DANIEL 10 - Dios Rimashcata Quillcashcami

Tigris yacu patapi Daniel muscuipi shina ricushcamanta

¹ Persia llactata jatun mandac Ciro quimsa huatata mandacucpimi Beltesasar nishca Danielman caicunata huillarca. Chai huillashcaca llaqui shamunamanta mana llullashpa huillashcami carca. Danielca chai huillashcata allita uyashpami, muscuipi shina ricurishca imata nisha nicushcata alli entendirca.

² Chai punzhacunapica Daniel ñucaca quimsa semanatami llaquilla carcani.

³ Quimsa semanacamanmi ima mishqui micunatapish mana micurcanichu. Aichatapish, vinotapish mana mallircanichu. Aceitehuanpish mana cahuirircanichu.

⁴ Huata callari quilla ishcai chunga chuscu punzhapimi Tigris jatun yacu patapi shayacurcani.

⁵ Chaipi alzarishpa ricushpaca, lino churanata churashca, Ufaz llactamanta curi chumbihuan chumbillishca shayacuctami ricurcani.

⁶ Paipac cuerpoca topacio rumi shina, ñahuica punzha shina achicllami carca. Paipac ishcai ñahuicunaca luz japiricuc shinami carca. Cutin rigrapish, changapish llambuclla bronce shinami carca. Pai rimashcaca, achca gentecuna rimanacushca shinami uyarirca.

⁷ Chaitaca, Daniel ñucallami muscuipi shina ricurcani. Ashtahuanpish ñucahuan cac runacunaca mana ricurcachu. Shina cashpapish paicunaca yallita manchai japicpimi, miticushpa callparca.

⁸ Shina ricpimi, ñucalla saquirishpa chai mancharinata muscuipi shina ricurcani. Chaipica fuerza illac saquirishpami, yallita irquiyashpa ñahuipish quilluyashca carcani.

⁹ Chai quipaca pai rimashcatami uyarcani. Chai rimashcata uyashpaca urai singa urmashpami sueñushpa saquirishca carcani.

¹⁰ Shina sueñucucpimi, maquihuan ñucapi tuparishpa, cungurichishpa maquihuan taunallichirca.

¹¹ Shina ruhuashpaca: “Yallita cuyashca Daniel, ñuca rimashcata alli uyangui. Cunanmi canta ricuchun cacharca. Chaimanta shayari” nirca. Pai ñucahuan rimacucllapitacmi ñucaca chucchushpa shayarircani.

¹² Shina shayaricpimi paica: “Daniel ama manchaichu. Chaicunata tucui shunguhuan yachacusha nishpa, Mandac Diospac ñaupapi cumurishpa mañashca punzhamanta pachami can mañashcataca uyashca. Can mañashcamantami ñucata cacharca.

¹³ Ashtahuanpish Persia llactata jatun mandacmi ishcai chunga shuc punzhata jarcarca. Chaimantami angelcunata mandac ángel Miguel ayudangapac shamurca. Chashna ayudacpimi, Persia llactata mandaccunahuan saquirircani.

¹⁴ Chai muscuipi shina ricushcaca shamuc punzhacunapimi tucunga. Chaimantami tucuri punzhacunapi cambac llacta gentecuna ima tucunata huillac shamuni” nirca.

¹⁵ Chashna rimacucllapitacmi ñucaca urai singa urmashpa, imatapish mana rimai pudircani.

¹⁶ Shina cacpipish, shuc runaman ricchami ñuca shimipi tuparirca. Chaimantami ñuca ñaupapi shayacucta rimashpaca: “Ñuca amitolla, muscuipi shina ricushcamantami yallita llaquirishpa, fuerza illac saquirircani.

¹⁷ Ñuca amolla, canta servic ñucaca, ¿imatac canhuan parlai pudishayari? Chaica, can rimashcata uyashpami irquiyashpa, samaitapish mana charini” nircani.

¹⁸ Shina nicpimi, chai runaman ricchaca cutinllatac sinchiyachirca.

¹⁹ Chai quipami paica: “Canca yallita cuyashcami cangui, ama manchaichu. Cushi causaitami causangui. Canca fuerzata japishpa sinchicuilla” nirca. Pai chashna nicucllapitacmi sinchiyarcani. Chashna cashpami: “Ñuca amolla, ñucata sinchiyachishcanguimi, cunanca rimailla” nircani.

²⁰ Shina nicpimi paica: “¿Imapac cambacman shamushcata yachanguichu? Cunanca Persia llactata mandaccunahuan macanacungapac cutinami cani. Paita mishashca quipaca, Grecia llactata mandacmi macanacungapac shamunga.

²¹ Ashtahuanpish ñucaca cashcata nic libropi imata nicushcatami huillagrini. Ñuca paicunahuan macanacucucpica pi mana ayudac shamunchu. Ashtahuanpish cancunata mandac Miguel-llami ayudac shamun” nirca.