DANIEL 11 - Dios Rimashcata Quillcashcami

¹ Media llactamanta Darío mandai callari huatami ñucaca Miguelta ayudarcani.

Jahua lado llacta jatun mandacmantapish, ura lado llactata jatun mandacmantapish

² Cunanca, ñucaca chashnatac cashcatami huillagrini. Persia llactapica ashtahuan quimsa jatun mandaccuna mandangaracmi. Cutin chuscuniqui jatun mandacca paicunata yalli chayucmi canga. Paica chashna chayuc cashcamanta sinchi cashpami, Grecia llactata jatun mandac-huan macanacungapac tucuita jatarichinga.

³ Chai quipami shuc sinchi jatun mandac mandai callarishpa, pai munashcata ruhuashpa mandanga.

⁴ Chashna sinchita mandai callaricucllapitacmi chai mandacca tucurishpa, pai mandanataca cai pachapi chuscu ladoman chaupinga. Mana paicunapac huahua huahuamanchu chaupinga. Mana pai mandashca shinachu mandanga. Ashtahuanpish chai mandanataca tucuchishpami shuccunaman cunga.

⁵ Ura lado llactata jatun mandacmi yallita sinchi tucunga. Shina cacpipish, pai churashca mandacmi paita atishpa ashtahuan sinchi tucushpa, pai mandacushcatapish yalli ashtahuan llactacunata mandanga.

⁶ Maijan huatacunata mandacushpami, alli causangapac ura llacta jatun mandacca paipac ushita jahua llactata jatun mandac huarmi cachun cushpa, ari ninacunga. Chashna ari nishpapish paipish, paipac huahua huahuacunapish mana alli causai pudingachu. Chai punzhacunapica, chai huarmitapish, paita apamuccunatapish, paipac cusatapish, paita cuidaccunatapish huañuchiccunapac maquipimi churanga.

⁷ Shina cacpipish, chai huarmipac huahua huahuami paipac randi mandai callaringa. Paimi jahua llactata jatun mandac-huan macanacungapac paipac soldadocunahuan shamushpa, jatun torrecunaman yaicushpa, pai munashcata ruhuashpa llaquichinga.

⁸ Chashnami chaipi tiyac dioscunatapish, imaman riccha dioscunatapish, shinallatac cullquimanta, curimanta ruhuashca sumaccunatapish Egiptoman apanga. Chashna ruhuashpaca maijan huatacunatami jahua lado llactata mandac-huanca macanacushpa causanga.

⁹ Chaimantami jahua llactata jatun mandacca ura llactaman yaicushca ninga. Shina munashpapish quiquin llactamanmi cutinga.

¹⁰ Chai quipaca jahua llactata jatun mandacpac churicunami yallita piñarishpa, achca soldadocunata tandachishpa macanacungapac shamunga. Chai soldadocunahuanmi yacu jundamuc shina, shamushpa tucuita tucuchishpa, cutishpaca jatun torreman yaicushpa macanacunga.

¹¹ Chaimantami ura llactata jatun mandacca yallita piñarishpa, jahua llactata jatun mandac-huan macanacungapac llucshinga. Chashna achca soldadocunahuan shamushpapish mana ati pudishpami, paicunarac huañunga.

¹² Chashna achca soldadocunata atishpami, ura llactata jatun mandacca shungupi jatun tucushpa, huaranga huaranga soldadocunata huañuchinga. Chashna cashpapish asha huatacunatami chashna canga.

¹³ Jahua llactata jatun mandacca utcamanta yalli ashtahuan soldadocunatami tandachinga. Chashna maijan huatacuna quipaca achca soldadocunahuan, achca charishcacunahuanmi cutimunga.

¹⁴ Chai punzhacunapica taucami ura llactata jatun mandac-huan macanacungapac jataringa. Cambac llactamantapish shuc sinchi runacunapish muscuipi shina ricushcata pactachichun nishpami llucshinga. Shina llucshishpapish huañungami.

