringa. Chai quipaca bronce shina, jatun mandacmi mandai callaringa. Paimi tucui cai pachata mandanga.

⁴⁰ Chuscuniqui mandacca fierro shina sinchi mandacmi canga. Fierro ima shinami polvoshpa ñutuchic shinami, tucuita polvoshpa ñutuchic shina mandanga.

⁴¹ Shinallatac can ricushca chaupica allpamanta ruhuashca, chaupica fierromanta ruhuashca chaquica, chaupirishca mandana nisha ninmi. Can ricushca chaupica fierro, chaupica allpamanta ruhuashca cashca shinallatacmi chai llactaca fierro shina sinchi mandac canga.

⁴² Chai chaqui dedocunaca maijanca fierromanta, maijanca allpamantami ruhuashca. Chashnallatacmi ishcaipi chicanyarishca llactaca chaupica sinchi, chaupica urmanalla canga.

⁴³ Can ricushca fierromanta, allpamanta ruhuashca chaquica runacunapura tandanacungapac ari nishca nisha ninmi. Shina tandanacushpapish allpahuan, fierrohuan mana tandaric shinami caishuc, chaishuc mana tandaringa.

⁴⁴ Chai jatun mandaccuna mandacui punzhacunami jahua pacha Diosca jaicapi mana tucuchipac llactata mandachun churanga. Chai llactata mandactaca mana shuctac runacunaman cungachu. Chai jatun mandacmi shuctac jatun mandaccunata ñutuchishpa tucuchinga. Shinami paica huiñaita mandacungalla.

⁴⁵ Canca manapish pi cacharicpi, urcumanta rumi shamushpa, fierrota, bronceta, allpata, curita, cullquita ñutuchictami ricurcangui. Chaica, Diosmi shamuc punzha ima tucunata ricuchishca. Chai muscushcaca chashnatacmi tucunga. Chai muscushca imata nisha nicushcapish mana llullachu— nirca.

⁴⁶ Shina huillacpimi, jatun mandac Nabucodonosorca Danielpac ñaupapi pambacaman cumurishpa alli nirca. Chaimantami ofrendata paiman cuchun, inciensota rupachichun mandarca.

⁴⁷ Shinallatac jatun mandacca Danieltaca: —Cancunapac Diosca, dioscunapac Diosmi, jatun mandaccunapac Jatun Mandacmi. Pipish mana yachashcata ricuchinmi. Chaimantami pipish mana yachashcata canca huillangui— nirca.

⁴⁸ Chaimantami jatun mandacca Danielta alli nishpa, sumaccunata curca. Shinallatac Babilonia llactata mandac cachun, chai llactapi causac yachaccunatapish mandac cachunmi churarca.

⁴⁹ Danielca jatun mandacmanca Sadracta, Misacta, Abed-negota, Babilonia llactata mandacta ayudachun churachunmi mañarca. Cutin Danielca jatun mandac tiyanapimi saquirirca.