¹⁵ Jahua llactata jatun mandac shamushpami baluarteta ruhuashpa macanacushpa muyundita pircashca llactata japinga. Ura llacta jatun mandacpac soldadocunaca mana chimbapurai pudingachu. Shinallatac acllashca soldadocunapish mana chimbapurai pudingachu.

¹⁶ Paicunahuan macanacuc shamuc jatun mandacca pai munashcata ruhuashpami llaquichinga. Pipish paihuanca mana chimbapurai pudingachu. Paica sumaimana llactapimi sinchita mandashpa tucuita tucuchinga.

¹⁷ Chai quipaca ura llactata tucui japinatami yuyaringa. Chaimantami chai jatun mandac-huan parlanacunga. Chai jatun mandacta huañuchingapacmi paipac ushita huarmi cachun cunga. Shina cucpipish, mana chai munashcaca pactangachu.

¹⁸ Chai quipaca mama cucha patacunapi tiyac llactacunatami japinga. Chashna cacpipish, shuctac mandac llucshishpami mana pai munashcata ruhuachun saquinga. Pai ima shinami burlashpa llaquichicuc shinallatacmi paitapish llaquichinga.

¹⁹ Chai quipami paica paipac llactapi tiyac jatun torreman cutinga. Chaiman cuticpipish huañuchingami. Ña mana ashtahuan ricuringachu.

²⁰ Chai jatun mandacpac randi shuctac mandac shamushpami, pai mandana llactata sumacta ruhuangapac impuestota japichun mandanga. Shina cashpapish asha punzhacuna quipaca chai mandacca pipish mana macacpi, manapish huañuchicpimi tucuringami.

²¹ Paipac randica, maita mana jatun mandac tucuipac mana alli nishca runami mandangapac shamunga. Cungailla llullacunahuan shamushpami, mandana llactata japinga.

²² Paihuan churacuc runataca yacu jundamuc shina shamushpami, paipac ñaupapi tucuchinga. Paihuan ari ninacuc runatapish tucuchingami.

²³ Paihuan ari nishca cashpapish umangami. Chashna umashpami ashalla soldadocunahuan huichai rishpa mishashpa cutinga.

²⁴ Chai sumac llactapi cushilla causacucpimi, cungailla yaicushpa, paipac taitacunapish, taitacuna mana ruhuashcata ruhuashpa llaquichinga. Chashnami chaipi imata quichushcacunatapish, ima sumaccunatapish paipac soldadocunaman chaupinga. Jatun torrecunapi macanacungapac yuyaringami. Shina cashpapish asha punzhacunallatami chashna canga.

²⁵ Chai mandacca cutinllatac sinchiyashpa, yallita piñarishpami, achca soldadocunata tandachishpa ura llactata mandac-huan macanacungapac shamunga. Chashna shamucpica, ura llacta mandacpish mai sinchi achca soldadocunata tandachishpami macanacungapac llucshinga. Shina llucshishpapish paipacllatac soldadocuna umacpimi, mana mishai pudinga.

²⁶ Paipac micunata micuccunallatacmi paita umashpa llaquichinga. Paipac tauca soldadocunaca huañuchishpa tucuchishcami canga.

²⁷ Chai ishcai jatun mandaccunapac yuyaica millaillatami ruhuanata munanga. Micuna mizallapitacmi llullashpa parlanga. Shina cacpipish, chai punzhacuna manarac chayamushcamantami chai parlanacushcaca yangalla canga.

²⁸ Jahua llactata jatun mandacca achca quichushcacunata apashpami, paipac llactaman cutinga. Jucha illac Dios-huan ari nishcata piñashpa cungachinatami munanga. Pai munashcata ruhuashpami, llaquichishpa paipac llactaman cutinga.

²⁹ Pai cutina punzhapimi cutinga. Shina cutishpapish mana utcapi shina mishai pudingachu.

³⁰ Chaica, Quitim llactamantami jatun barcocuna paihuan macanacungapac shamunga. Chaimantami mana macanacusha nishpa cutinga. Shina cutishpaca jucha illac Dios-huan ari nishcata cungachina yuyaihuanmi cutinga. Chashnami pai munashcata ruhuashpa llaquichinga. Shinallatac jucha illac Dios-huan ari nishcata saquiccunahuanmi shuc yuyailla tucunga.

³¹ Paipac soldadocunami Diospaclla huasitapish, jatun torretapish mapayachinga. Punzhanta Diosman cushpa rupachinatapish anchuchingami. Chaipac randica millanayaipac chingachictami churanga.

³² Dios-huan ari nishcata mana cazuccunataca crinallata parlashpami crichinga. Shina crichicucpipish, paicunapac Diosta ricsic gentecunaca sinchiyashpami shayaringa.

³³ Chai llactapi alli yachaccunapish tauca gentecunatami allita yachachinga. Shina cashpapish maijan punzhacunatami espadahuan llaquichishca, rupachishca, prezushca, tucui imata quichushca llaquihuan cangacuna.

³⁴ Paicuna urmacpica, ashacunallami ayudanga. Achca gentecunami sumac llulla parlocunahuan shamushpa, paicunahuan tandanacunga.

³⁵ Shinallatac maijan allita yachaccunapish Dios acllashca punzha tucuringacaman mapa illac chuyayachishpa yuranlla cangapacmi huañunga. Chaipacca achca punzhacuna faltanracmi.

³⁶ Chai jatun mandacca pai munashcata ruhuashpami, jatun tucushpa tucui dioscunata yalli jatun tucunga. Tucui dioscunapac Diostapish millaitami rimanga. Dios piñarishpa llaquichingacamanmi paica imata ruhuashpapish alli canga. Chaica, paita llaquichina cashcaca pactangami.

³⁷ Chai mandacca paipac taitacunapac dioscunatapish, huarmicuna cuyana dioscunatapish mana cazungachu. Tucui imatapish yalli jatun cashcamantami maijan dioscunatapish mana cazunga.

³⁸ Chaipac randica macanacuipi sinchiyachic dioscunata, paipac taitacuna mana ricsishca dioscunatami alli ninga. Chai dioscunaman curita, cullquita, sumac rumicunata, ima valishcacunata cushpami alli ninga.

³⁹ Shuctac dioscunata mañashpami, pipish mana urmachipac torrecunata urmachishpa, paita alli niccunataca alli nishca cachun ruhuanga. Achca runacunata mandac cachun churashpami, paicunamanca allpacunata cunga.

Jahua llacta jatun mandac tucurishcamanta

⁴⁰ Ashtahuanpish tucuri punzhacunaca ura llacta jatun mandacmi paihuan macanacungapac shamunga. Chashna shamucpimi, jahua llacta jatun mandacca carretacunahuan, caballopi ric soldadocunahuan, barcocunahuan yacu jundamuc shina macanacungapac shamunga. Chashna yacu jundamuc shina shamushpami, llactacunaman yaicushpa tucuchinga.

⁴¹ Chashnami sumac llactacunaman yaicushpa, tauca llactacunata japinga. Ashtahuanpish Edom, Moab, Amón llactapi causaccunallami saquiringa.

⁴² Shuctac llactacunatapishmi japinga. Egipto llactapish mana atingachu.

⁴³ Egiptomantaca curimanta, cullquimanta ruhuashca sumaccunata, tucui ima valishcacunatami apanga. Libia llactapi, Etiopía llactapi causaccunaca paitami catinga.

⁴⁴ Shina cashpapish, “inti llucshina llactamanta, jahua llactamantami macanacungapac shamucun” nicta uyashpa, yallita mancharinga. Chaimantami yallita piñarishpa, achca runacunata huañuchishpa tucuchingapac llucshinga.

⁴⁵ Mandashpa tiyana carpa huasicunataca mama cuchahuan, Diospaclla urcuhuan chaupipimi shayachinga. Shina cashpapish chaipimi paica tucuringa, paitaca pi mana ayudangachu.